Read Pashto Bible (Yusufzai) — د پښتو مقدس کتاب تثنيه 31 Bible Online

تثنيه 31 - Pashto Bible (Yusufzai) — د پښتو مقدس کتاب bible

تثنيه 31

¹نو مُوسىٰ د اِسرائيليانو سره خپلې خبرې جارى وساتلې،

²اؤ وې وئيل چې، ”زۀ اوس د يو سل شلو کالو يم اؤ زۀ نور ستاسو د مشرۍ جوګه نۀ يم. اؤ مالِک خُدائ ما ته دا هم وئيلى دى چې زۀ به د اُردن نه پورې نۀ ووځم.

³مالِک خُدائ ستاسو خُدائ پاک به په خپله ستاسو نه مخکښې پورې وځى اؤ هغه قومُونه به تباه کړى چې هلته اوسېږى، نو تاسو به د هغوئ وطن قبضه کړئ، اؤ يشوَع به ستاسو مشر وى، لکه څنګه چې مالِک خُدائ وئيلى دى.

⁴مالِک خُدائ به هغه خلق هغه شان تباه کړى، لکه څنګه چې هغۀ د اموريانو بادشاهان سيحون اؤ عوج تباه کړى وُو اؤ د هغوئ وطن يې تباه کړو.

⁵مالِک خُدائ به تاسو له په هغوئ باندې فتح درکړى اؤ تاسو به د هغوئ سره خامخا هم هغه شان کار کوئ لکه څنګه چې ما درته وئيلى دى.

⁶تکړه اؤ زړَور اوسئ. د هغوئ نه مۀ يرېږئ. مالِک خُدائ ستاسو خُدائ پاک به په خپله ستاسو سره وى. هغه به تاسو نۀ ناکامه کوى اؤ نۀ به مو پرېږدى.“

⁷بيا مُوسىٰ يشوَع راوغوښتلو اؤ د ټولو اِسرائيليانو په مخکښې يې هغۀ ته ووئيل، ”تکړه اؤ زړَور اوسه، تۀ هغه کس يې چې د دې خلقو راهنمائى به کوې چې هغه وطن قبضه کړى چې مالِک خُدائ يې د هغوئ پلار‌نيکۀ سره وعده کړې ده.

⁸مالِک خُدائ به په خپله ستاسو لارښودنه کوى اؤ هغه به ستاسو سره وى. هغه به تاسو نۀ ناکامه کوى اؤ نۀ به مو پرېږدى، نو يرېږئ مه اؤ حوصله مۀ بائيلئ.“

⁹نو مُوسىٰ د خُدائ پاک قانُون وليکلو اؤ دا يې هغه ليوى اِمامانو، کُومو چې د مالِک خُدائ تړون صندُوق وړلو اؤ د اِسرائيليانو مشرانو له ورکړو.

¹⁰هغۀ هغوئ له حُکم ورکړو، ”د هر اوؤم کال په آخِر کښې يعنې کله چې د قرضُونو د معاف کولو کال راځى، نو د جُونګړو په اختر کښې دا په اُوچت آواز سره وايئ.

¹¹دا ټولو اِسرائيليانو ته وايئ کله چې هغوئ د مالِک خُدائ ستاسو خُدائ پاک د عِبادت د پاره، د عِبادت هغه يو ځائ ته راشى.

¹²سړى، ښځې، ماشُومان اؤ مُسافر چې ستاسو په ښارُونو کښې اوسېږى، دا ټول راوغواړه، چې هغوئ دا واورى اؤ د مالِک خُدائ ستاسو خُدائ پاک نه يرېدل ايزده کړى اؤ چې د هغۀ د قانُون په ټولو خبرو پُوره عمل کوى.

¹³نو ستاسو هغه اولاد چا چې هيڅ کله د مالِک خُدائ ستاسو خُدائ پاک قانُون نۀ دے اؤرېدلے نو هغوئ به يې واورى. نو هغوئ به د هغۀ فرمانبردارى ايزده کړى چې هغوئ په هغه وطن کښې تر کُومې پورې اوسېږى چې هغه د اُردن نه پورې دے اؤ تاسو يې قبضه کوئ.“

¹⁴بيا مالِک خُدائ مُوسىٰ ته ووئيل، ”ستا د مرګ ورځې رانزدې دى. يشوَع راوغواړه اؤ مُقدسې خېمې ته يې راوله، چې هلته هغۀ ته نصيحت وکړم.“ نو مُوسىٰ اؤ يشوَع خېمې ته لاړل،

¹⁵اؤ مالِک خُدائ هلته د وريځې د ستن په شکل کښې ظاهر شو چې د خېمې د دروازې په خُله کښې ولاړه وه.

¹⁶مالِک خُدائ مُوسىٰ ته ووئيل، ”ستا د مرګ نېټه پُوره کيدو والا ده اؤ د خپل پلار‌نيکۀ سره به يو ځائ شې اؤ ستا د مرګ نه پس به خلق زما نه نافرمانه شى اؤ هغه تړون به مات کړى چې ما د هغوئ سره کړے دے. هغوئ به ما پرېږدى اؤ د هغه وطن د غېرو معبُودانو عِبادت به وکړى چې کُوم ته هغوئ ورننوځى.

¹⁷نو بيا به زۀ هغوئ ته په قهر شم، زۀ به هغوئ پرېږدم اؤ هغوئ به تباه شى. ډېر سخت آفتُونه به په هغوئ راشى، نو هغوئ ته به پته ولګې چې په هغوئ باندې داسې ځکه کېږى چې زۀ يعنې خُدائ پاک نور د هغوئ مل نۀ يم.

¹⁸نو په هغه وخت به زۀ د هغوئ نه مخ واړوم، ځکه چې هغوئ به بد عمل کړے وى اؤ د نورو معبُودانو عِبادت به يې کړے وى.

¹⁹اوس دا سندره وليکه. دا د اِسرائيلو خلقو ته وښايه اؤ ور ايزده يې کړه، نو چې دا د هغوئ خِلاف د ګواه په شان وى.

²⁰زۀ به هغوئ هغه وطن ته بوځم چې زرخېز اؤ آباد دے، لکه څنګه چې ما د هغوئ د پلار‌نيکۀ سره وعده کړې ده. هغوئ چې کُوم خوراک غواړى نو هلته به ورته ملاوېږى اؤ هغوئ به په آرام سره ژوند تېروى. خو هغوئ به واوړى اؤ د نورو معبُودانو عِبادت به وکړى. زما نه به هغوئ مُنکر شى اؤ زما تړون به مات کړى،

²¹اؤ کله چې په هغوئ باندې سخت آفتُونه اؤ مُصيبتُونه راشى نو دا سندره به د هغوئ خِلاف ګواه وى، ځکه چې د هغوئ اولاد به دا نۀ هېروى، ما ته د هغوئ د ارادې پته ده چې هغوئ مې لا وعده کړى شوى وطن ته راوستلى هم نۀ دى.“

²²نو هم په هغه ورځ مُوسىٰ دا سندره وليکله اؤ په بنى اِسرائيلو باندې يې ايزده کړه.

²³بيا مالِک خُدائ د نون زوئ يشوَع سره خبرې وکړې اؤ ورته يې ووئيل، ”تکړه اؤ زړَور اوسه. تۀ به بنى اِسرائيل هغه وطن ته بوځې چې ما د هغوئ سره د هغې وعده کړې ده اؤ زۀ به ستا مل يم.“

²⁴مُوسىٰ د خُدائ پاک قانُون د اول نه تر آخره پورې د قانُون په کِتاب کښې وليکلو.

²⁵کله چې هغه اوزګار شو، نو هغۀ ليويانو اِمامانو ته ووئيل کُوم چې د مالِک خُدائ د تړون د صندُوق مشران وُو،

²⁶”د خُدائ پاک د قانُون دا کِتاب واخلئ اؤ د مالِک خُدائ ستاسو خُدائ پاک د تړون صندُوق په خوا کښې يې کېږدئ، چې دا د خپلو خلقو خِلاف د يو ګواه په شان وى.

²⁷ما ته پته ده چې هغوئ څومره ضدى اؤ سرکشه دى. هغوئ زما په ژوند کښې د مالِک خُدائ خِلاف بغاوت کړے دے اؤ زما د مرګ نه پس به هغوئ نور بغاوت هم کوى.

²⁸د قبيلو ټول مشران اؤ آفسران زما په وړاندې راغونډ کړئ، چې زۀ هغوئ ته دا خبرې وښايم، زۀ به آسمان اؤ زمکه د هغوئ خِلاف ګواهان جوړ کړم.

²⁹ما ته پته ده چې زما د مرګ نه پس به خلق بد عمله شى اؤ چې ما څۀ ورته ښودلى دى د هغې نه به مُنکر شى. اؤ په راتلُونکى وخت کښې به هغوئ د آفت سره مخامخ شى، ځکه چې هغوئ به مالِک خُدائ په قهر کړے وى د هغه کارُونو په وجه چې هغۀ منع کړى دى.“

³⁰بيا مُوسىٰ حمد ووئيلو اؤ د اِسرائيليانو ټول قوم ورته غوږ ايښے وو.