Read Pashto Bible (Yusufzai) — د پښتو مقدس کتاب تثنيه 20 Bible Online

تثنيه 20 - Pashto Bible (Yusufzai) — د پښتو مقدس کتاب bible

تثنيه 20

¹کله چې تاسو د خپلو دُښمنانو خِلاف جنګ له ځئ اؤ تاسو وګورئ چې د هغوئ جنګى ګاډۍ، اسُونه اؤ لښکر ستاسو نه زيات وى، نو د هغوئ نه مۀ يرېږئ. مالِک خُدائ ستاسو خُدائ پاک به ستاسو مل وى، چا چې د مِصر وطن نه راوويستلئ.

²د هغې نه مخکښې چې تاسو جنګ شروع کړئ، يو اِمام دې وړاندې راشى اؤ لښکر ته دې ووائى،

³اے اِسرائيليانو! واورئ، نن تاسو جنګ له روان يئ. مۀ بې‌زړۀ کېږئ، مۀ يرېږئ، مۀ بې‌حوصلې کېږئ اؤ نۀ چې وارخطا شئ.

⁴مالِک خُدائ ستاسو خُدائ پاک ستاسو مل دے، هغه به ستاسو دُښمنانو خِلاف جنګ کوى اؤ فتح به درکړى.

⁵بيا به آفسران په خپل تقرير کښې فوجيانو ته ووائى، په تاسو کښې داسې څوک شته چې کور يې جوړ کړے وى، خو وقف کړے يې نۀ وى؟ کۀ داسې څوک وى، نو هغه دې کور ته لاړ شى. کۀ هغه په جنګ کښې ووژلے شى، نو بل څوک به د هغۀ کور وقف کړى.

⁶دلته داسې يو سړے شته، چې هغۀ د انګُورو باغ کَرلے وى، خو دا موقع ورته نۀ وى مِلاؤ شوى چې انګُور ترې نه راټول کړى؟ کۀ داسې څوک وى، نو هغه دې کور ته لاړ شى. کۀ هغه په جنګ کښې ووژلے شى، نو بل څوک به د هغۀ د انګُورو په شرابو مزې وکړى.

⁷دلته داسې څوک شته، چې کوژدن يې کړې وى؟ کۀ داسې څوک وى، نو هغه دې کور ته لاړ شى. ګنى، کۀ هغه په جنګ کښې ووژلے شى، نو بل څوک به د هغۀ د کوژدن شوى ښځې سره وادۀ وکړى.

⁸آفسران به سړو ته دا هم ووائى، دلته داسې يو سړے شته، چې هغه يرېږى يا يې زړۀ بېللے وى؟ کۀ داسې څوک وى، نو هغه دې کور ته لاړ شى. ګنى، د خپل ځان په شان د نورو ملګرو زړُونه هم وبائيلى.

⁹کله چې آفسران د لښکر سره خپلې خبرې خلاصې کړى، نو د هرې ډلې د پاره به مشران خوښ کړے شى.

¹⁰کله چې تاسو په يو ښار باندې حمله کوئ، نو وړومبے هغه خلقو ته د تسليمېدو موقع ورکړئ.

¹¹کۀ هغوئ دروازې کولاؤ کړى اؤ تسليم شى، نو هغوئ به ټول ستاسو غُلامان وى اؤ ستاسو د پاره به بېګار کوى.

¹²خو کۀ د هغه ښار خلق تسليم نۀ شى اؤ جنګ خوښ کړى، نو د خپل لښکر سره يې مُحاصره کړئ.

¹³نو کله چې مالِک خُدائ ستاسو خُدائ پاک وکړى چې تاسو هغه ښار قبضه کړئ، نو په دې کښې ټول سړى ووژنئ.

¹⁴خو هغه ښځې، ماشُومان، څاروى اؤ چې په ښار کښې نور هر څۀ وى هغه د ځان د پاره اخستے شئ. تاسو د خپلو دُښمنانو هر څيز اِستعمالولے شئ. مالِک خُدائ دا تاسو له درکړى دى.

¹⁵تاسو به د هغه ښارُونو سره داسې کار وکړئ کُوم چې د هغه وطن نه لرې دى چرته به چې تاسو اوسېږئ.

¹⁶خو کله چې تاسو د هغه وطن ښارونه قبضه کړئ چې مالِک خُدائ ستاسو خُدائ پاک يې تاسو له درکوى، نو هر يو کس ووژنئ.

¹⁷دا ټول خلق تباه کړئ : حِتيان، اموريان، کنعانيان، فارصيان، حِويان اؤ يبوسيان، لکه څنګه چې مالِک خُدائ د دې حُکم درکړے دے.

¹⁸دا خلق ووژنئ، نو هغوئ به تاسو د مالِک خُدائ خِلاف ګُناهګار نۀ کړى چې تاسو ته هغه ټول بد عملونه وښائى چې هغوئ يې د خپلو معبُودانو په عِبادت کښې کوى.

¹⁹کله چې تاسو د يو ښار د قبضه کولو کوشش کوئ، نو د هغه ځائ مېوه‌دارې ونې مۀ پرې کوئ، اګرچې مُحاصره د ډېر وخت پورې اُوږده هم شى. مېوه يې خورئ، خو ونې مۀ تباه کوئ، ځکه چې ونې ستاسو دُښمنانې نۀ دى.

²⁰تاسو هغه ونې راماتولے شئ چې مېوه نۀ کوى اؤ د مُحاصرې د دېوالُونو د پاره يې اِستعمالولے شئ، چې هغه ښار قبضه شى.