Read Pashto Bible (Yusufzai) — د پښتو مقدس کتاب تثنيه 22 Bible Online

تثنيه 22 - Pashto Bible (Yusufzai) — د پښتو مقدس کتاب bible

تثنيه 22

¹کۀ تاسو وګورئ چې ستاسو د وطن دار غوا يا ګډې لار غلطه کړې وى، نو هغه هم داسې مۀ پرېږدئ، اؤ خپل مالِک له يې واپس ورولئ.

²خو کۀ د دې مالِک لرې اوسېږى يا کۀ تاسو ته پته نۀ وى چې دا د چا ده، نو د ځان سره يې خپل کور ته بوځئ. کله يې چې مالِک لټولو له راشى، نو هغۀ له يې ورکړئ.

³کله چې تاسو خر، د کپړې ټُکړه، يا بل څۀ ومُومئ چې ستاسو د وطن دار نه ورک شوې وى نو تاسو هم دغه شان کوئ. د چا سره مدد کولو نه لاس مۀ نيسئ.

⁴کۀ ستاسو د وطن دار خر يا غوا په لاره کښې غورزېدلې وى، نو هغه هم داسې مۀ پرېږدئ، د هغه ځناور په پاڅولو کښې د هغۀ مدد وکړئ.

⁵ښځې دې د سړو جامې نۀ اغوندى اؤ سړى دې د ښځو جامې نۀ اغوندى، مالِک خُدائ ستاسو خُدائ پاک د هغه خلقو نه کرکه کوى څوک چې داسې کارُونه کوى.

⁶کۀ چرې تاسو په يوه ونه کښې يا په زمکه باندې د مارغانو جاله ووينئ چې مرغۍ په هګو باندې يا د خپلو بچو سره ناسته وى، نو تاسو به دا مرغۍ نۀ رانيسئ.

⁷تاسو د مرغو هغه واړۀ بچې رانيولے شئ، خو مرغۍ به يې پرېږدئ چې لاړه شى، نو تاسو به يو اُوږد اؤ خوشحاله ژوند تېر کړئ.

⁸کله چې تاسو يو نوے کور جوړ کړئ، نو ګورئ چې د چت د غاړې نه ګېر‌چاپېره يو پړده‌وال ورله جوړ کړئ. کۀ څوک ترې نه راوغورزېږى اؤ مړ شى نو ذِمه وارى به يې ستاسو په غاړه نۀ وى.

⁹کۀ په يو پټى کښې انګُور وکَرئ نو بل څۀ فصل ورسره مۀ کَرئ ګنى دواړه به نۀ شئ خوړلے.

¹⁰غوَيے اؤ خر تاسو په يو جغ کښې د يوې کولو د پاره مۀ اچوئ.

¹¹داسې جامې مۀ اغوندئ چې په يو ځائ د تاؤ شوې وړۍ اؤ د لټې نه جوړې وى.

¹²د خپلو جامو په څلورو ګوټُونو پورې د مزو سُونډى وګنډئ.

¹³کۀ يو سړے يوه ښځه وادۀ کړى اؤ ورسره څملى او وروستو يې هغه خوښه نۀ شى،

¹⁴اؤ د هغې خِلاف داسې دروغ ووائى چې ما وادۀ کړه خو چې کله ورسره څملاستم نو ما ته پته ولګېده چې هغه زما نه مخکښې د بل سړى سره ملاسته وه.

¹⁵کۀ داسې وشى، نو د جينۍ مور اؤ پلار دې د ښار مشرانو له د جرګې په وخت دا ثبُوت راوړى چې هغه جينۍ هيڅ کله هم د يو سړى سره نۀ وه ملاسته.

¹⁶د هغې پلار به مشرانو ته ووائى، ”ما خپله لُور دې سړى له ورکړه چې وادۀ يې کړى، خو اوس د هغۀ خوښه نۀ ده.

¹⁷هغه د دې خِلاف دا دروغ وائى چې کله ما ورسره وادۀ وکړو نو هغه د مخکښې نه د بل سړى سره ملاسته وه خو ثبُوت دا دے چې زما لُور صفا وه، د وادۀ د کټ په څادر باندې تاسو د وينې دا داغُونه وګورئ!“

¹⁸نو د ښار مشران به د هغې خاوند بوځى اؤ سزا به ورکړى.

¹⁹هغوئ دې هغه سل د سپينو زرو سيکې جُرمانه هم کړى اؤ پېسې دې د ښځې پلار له ورکړى، ځکه چې هغه سړى يوه اِسرائيلۍ ښځه رسوا کړې ده. د دې نه علاوه، هغه به يې ښځه هم وى اؤ چې تر څو پورې هغه ژوندے وى هغې له طلاق نۀ شى ورکولے.

²⁰خو کۀ دا خبره رښتيا وى اؤ دا ثبُوت نۀ وى چې هغه پېغله پاتې شوې وه،

²¹نو هغوئ به يې د هغې د پلار د کور دروازې خُلې ته بوځى، د ښار سړى به يې هلته سنګسار کړى چې مړه شى. هغې ستاسو خلقو په مېنځ کښې يو د شرم نه ډک کار کړے دے چې د وادۀ نه مخکښې د بل سړى سره څملاستله، چې هغه لا د پلار په کور کښې وه. نو تاسو به د دې بدکارۍ نه خلاص شئ.

²²کۀ يو سړے د بل سړى د ښځې سره په زنا کولو کښې ونيولے شى، نو هغوئ دواړه به وژلے شى، چې تاسو د دې بدکارۍ نه خلاص شئ.

²³کۀ په يو ښار کښې يو سړے د داسې ښځې سره په زنا پورې ونيولے شى چې د هغې کوژدن د بل چا سره شوې وى،

²⁴نو تاسو هغوئ د ښار نه بهر بوځئ اؤ سنګسار يې کړئ چې مړۀ شى. ښځه دې ځکه مړه شى چې هغې د مدد د پاره چغې نۀ دى وهلې، اګر چې هغه په ښار کښې وه، کېدے شى چې هلته د هغې چغې اؤرېدلے شوے وے. اؤ سړے دې ځکه مړ شى چې هغۀ د يوې داسې ښځې سره زنا کړې ده چې هغه کوژدن شوې وه. نو داسې به تاسو د دې ګند نه ځان خلاص کړئ.

²⁵فرض کړئ چې يو سړے په پټو کښې د يوې داسې ښځې بې عِزتى وکړى چې د هغې کوژدن د بل چا سره شوې وى. نو صِرف هغه سړے به وژلے شى،

²⁶ښځې ته به هيڅ نۀ شى وئيلے، ځکه هغې داسې ګُناه نۀ ده کړې چې د مرګ حقداره شى. دا هم هغه شان معامِله ده چې يو سړے په بل سړى باندې حمله وکړى اؤ مړ يې کړى.

²⁷هغه سړى په پټو کښې د هغه کوژدن شوې ښځې سره په زبردستۍ زنا وکړه، اګرچې هغې د مدد چغې وهلې وې، خو هيڅ څوک هم نۀ وُو.

²⁸کۀ يو سړے د يوې داسې جينۍ سره په زبردستۍ زنا وکړى چې هغه کوژدن شوې نۀ وى،

²⁹نو هغه به د هغې پلار له پنځوس د سپينو زرو سيکې حق مهر ورکړى اؤ هغه به يې ښځه شى، ځکه چې هغۀ په زور باندې د هغې سره زنا کړې ده. چې تر کُومې پورې ژوندے وى نو هغې له طلاق نۀ شى ورکولے.

³⁰يو سړے دې هم د خپل پلار بې عِزتى نۀ کوى چې د خپل پلار د ښځو نه د يوې سره څملى.