Read Pashto Bible (Yusufzai) — د پښتو مقدس کتاب تثنيه 28 Bible Online

تثنيه 28 - Pashto Bible (Yusufzai) — د پښتو مقدس کتاب bible

تثنيه 28

¹کۀ تاسو د مالِک خُدائ خپل خُدائ پاک پُوره فرمانبردارى وکړئ اؤ په وفادارۍ سره د هغۀ په ټولو حُکمُونو عمل کوئ کُوم چې زۀ تاسو له درکوم، نو هغه به تاسو له د دُنيا په ټولو قومُونو باندې اُوچت مقام درکړى.

²د مالِک خُدائ ستاسو خُدائ پاک فرمانبردارى کوئ اؤ هغه به تاسو له دا ټول برکتُونه درکړى :

³کۀ تاسو په ښارُونو يا کلو کښې اوسېږئ نو مالِک خُدائ به تاسو له برکت درکړى.

⁴مالِک خُدائ به تاسو له ډېر اولاد، ډېره غله اؤ ډېر څاروى اؤ ګډې درکړى.

⁵ستاسو په کندو او خانک کښې به برکت وى.

⁶مالِک خُدائ به ستاسو په هر کار کښې برکت واچوى.

⁷کله چې ستاسو دُښمنان په تاسو حمله کوى نو مالِک خُدائ به هغوئ له شکست ورکړى. هغوئ به د يو طرف نه په تاسو حمله وکړى، خو بيا به په هر طرف ستاسو نه تښتى.

⁸تاسو چې هر کار کوئ مالِک خُدائ ستاسو خُدائ پاک به په هغې کښې برکت واچوى اؤ ستاسو ګودامُونه به د غلې نه ډک کړى. هغه به تاسو له په هغه وطن کښې برکت درکړى کُوم چې تاسو له درکوى.

⁹کۀ تاسو د مالِک خُدائ خپل خُدائ پاک حُکمونه ومنئ اؤ د هغۀ په لاره روان يئ، نو هغه به ستاسو نه يو مُقدس قوم جوړ کړى لکه څنګه چې هغۀ وعده کړې ده.

¹⁰نو د دُنيا ټول قومُونه به وګورى چې تاسو د مالِک خُدائ په نُوم يادېږئ اؤ هغوئ به ستاسو نه يرېږى.

¹¹مالِک خُدائ به تاسو له په هغه وطن کښې ډېر اولاد، ډېر څاروى، او ډېر فصلُونه درکړى د کُوم چې هغۀ ستاسو پلار‌نيکۀ سره تاسو له درکولو وعده کړې ده.

¹²هغه به په آسمان کښې د خپلې ډکې خزانې نه په صحيح مُوسم کښې باران ووروى اؤ ستاسو په هر کار کښې به برکت واچوى، نو تاسو به ډېرو قومُونو له قرض ورکوئ، خو د هيچا نه به تاسو قرض نۀ اخلئ.

¹³مالِک خُدائ ستاسو خُدائ پاک به تاسو د قومُونو کشران نه بلکې مشران جوړ کړى، نن چې زۀ کُوم حُکمونه درکوم کۀ په هغه ټولو باندې عمل وکړئ نو تاسو به همېشه کامياب يئ اؤ هيڅ کله به ناکام نۀ شئ.

¹⁴زۀ چې نن تاسو له کُوم حُکمونه درکوم نو د هغې نه اخوا دېخوا مۀ اؤړئ اؤ نۀ چې په نورو معبُودانو پسې لاړ شئ اؤ نۀ يې عِبادت وکړئ.

¹⁵خو کۀ تاسو د مالِک خُدائ د خپل خُدائ پاک نافرمانى وکړئ اؤ د هغۀ په ټولو حُکمُونو اؤ قانُون باندې په وفادارۍ سره عمل نۀ کوئ کُوم چې زۀ نن درکوم، نو دا لعنتُونه به په تاسو راشى اؤ په تاسو به غالِب شى :

¹⁶مالِک خُدائ به ستاسو په ښارُونو اؤ پټو باندې لعنت راولى.

¹⁷مالِک خُدائ به ستاسو په غله اؤ په هغه خوراک لعنت راولى چې تاسو يې د دې نه تياروئ.

¹⁸مالِک خُدائ به په تاسو لعنت راولى اؤ لږ بچى، بې‌کاره فصل اؤ لږ څاروى اؤ ګډې به درکړى.

¹⁹مالِک خُدائ به ستاسو هر کار لعنتى کړى.

²⁰کۀ تاسو بد عمل کوئ اؤ د مالِک خُدائ نه اِنکار کوئ نو هغه به په تاسو آفت، وار خطائى اؤ تکليف راولى، چې زر اؤ په پُوره تباه شئ.

²¹هغه به په تاسو باندې پرله پسې بيمارۍ راولى تر دې پورې چې په هغه وطن کښې ستاسو يو کس هم پاتې نۀ شى کُوم چې تاسو قبضه کوئ.

²²مالِک خُدائ به تاسو په خورېدُونکو بيمارو، په پړسوب اؤ تبه باندې آخته کړى، هغه به سره د توروالى اؤ د پشم د بيمارۍ وچ کالى اؤ سخته ګرمى راولى. دا آفتُونه به تر مرګه پورې ستاسو سره وى.

²³بره د آسمان نه به باران بند وى اؤ زمکه به د کاڼى په شان کلکه شى.

²⁴د باران په ځائ به مالِک خُدائ د خاورو اؤ د شګو طوفان راولى اؤ طوفانونه به تر هغې پورې وى چې تاسو تباه کړى.

²⁵مالِک خُدائ به ستاسو دُښمنانو له په تاسو باندې فتح ورکړى. تاسو به د يو طرف نه په هغوئ باندې حمله وکړئ، خو تاسو ته به د تښتې لار نۀ ملاوېږى، چې د زمکى خلق ستاسو دا حالات وګورى نو وبه يريږى چې دا په تاسو څۀ شوى دى.

²⁶ستاسو لاشُونه به د ټولو مارغانو اؤ ځنګلى ځناورو خوراک شى اؤ هلته به هيڅ څوک داسې نۀ وى چې تاسو نه يې وشړى.

²⁷مالِک خُدائ به په تاسو باندې دانې راوخېژوى، لکه څنګه چې هغۀ په مِصريانو راخېژولې وې. هغه به ستاسو بدنونه د دردُونو سره مات کړى. تاسو به په خارښت اؤ دانو باندې پټ شئ، خو د دې به هيڅ علاج نۀ وى. خو بيا به په هر طرف باندې درنه تښتى.

²⁸مالِک خُدائ به تاسو لېونى کړى، هغه به تاسو ړاندۀ کړى اؤ دماغ به مو ګډ‌وډ کړى.

²⁹د غرمې په وخت کښې به هم تاسو د ړندو په شان اخوا دېخوا ګرځئ اؤ تاسو به د دې جوګه نۀ يئ چې لاره پېدا کړئ. تاسو به په يو کار کښې هم کامياب نۀ يئ. تاسو به پُوره کړېدلى اؤ لُوټ شوى يئ اؤ هلته به داسې څوک نۀ وى چې ستاسو مدد وکړى.

³⁰تاسو به د يوې پېغلې سره کوژدن وکړئ، خو بل څوک به د هغې سره څملى. تاسو به يو کور جوړ کړئ، خو هيڅ کله به په هغې کښې ونۀ وسېږئ. تاسو به د انګُورو باغ وکَرئ، خو د هغې انګُور به هيڅ کله ونۀ خورئ.

³¹ستاسو څاروے به د ستاسو د سترګو په وړاندې حلال شى، خو تاسو به يې غوښه ونۀ خورئ. ستاسو په وړاندې به ستاسو خرُونه بوتلے شى خو تاسو له به واپس نۀ درکولے کېږى، ستاسو ګډې به ستاسو دُښمنانو له ورکړے شى خو ستاسو د مدد د پاره به هيڅ څوک نۀ وى.

³²ستاسو زامن اؤ لُوڼه به نورو قومُونو له غلامان ورکړے شى تاسو به هميشه هغوې ته سترګى په لار يئ خو هيڅ به هم نۀ شئ کولے.

³³يو پردے قوم به هغه ټول فصلُونه يوسى چې د هغې په کَرلو کښې تاسو ډېره سخته خوارى کړې وى، خو په هغه وخت کښې به تاسو ته د سخت کړاؤ اؤ بد سلُوک نه بغېر هيڅ نۀ ملاوېږى.

³⁴او دا تکليفُونه چې تاسو وينئ نو تاسو بۀ لېونى شئ.

³⁵مالِک خُدائ به ستاسو خپې په لا عِلاجه اؤ دردناکو زخمونو پټې کړى، د سر نه تر خپو پورې به په تاسو باندې دانې راوخېژى.

³⁶مالِک خُدائ به تاسو اؤ ستاسو بادشاه يو پردى وطن ته بوځى، هلته به مخکښې هيڅ کله نۀ تاسو اؤ نۀ ستاسو پلار‌نيکۀ اوسېدلى وى، هلته به تاسو د داسې معبُودانو خِدمت کوئ چې د لرګى اؤ کاڼى نه جوړ وى.

³⁷په کُومو وطنُونو کښې چې مالِک خُدائ تاسو خوارۀ وارۀ کړى، نو تاسو به د خلقو د پاره يروُونکى شئ، هغوئ به په تاسو پورې ټوقې اؤ مسخرې کوى.

³⁸تاسو به ښۀ ډېر تُخم وکَرئ، خو لږ فصل به ترې ورېبئ، ځکه چې د قحطۍ ملخان به ستاسو فصلُونه وخورى.

³⁹تاسو به د انګُورو باغُونه وکَرئ اؤ د هغې ساتنه به وکړئ، خو تاسو به نۀ د هغو نه انګُور راغونډ کړئ اؤ نۀ به يې شراب وڅښئ، ځکه چې انګُور به چينجى وخورى.

⁴⁰د زيتُونو ونې به ستاسو په وطن کښې شوى وى، خو هيڅ د زيتُونو تېل به تاسو ته مِلاؤ نۀ شى، ځکه چې زيتُون به کچه راوغورزېږى.

⁴¹ستاسو به زامن اؤ لُوڼه وى، خو تاسو به يې د ځان سره نۀ شئ ساتلے، ځکه چې هغوئ به قېديان شى.

⁴²ستاسو ټولې ونې اؤ فصلُونه به د قحطۍ ملخان خراب‌تُراب کړى.

⁴³ستاسو په وطن کښې چې کُوم د پردى وطن خلق اوسېږى هغوئ به ورځ په ورځ په تاسو زورَور کېږى اؤ تاسو به ورځ په ورځ کمزورى کېږئ.

⁴⁴هغوئ سره به پېسې وى چې تاسو له يې قرض درکړى، خو تاسو سره به هيڅ نۀ وى چې تاسو يې هغوئ له قرض ورکړئ. په آخِر کښې به هغوئ ستاسو بادشاهان شى.

⁴⁵دا ټول آفتُونه به په تاسو راشى اؤ دا آفتُونه به ستاسو تر تباهۍ پورې تاسو سره وى، ځکه چې تاسو د مالِک خُدائ د خپل خُدائ پاک فرمانبردارى ونۀ کړه اؤ په هغه ټول قانُون باندې تاسو عمل ونۀ کړو چې هغۀ درکړے وو.

⁴⁶دا آفتُونه به د يوې نښې اؤ خبردارى په شان ستاسو اؤ ستاسو د اولاد په مېنځ کښې د همېشه د پاره وى.

⁴⁷مالِک خُدائ تاسو له په هر څۀ کښې برکت درکړے دے، خو تاسو په خوشحالۍ اؤ د زړۀ د اِخلاصه د هغۀ خِدمت ونۀ کړو.

⁴⁸نو بيا به تاسو د هغه دُښمنانو خِدمت کوئ چې مالِک خُدائ يې ستاسو خِلاف درلېږى. تاسو به وږى، تږى، بربنډ اؤ د هر څۀ حاجت مند يئ. مالِک خُدائ به تاسو سخت وکَړوى تر دې پورې چې تباه شئ.

⁴⁹مالِک خُدائ به ستاسو خِلاف د لرې ځائ نه يو قوم راولى، هغه قوم چې تاسو به يې په ژبه نۀ پوهېږئ. هغوئ به د باز په شان په تاسو باندې راغُوټه شى.

⁵⁰هغوئ به يو ظالِم اؤ بې‌رحمه قوم وى چې نۀ به د مشرانو عِزت کوى اؤ نۀ به په کشرانو رحم کوى.

⁵¹هغوئ به ستاسو څاروى اؤ فصلُونه وخورى اؤ تاسو به د لوږې نه مړۀ شئ. هغوئ به ستاسو غله، د انګُورو شراب، د زيتُونو تېل، څاروى اؤ ګډې هيڅ هم نۀ پرېږدى، اؤ تاسو به مړۀ شئ.

⁵²مالِک خُدائ ستاسو خُدائ پاک چې کُوم وطن تاسو له درکوى هغوئ به د هغې په هر ښار باندې حمله وکړى اؤ په کُومو اُوچتو اؤ پَخو دېوالُونو باندې چې تاسو اعتبار کوئ هغه به راوغورزېږى.

⁵³کله چې ستاسو دُښمنان ستاسو ښارونه مُحاصره کوى، نو تاسو به دومره وږى شئ چې مالِک خُدائ ستاسو خُدائ پاک تاسو له کُوم بچى درکړى وى نو هغه به هم وخورئ.

⁵⁴ستاسو د ټولو نه شريف اؤ د نرم زړۀ سړے به هم په مُحاصره کښې دومره وږے شى چې هغه به هم خپل بچى وخورى ځکه چې نور خوراک به نۀ ملاوېږى. هغه به په دې پاتى لاش کښې خپل ورور اؤ ښځې له چې مينه ورسره کوى اؤ خپلو بچو له هيڅ هم نۀ ورکوى.

⁵⁵

⁵⁶ستاسو د ټولو نه شريفه اؤ د نرم زړۀ ښځه، دومره شريفه اؤ پاکه چې په پُوره ژوند کښې چرته نۀ وى تلې، هغه به هم دغه شان کار کوى. کله چې دُښمن هغه ښار مُحاصره کړى، نو هغه به دومره وږې شى چې هغه به پټ پټ خپل نوے پېدا شوے ماشُوم اؤ پېروان هم خورى. هغه به په دې کښې خپل خاوند له چې مينه ورسره کوى اؤ خپل بچى هم نۀ شريکوى.

⁵⁷

⁵⁸کۀ تاسو په وفادارۍ د خُدائ پاک ټولې لارښودنې ونۀ منئ کُومې چې په دې کِتاب کښې ليکلے شوى دى اؤ کۀ تاسو د مالِک خُدائ ستاسو خُدائ پاک عجيبه اؤ هېبتناک نُوم نه ونۀ يرېږئ،

⁵⁹نو هغه به په تاسو اؤ ستاسو په اولاد باندې داسې لاعِلاجه بيمارۍ اؤ دردناکې وباګانې راولېږى چې هغه به هيڅ کله نۀ بندېږى.

⁶⁰هغه به يو ځل بيا په تاسو باندې هغه ټولې يروُونکې بيمارۍ راولى چې په تاسو باندې په مِصر کښې تېرې شوې وى اؤ تاسو به هيڅ کله روغ نۀ شئ.

⁶¹هغه به هغه هر قِسم بيمارۍ اؤ وباګانې هم راولېږى چې هغه د خُدائ پاک د قانُون په دې کِتاب کښې نۀ دى بيان شوى اؤ تاسو به تباه شئ.

⁶²اګرچې تاسو به د آسمان د ستورو په شان بې‌شمېره شئ، خو صِرف ستاسو يو څو کسان به ژوندى پاتې شى، ځکه چې تاسو د مالِک خُدائ د خپل خُدائ پاک فرمانبردارى ونۀ کړه.

⁶³لکه څنګه چې مالِک خُدائ په خوشحالۍ سره تاسو کامياب کړئ اؤ ستاسو شمېر يې زيات کړو، نو هم دغه شان هغه به خوشحالۍ سره تاسو تباه کړى اؤ تباهى به درباندې راولى. تاسو به د هغه وطن د بېخ نه وويستلے شئ کُوم چې تاسو قبضه کوئ.

⁶⁴مالِک خُدائ به تاسو په ټولو قومُونو کښې د دُنيا د يو سر نه تر بل سر پورې خوارۀ وارۀ کړى اؤ هلته به تاسو د هغه معبُودانو خِدمت کوئ چې د لرګى اؤ کاڼو نه جوړ وى، د هغه بُتانو چې د دې نه مخکښې نۀ تاسو اؤ نۀ ستاسو پلار‌نيکۀ د هغې عِبادت کړے وى.

⁶⁵په هغه قومُونو کښې به هيچرته تاسو ته آمن نۀ ملاوېږى، تاسو ته به يو ځائ کښې هم آرام نۀ ملاوېږى، مالِک خُدائ به ستاسو پرېشانى، نا‌اُميدى اؤ غم د حد نه زيات کړى.

⁶⁶ستاسو ژوند به همېشه په خطره کښې وى. شپه اؤ ورځ به تاسو يرېږئ اؤ تاسو به هر وخت د مرګ په يره کښې ژوند تېروئ.

⁶⁷تاسو چې هر څۀ هم ګورئ نو زړُونه به مو د يرې نه درزېږى. هر سحر به تاسو د ماښام آرمان کوئ، اؤ هر ماښام به تاسو د سحر آرمان کوئ.

⁶⁸مالِک خُدائ به تاسو په سمندرى جهاز کښې واپس مِصر ته ولېږى، اګرچې هغۀ وئيلى وُو چې تاسو به هيڅ کله هلته بيا نۀ ځئ. هلته به تاسو دا کوشش وکړئ چې خپل ځانُونه په دُښمنانو باندې غُلامان خرڅ کړئ، خو هيڅ څوک به تاسو نۀ اخلى.“