Read Pashto Bible (Yusufzai) — د پښتو مقدس کتاب تثنيه 25 Bible Online

تثنيه 25 - Pashto Bible (Yusufzai) — د پښتو مقدس کتاب bible

تثنيه 25

¹فرض کړئ چې دوه کسان د يوې لانجې هوارولو د پاره عدالت ته لاړ شى اؤ قاضيان فيصله وکړى چې يو په حقه دے اؤ بل په ناحقه دے.

²کۀ په هغه ناحقه کس باندې د وهلو حُکم وشى، نو د قاضى په مخکښې دې هغه پړمخې څملولے شى اؤ په کوړو دې ووهلے شى. هغۀ چې کُوم جُرم کړے وى نو د کوړو د ګُزارُونو شمېر به د هغې په مُطابق وى.

³خو هغه به د څلوېښتو کوړو نه زيات نۀ شى وهلے، د څلوېښتو نه زياتو کوړو مطلب به دا وى چې ستاسو ګاونډى د خلقو په مخکښې وشرمېږى.

⁴د غوبل په وخت کښې د غوَيى خُلې ته کوَرے مۀ اچوئ.

⁵کۀ دوه ورُوڼه يو ځائ اوسېږى اؤ يو د هغوئ نه مړ شى اؤ يو زوئ يې هم پاتې نۀ شى، نو د هغۀ کونډه ښځه به د پردى سړى سره وادۀ نۀ کوى، دا د مړ سړى د ورور ذِمه وارى ده چې هغه وادۀ کړى اؤ د هغې سره کوروالے کوى.

⁶د هغوئ چې وړومبے کُوم زوئ پېدا شى نو هغه به د مړ سړى زوئ ګڼلے شى، چې د هغۀ نُوم د بنى اِسرائيلو نه ختم نۀ شى.

⁷خو کۀ د مړ سړى ورور هغې سره وادۀ کول نۀ غواړى، نو هغه ښځه به د ښار مشرانو ته پېش شى اؤ وبه وائى چې زما لېور خپله ذِمه وارى نۀ پُوره کوى، هغه دا نۀ غواړى چې د هغۀ د ورور نُوم په بنى اِسرائيلو کښې باقى پاتې شى.

⁸نو د ښار مشران دې هغه راوغواړى اؤ د هغۀ سره دې خبره وکړى. کۀ تر اوسه پورې يې وادۀ کول نۀ غواړى،

⁹نو د هغۀ د ورور کونډه ښځه دې د ښار د مشرانو په وړاندې هغۀ له ورشى، د هغۀ يوه څپلۍ دې وباسى، د هغۀ په مخ دې تُوکاڼې اوتُوکى اؤ وبه وائى چې دا هغه څۀ دى چې د هغه سړى سره به کېږى چې د خپل ورور کور آبادول نۀ غواړى.

¹⁰نو د هغۀ کورنۍ به په اِسرائيل کښې په دې نُوم يادېږى چې ”هغه سړے چې څپلۍ يې ويستلے شوې وه.“

¹¹کۀ دوه سړى په جګړه وى اؤ د هغه يو سړى ښځه د خپل خاوند د مدد کوشش داسې وکړى چې هغه بل سړے د هګو نه راونيسى،

¹²نو چې په هغه ښځه باندې هيڅ رحم ونۀ کړئ، اؤ د هغې لاس پرې کړئ.

¹³کله چې تاسو ناپ تول کوئ نو په هغې کښې ټګى مۀ کوئ.

¹⁵صحيح اؤ پُوره ناپ تول کوئ، نو داسې به تاسو په هغه وطن کښې يوه ډېره موده تېره کړئ چې مالِک خُدائ ستاسو خُدائ پاک يې تاسو له درکوى.

¹⁶مالِک خُدائ د هغو خلقو نه کرکه کوى څوک چې داسې کارُونه کوى.

¹⁷هغه راياد کړئ چې کله تاسو د مِصر نه راروان وئ نو عماليقيانو درسره څۀ وکړل.

¹⁸هغوئ د خُدائ پاک نه هيڅ يره نۀ لرله، نو هغوئ په داسې وخت کښې په تاسو د شا نه حمله وکړه چې تاسو ستړى ستومانه وئ اؤ چې کُوم وروستو پاتې وُو نو هغه ټول يې ووژل.

¹⁹نو چې کله مالِک خُدائ ستاسو خُدائ پاک هغه وطن تاسو له درکړى اؤ د خپلو ټولو دُښمنانو نه مو بچ کړى چې ستاسو نه ګېر‌چاپېره اوسېږى، نو ګورئ چې ټول عمالقيان ووژنئ، نو د آسمان لاندې به هيڅ څوک نور هغوئ نۀ يادوى. دا کار مۀ هېروئ.