Read Pashto Bible (Yusufzai) — د پښتو مقدس کتاب تثنيه 34 Bible Online

تثنيه 34 - Pashto Bible (Yusufzai) — د پښتو مقدس کتاب bible

تثنيه 34

¹بيا مُوسىٰ د موآب د مېدانُونو نه د نبُو غرۀ ته وختلو، يعنې د پِسګه غر سر ته چې يريحو ته مخامخ دے، اؤ هلته مالِک خُدائ هغۀ ته هغه ټول وطن وښودلو : د دان ښار پورې د جِلعاد علاقه يې ورته وښودله،

²د نفتالى ټوله علاقه، د اِفرائيم اؤ منشه علاقې، د مديتران سيند پورې د يهُوداه علاقه،

³د صحرا برخه، اؤ هغه مېدان چې د ضُعر نه د يريحو پورې رسېږى، چې د کهجُورو د ونو ښار دے.

⁴بيا مالِک خُدائ مُوسىٰ ته ووئيل، ”دا هغه وطن دے چې ما د دې وعده د اِبراهيم، اِسحاق اؤ يعقُوب سره کړې ده چې د هغوئ اولاد له به يې ورکوم. ما د دې کتلو ته پرېښودې خو هلته تلو ته به دې نۀ پرېږدم.“

⁵نو چې څنګه مالِک خُدائ وئيلى وُو چې مُوسىٰ د مالِک خُدائ خِدمت کوُونکے به د موآب په وطن کښې مرى نو هم هغسې وشول.

⁶نو هغۀ هغه د بيت فعور ښار ته مخامخ د موآب په وطن کښې په يو مېدان کښې ښخ کړو، خو تر ننه پورې د هغۀ د ښخېدو صحيح ځائ پته هيچا ته نشته.

⁷مُوسىٰ د يو سل اؤ شلو کالو په عُمر کښې وفات شو، هغه په هغه وخت هم د مخکښې په شان تکړه وو اؤ د هغۀ د سترګو نظر ټيک وو.

⁸بنى اِسرائيل دېرش ورځې د موآب په مېدانُونو کښې په هغۀ پسې غمژن وُو،

⁹د نون زوئ يشوَع د اِلهامى حِکمت نه ډک شو، ځکه چې مُوسىٰ هغه مُقرر کړے وو چې د هغۀ په ځائ کار کوى. بنى اِسرائيلو د يشوَع تابعدارى وکړه اؤ هغه حُکمونه يې پُوره کړل چې مالِک خُدائ د مُوسىٰ په ذريعه هغوئ له ورکړى وُو.

¹⁰نو په اِسرائيليانو کښې هيڅ کله د مُوسىٰ په شان پېغمبر نۀ دے پېدا شوے، چې مالِک خُدائ مخامخ د هغۀ سره خبرې وکړې،

¹¹په ټولو اِسرائيليانو کښې د مُوسىٰ په شان بل يو پېغمبر نۀ هم وو چې په مِصر کښې د فِرعون، د هغۀ د ټولو درباريانو اؤ د هغۀ د ټول وطن خِلاف داسې مُعجزې اؤ عجيبه عجيبه کارُونه وکړى.

¹²بل يو پېغمبر هم داسې لوئ لوئ اؤ يروُونکى کارُونه نۀ دى کړى لکه چې مُوسىٰ د ټولو اِسرائيليانو په وړاندې وکړل.