Read Pashto Bible (Yusufzai) — د پښتو مقدس کتاب تثنيه 23 Bible Online

تثنيه 23 - Pashto Bible (Yusufzai) — د پښتو مقدس کتاب bible

تثنيه 23

¹د کُوم سړى چې هګۍ ماتې شوې وى يا يې ذکر پرې کړے شوے وى نو هغه يو به هم د مالِک خُدائ په خلقو کښې نۀ شى شامِلېدلے.

²يو حرامى پېدا شوے کس يا د داسې کس اولاد، تر لسم نسله پورې هم، د مالِک خُدائ په خلقو کښې نۀ شى شامِلېدلے.

³هيڅ يو عمونى يا موآبى، يا د هغوئ اولاد، تر لسم نسل پورې هم، د مالِک خُدائ په خلقو کښې نۀ شى شامِلېدلے.

⁴کله چې تاسو د مِصر نه بهر په لاره کښې وئ نو هغوئ تاسو له د خوراک اؤ اوبو درکولو نه اِنکار وکړو اؤ د ميسوپوتاميه په ښار فتور کښې يې د بعور زوئ بلعام له پېسې ورکړې چې په تاسو لعنت ووائى.

⁵خو مالِک خُدائ ستاسو خُدائ پاک به بلعام ته غوږ نۀ نيولو، اؤ لعنت يې په برکت بدل کړو، ځکه چې هغۀ ستاسو سره مينه لرله.

⁶چې تر کُومې پورې تاسو ژوندى يئ، د هغوئ د خېر اؤ خوشحالۍ تصور هم مۀ کوئ.

⁷ادوميانو ته سپک مۀ ګورئ، هغوئ ستاسو خپلوان دى. اؤ مِصريانو ته هم سپک مۀ ګورئ، په وخت کښې تاسو د هغوئ په وطن کښې اوسېدئ.

⁸د دريم نسل نه ورپه اخوا د هغوئ اولاد د مالِک خُدائ په خلقو کښې شامِلېدے شى.

⁹کله چې تاسو د يو لښکر په شکل د خپلو دُښمنانو خِلاف ووځئ، نو ګورئ د داسې هر څيز نه ځان ساتئ چې تاسو ناپاکوى.

¹⁰کۀ د شپې شېطان يو سړے دهوکه کړى اؤ هغه په دې وجه ناپاک شى، نو هغه دې د خېمو نه بهر ووځى اؤ هلته دې پاتې شى.

¹¹په ماښام کښې دې هغه غُسل وکړى اؤ د نمرپرېواتۀ په وخت کښې هغه واپس کېمپ ته راتلے شى.

¹²تاسو له په کار دى چې د کېمپ نه بهر يو ځائ جوړ کړئ چې هلته د اودس ماتى د پاره ځئ.

¹³په خپل سامان کښې د کنستلو د پاره يو څيز هم يوسئ، کله چې تاسو ډکې متيازې کوئ نو يوه کنده به وکنئ اؤ متيازې به په کښې پټې کړئ.

¹⁴خپل کېمپ مُقدس ساتئ، ځکه چې مالِک خُدائ ستاسو خُدائ پاک تاسو سره ستاسو په کېمپ کښې دے، دا د دې د پاره چې ستاسو حِفاظت وکړى اؤ تاسو له په دُښمنانو باندې فتح درکړى. داسې يو د بې‌شرمۍ کار هم مۀ کوئ چې د هغې په وجه مالِک خُدائ ستاسو نه مخ واړوى.

¹⁵کۀ غُلامان د خپلو مالِکانو نه وتښتى اؤ تاسو له د پناه د پاره راشى، نو هغوئ واپس مۀ لېږئ.

¹⁶هغوئ ستاسو د ښارُونو په هر يو ښار کښې اوسېدے شى چې کُوم يې خوښ وى اؤ تاسو به د هغوئ سره زياتے نۀ کوئ.

¹⁷اِسرائيلے سړے يا ښځه به هيڅ کله د عِبادت‌خانې کنجران نۀ جوړېږى.

¹⁸د کنجر سړى يا د کنجرې ښځې ګټلے شوې پېسې به هم د يوې منختې پُوره کولو د پاره د مالِک خُدائ ستاسو خُدائ پاک کور ته نۀ شى راوړلے. مالِک خُدائ د عِبادت‌خانې د کنجرانو نه نفرت کوى.

¹⁹کله چې تاسو پېسې يا خوراک، يا بل څيز خپل وطن دار له قرض ورکړئ، نو د هغۀ نه سُود مۀ اخلئ.

²⁰يو مُسافر له چې څۀ څيز قرض ورکړئ نو د هغې سُود د هغۀ نه اخستے شئ، خو چې خپل اِسرائيلى له څۀ قرض ورکړئ نو د هغې سُود به ترې نه نۀ اخلئ. دا اصُول ومنئ اؤ مالِک خُدائ ستاسو خُدائ پاک به په هغه وطن کښې تاسو له په هر کار کښې برکت درکړى کُوم وطن چې تاسو قبضه کوئ.

²¹کله چې مالِک خُدائ خپل خُدائ پاک ته تاسو يوه منخته ومنئ، نو چې کُومه وعده مو کړې وى په هغې کښې سستى مۀ کوئ، مالِک خُدائ به ستاسو نه د هغه منختې تپوس کوى اؤ د دې وعدې نۀ پُوره کول ګُناه ده.

²²مالِک خُدائ ته منخته نۀ منل ګُناه نۀ ده،

²³خو کۀ تاسو په خپله خوښه يوه منخته ومنئ، نو ګورئ هغه وعده به پُوره کوئ.

²⁴کله چې تاسو د بل چا د انګُورو باغ سره تېرېږئ، نو چې څومره انګُور غواړئ هغه خوړلے شئ، خو د هغې نه به په يوه ټوکرۍ کښې انګُور نۀ وړئ.

²⁵هم دغه شان، کۀ تاسو د بل چا د فصل په پټى کښې ګرځئ، څومره غله چې د خپلو لاسُونو سره راشُوکولے شئ هغه خوړے شئ، خو هغه فصل به تاسو لور باندې نۀ رېبئ.