Read Pashto Bible (Yusufzai) — د پښتو مقدس کتاب تثنيه 19 Bible Online

تثنيه 19 - Pashto Bible (Yusufzai) — د پښتو مقدس کتاب bible

تثنيه 19

¹کله چې مالِک خُدائ ستاسو خُدائ پاک هغه خلق تباه کړى چې زمکه يې تاسو له درکوى اؤ چې د هغوئ ښارونه اؤ کورُونه ونيسئ اؤ هلته اوسېږئ،

²نو هغه علاقه په دريو حِصو کښې تقسيم کړئ، چې په هره يوه حِصه کښې يې داسې ښار وى چې تلل ورته آسان وى. نو چې څوک يو بل کس ووژنى نو د پناه د پاره د دې نه يو ښار ته تښتېدلے شى.

⁴کۀ څوک يو کس په غلطۍ سره ووژنى چې هغه يې دُښمن نۀ وى، نو هغه د دې ښارُونو نه يو ښار ته تښتېدلے شى چې بچ شى.

⁵کۀ دوه سړى د لرګو وهلو د پاره ځنګل ته لاړ شى اؤ د هغوئ نه يو کس يوه ونه راماتوى اؤ تبر د لاسکى نه ووځى اؤ هغه بل کس ووژنى، نو د پناه د پاره د دې ښارُونو نه يو ته تښتېدلے شى.

⁶خو کۀ صِرف يو ښار وى اؤ هغې ته فاصله هم ډېره وى، نو کېدے شى چې د هغه کس بدل اخستُونکى خپلوان يې ونيسى اؤ په غُصه کښې يو بې‌ګُناه ګاونډى ووژنى. خو په غلطۍ سره هغۀ خپل ګاونډى مړ کړو چې دُښمن يې نۀ وو.

⁷نو ځکه زۀ حُکم درکوم چې درې ښارونه بېل کړئ.

⁸کله چې مالِک خُدائ ستاسو خُدائ پاک ستاسو علاقه پراخه کړى، لکه څنګه چې هغۀ ستاسو پلار‌نيکۀ ته وئيلى دى اؤ هغه ټول وطن درکړى چې هغۀ يې وعده کړې ده،

⁹بيا تاسو درې نور ښارونه خوښ کړئ. کۀ تاسو هغه هر څۀ کوئ چې نن يې زۀ حُکم درکوم اؤ د مالِک خُدائ خپل خُدائ پاک سره مينه کوئ اؤ د هغۀ د اصُولو په مُطابق ژوند تېروئ نو هغه به تاسو له دا وطن درکړى.

¹⁰هم دغه شان وکړئ، چې بې‌ګُناه خلق نۀ مرى اؤ د هغوئ د وژلو ګُناه ستاسو په غاړه نۀ وى، په هغه وطن کښې چې مالِک خُدائ يې تاسو له درکوى.

¹¹خو کۀ يو کس د خپل ګاونډى سره دُښمنى لرى اؤ د قصده په هغۀ حمله وکړى اؤ وې وژنى اؤ بيا د پناه د پاره د دې ښارُونو نه يو ښار ته وتښتى،

¹²نو په داسې حالت کښې دې د هغه ښار مشران هغه راوغواړى اؤ د هغه کس خپلوانو ته دې په حواله کړى کُوم چې د قتل د بدل اخستلو ذِمه وار وى، نو چې هغه ووژلے شى.

¹³په هغۀ هيڅ رحم مۀ کوئ. د دې قاتِل نه اِسرائيل پاک کړئ، نو ستاسو هر کار به سم وى.

¹⁴د خپل ګاونډى د جائيداد د حد کاڼے مۀ ښوزوئ، کُوم چې د مخکښې نه په هغه وطن کښې لګېدلے وى چې مالِک خُدائ ستاسو خُدائ پاک يې تاسو له درکوى.

¹⁵د يو سړى مُجرم ثابِتولو د پاره يو ګواه کافى نۀ وى، کم از کم دوه ګواهان ضرُورى دى چې هغه سړے مُجرم ثابت شى.

¹⁶کۀ څوک د دروغو اِلزام په وجه بل کس ته نُقصان رسولو کوشش وکړى،

¹⁷نو دواړه به د عِبادت هغه يو ځائ ته ځى اؤ د هغه وخت مُقرر شوى قاضيان اؤ اِمامان به د هغوئ فېصله وکړى.

¹⁸قاضيان به د دې معاملې پُوره معلُومات وکړى، اؤ کۀ چا په خپل اِسرائيلى باندې د دروغو اِلزام لګولے وى،

¹⁹هغۀ ته به هغه سزا ملاوېږى چې د څۀ اِراده چې يې د بل د پاره لرله. نو داسې به تاسو د دې بدۍ نه خلاص شئ.

²⁰بيا به هر يو کس خبر شى چې څۀ وشول، هغوئ به ويرېږى اؤ هيڅ څوک به هم بيا داسې بد عمل نۀ کوى.

²¹په داسې مُعامِلو کښې هيڅ رحم مۀ کوئ، د ژوند په بدل کښې به د ژوند سزا وى، د سترګې په بدل کښې د سترګې، د غاښ په بدل کښې د غاښ، د لاس په بدل کښې د لاس، د خپې په بدل کښې به د خپې سزا وى.