Read Pashto Bible (Yusufzai) — د پښتو مقدس کتاب تثنيه 4 Bible Online

تثنيه 4 - Pashto Bible (Yusufzai) — د پښتو مقدس کتاب bible

تثنيه 4

¹بيا مُوسىٰ خلقو ته ووئيل، ”کۀ تاسو په هغه ټولو حُکمُونو عمل کوئ کُوم چې زۀ درته ښايم، نو تاسو به ژوندى پاتې شئ اؤ هغه وطن به قبضه کړئ چې مالِک خُدائ د ستاسو پلار نيکۀ خُدائ پاک يې تاسو له درکوى.

²زۀ چې تاسو له کُوم حُکم درکړم په هغې کښې مۀ څۀ زياتوئ اؤ مۀ څۀ کموئ. چې ما مالِک خُدائ ستاسو خُدائ پاک کُوم حُکمونه درکړى دى په هغې عمل کوئ.

³تاسو په خپله وليدل چې د فعور په غرۀ کښې مالِک خُدائ څۀ وکړل. هغۀ هغوئ ټول تباه کړل چا چې د بعل عِبادت کولو،

⁴خو ستاسو هغه کسان چې د مالِک خُدائ ستاسو د خُدائ پاک وفادار وُو، هغوئ تر نن ورځې پورې ژوندى پاتې دى.

⁵ما تاسو ته هغه ټول قانُون ښودلے دے، کُوم چې مالِک خُدائ زما خُدائ پاک ما ته ښودلے دے چې تاسو هغه قانُون په هغه وطن کښې پُوره کړئ چې د قبضه کولو د پاره ورباندې حمله کوئ.

⁶په وفادارۍ سره په دې عمل کوئ، نو د نورو قومُونو خلقو ته به پته ولګېږى چې تاسو څومره هوښيار خلق يئ. کله چې هغوئ د دې ټول قانُون نه خبر شى، نو هغوئ به ووائى، دا عظيم قوم څومره حِکمت اؤ پوهه لرى!

⁷بل داسې يو قوم هم نشته چې هغه هر څومره لوئ وى، چې د هغوئ داسې خُدائ وى چې په ضرُورت کښې ورته دومره نزدې وى لکه څومره چې مالِک خُدائ زمُونږ خُدائ پاک مُونږ ته نزدې دے. مُونږ چې کله هم د مدد د پاره هغۀ ته سوال وکړُو نو هغه زمُونږ سوال قبلوى.

⁸بل داسې يو قوم هم نشته چې هغه هر څومره لوئ وى، چې د هغوئ سره داسې د صداقت قانُون وى لکه چې نن ما تاسو ته ښودلے دے.

⁹پام کوئ! اؤ دا خبره يقينى کړئ چې تر کُومې پورې تاسو ژوندى يئ نو څۀ چې مو په خپلو سترګو ليدلى دى هغه مۀ هېروئ. خپل بچى اؤ نمسى د هغه ورځې نه خبر کړئ،

¹⁰چې تاسو د سينا په غرۀ باندې د مالِک خُدائ ستاسو خُدائ پاک په حضُور کښې ولاړ وئ، کله چې هغۀ ما ته ووئيل چې خلق راغونډ کړه. زۀ غواړم چې د هغوئ سره خبرې وکړم، نو چې تر کُومې پورې هغوئ ژوندى وى نو زما فرمانبردارى به ايزده کوى اؤ خپلو بچو ته به ښايئ چې هم دغسې کوى.

¹¹چې تاسو څنګه د غرۀ لمنې ته لاړئ اؤ هلته ودرېدئ په کُوم چې اور لګېدلے وو اؤ لمبې يې آسمان ته ختلې اؤ وريځ اؤ تکه توره تيارۀ شوه.

¹²هغوئ ته ووايئ چې مالِک خُدائ ستاسو سره څنګه د اور نه خبرې وکړې، تاسو څنګه د هغۀ خبرې واؤرېدلې خو د هغۀ صورت مو ونۀ ليدو.

¹³هغۀ تاسو ته ووئيل چې د هغه تړون پُوره کولو د پاره به څۀ کوئ، تاسو به په هغه لسو حُکمُونو عمل کوئ، کُوم چې د کاڼو په هغه دوه تختو باندې ليکلى وُو.

¹⁴مالِک خُدائ ما ته ووئيل چې تاسو ته هغه ټول قانُون وښايم چې په هغې به تاسو په هغه وطن کښې عمل کوئ چې په کُوم باندې تاسو حمله کوئ اؤ قبضه کوئ يې.

¹⁵کله چې مالِک خُدائ د سينا په غرۀ باندې د اور نه تاسو سره خبرې وکړې اؤ تاسو د هغۀ صورت ونۀ ليدو، نو خپلې فائدې د پاره پام کوئ چې

¹⁶په هر شکل کښې بُت جوړولو په وجه خپل ځانُونه ګُناهګار نۀ کړئ، کۀ هغه شکل د نر وى، يا د ښځې،

¹⁷د ځناور يا د مارغۀ،

¹⁸د داسې يو ځناور چې په زمکه تلل کوى يا کۀ په اوبو کښې د کب وى.

¹⁹په داسې آزمېښت کښې مۀ پرېوزئ چې څۀ په آسمان کښې ګورئ چې د هغې عِبادت يا خِدمت وکړئ، لکه نمر، سپوږمۍ اؤ ستورى. مالِک خُدائ ستاسو خُدائ پاک نورو ټولو خلقو ته دا ورکړى دى چې عِبادت يې کوى.

²⁰خو تاسو هغه خلق يئ چې مالِک خُدائ د مِصر نه راوويستلئ چرته چې تاسو د اور په تنور کښې وئ. هغۀ تاسو ځکه راوويستلئ چې هغه تاسو خپل خلق جوړ کړى لکه چې نن تاسو يئ.

²¹ځکه چې ستاسو په وجه مالِک خُدائ ستاسو خُدائ پاک ما ته غُصه وو اؤ دا قسم يې وخوړو چې تۀ به د اُردن سيند نه پورې نۀ وزې چې هغه آباد وطن ته ننوځې کُوم چې هغه تاسو له درکوى.

²²زۀ به په دې وطن کښې مړ شم اؤ هيڅ کله به د سيند نه پورې نۀ وځم، خو هغه وخت نِزدے دے چې تاسو به واوړئ اؤ هغه آباده زمکه به قبضه کړئ.

²³پام کوئ! مالِک خُدائ ستاسو خُدائ پاک چې ستاسو سره کُوم تړون کړے دے هغه مۀ هېروئ. د هغۀ حُکم منئ چې يو قِسم بُت هم مۀ جوړوئ

²⁴ځکه چې مالِک خُدائ ستاسو خُدائ پاک د يو بل شوى اور په شان دے، اؤ غېرتى خُدائ پاک دے.

²⁵تر دې پورې چې تاسو به په هغه وطن کښې تر ډېره وخته پورې يئ اؤ بچى اؤ نمسى به مو پېدا شى، د يو څيز په شکل هم بُت جوړولو په وجه خپل ځانُونه مۀ ګُناهګاروئ. د مالِک خُدائ په نظر کښې دا يو بد عمل دے اؤ د دې په وجه به هغه غُصه شى.

²⁶نن زۀ آسمان اؤ زمکه ستاسو خِلاف ګواهان جوړوم، کۀ تاسو زما نافرمانى وکړئ، نو تاسو به زر د زمکې نه ورک شئ. تاسو به په هغه وطن کښې ډېره موده ژوند ونۀ کړئ کُوم چې د اُردن نه پورې دے اؤ تاسو يې قبضه کوئ. تاسو به تباه شئ.

²⁷مالِک خُدائ به تاسو په نورو قومُونو کښې خوارۀ وارۀ کړى، هلته به صِرف يو څو کسان ستاسو نه ژوندى پاتې شى.

²⁸هلته به تاسو د داسې معبُودانو خِدمت کوئ چې اِنسان جوړ کړى وى، د لرګو اؤ د کاڼو معبُودان، هغه معبُودان چې نۀ ليدل اؤ نۀ اؤرېدل کولے شى، نۀ خوراک اؤ نۀ بويول کولے شى.

²⁹خو کۀ هلته تاسو مالِک خُدائ خپل خُدائ پاک ولټوئ اؤ د زړۀ د اِخلاصه اؤ د خپل ټول رُوح سره د هغۀ لټُون وکړئ نو تاسو به هغه ومُومئ.

³⁰کله چې تاسو په تکليف کښې يئ اؤ په تاسو باندې دا هر څۀ تېر شوى وى، نو آخِر به مالِک خُدائ ته راواپس شئ اؤ د هغۀ فرمانبردارى به وکړئ.

³¹هغه رحم کوُونکے خُدائ پاک دے. هغه به تاسو نۀ پرېږدى اؤ نۀ به مو تباه کوى اؤ هغه به هغه تړون نۀ هېروى چې کُوم هغۀ په خپله ستاسو پلار نيکۀ سره کړے دے.

³²تاريخ ته وګورئ! ستاسو د پېدايښت نه مخکښې وخت ته، وروستو د هغې زمانې پورې وګورئ کله چې مالِک خُدائ بنيادم په زمکه پېدا کړو. ټوله دُنيا ولټوئ. د دې په شان لوئ کار مخکښې کله هم شوے دے څۀ؟ آيا مخکښې چا د دې په شان څۀ اؤرېدلى دى؟

³³داسې څۀ خلق شته چې هغوئ د اور نه د يو خُدائ خبرې اؤرېدلې وى اؤ ژوندى پاتې وى لکه ستاسو په شان؟

³⁴بل خُدائ کله هم دا جُرات کړے دے چې د بل قوم نه خلق روان کړى اؤ بويے ځى اؤ هغوئ خپل خلق جوړ کړى، لکه څنګه چې مالِک خُدائ ستاسو خُدائ پاک ستاسو د پاره په مِصر کښې وکړل؟ ستاسو سترګو په وړاندې هغۀ د خپل لوئ طاقت اؤ قُوت نه کار واخستلو، هغۀ وباګانې اؤ جنګ راوستلو، مُعجزې اؤ نښې يې وښودلې اؤ يروُونکى کارُونه يې وکړل.

³⁵مالِک خُدائ تاسو ته دا وښودل چې دا ثابِته شى چې يواځې هغه خُدائ پاک دے اؤ بل يو هم نشته.

³⁶هغۀ په تاسو باندې د آسمان نه خپل آواز واؤرېدو چې هغه ستاسو تربيت وکړى، اؤ هغۀ دلته په زمکه باندې په تاسو خپل مُقدس اور وليدلو اؤ د دې نه يې تاسو سره خبرې وکړې.

³⁷ځکه چې هغۀ ستاسو پلار نيکۀ سره مينه کوله، هغۀ تاسو غوره کړئ اؤ د خپل لوئ طاقت سره هغۀ په خپله تاسو د مِصر نه راوويستلئ.

³⁸کله چې تاسو مخ په وړاندې روان وئ، نو هغۀ هغه قومُونه وشړل چې ستاسو نه لوئ اؤ طاقتور وُو، چې هغه تاسو د هغوئ وطن ته راولى اؤ در يې کړى، کُوم وطن چې تر اوسه پورې ستاسو دے.

³⁹نو نن دا خبره ياده ساتئ اؤ هيڅ کله يې مۀ هېروئ : مالِک خُدائ هغه خُدائ پاک دے چې په آسمان کښې اؤ لاندې په زمکه کښې موجُود دے. بل يو خُدائ هم نشته.

⁴⁰د هغۀ ټول قانُون ومنئ کُوم چې نن ما تاسو له درکړے دے، نو ستاسو اؤ ستاسو د اولاد به هر کار سم وى. په هغه وطن کښې به اوسېږئ کُوم چې مالِک خُدائ ستاسو خُدائ پاک همېشه د پاره تاسو له درکوى.“

⁴¹بيا مُوسىٰ د اُردن سيند نَمرخاتۀ طرف ته درې ښارونه بېل کړل.

⁴²کله چې څوک په غلطۍ سره داسې څوک ووژنى چې دُښمنى يې ورسره نۀ وى نو قاتِل به د دې ښارُونو نه يو ښار ته د پناه د پاره وتښتى اؤ خپل ژوند به بچ کړى.

⁴³د لوړې علاقې په بيابان کښې د بصر ښار، د روبين قبيلې د پاره وو، د جِلعاد په علاقې کښې، د رامات ښار د جاد قبيلې د پاره وو، د بسن په علاقه کښې، جولان د منشه قبيلې د پاره وو.

⁴⁴مُوسىٰ بنى اِسرائيلو ته د خُدائ پاک قانُون اؤ اصُول وښودل.

⁴⁵دا د هغې نه وروستو وُو چې هغوئ د مِصر نه راوتلى وُو اؤ هغوئ د اُردن سيند په نَمرخاتۀ طرف، بيت فعور ښار ته مخامخ په مېدان کښې وُو، چې هغوئ له يې دا قانُون ورکړو. دا په هغه علاقه کښې وُو کُومه چې د امورى بادشاه سيحون وه، هغۀ د حسبون په ښار کښې بادشاهى کوله. مُوسىٰ اؤ بنى اِسرائيل چې کله د مِصر نه راووتل نو هغۀ له يې شکست ورکړو.

⁴⁶

⁴⁷هغوئ د هغۀ اؤ د بسن بادشاه عوج په وطن قبضه وکړه، دا د اموريانو بل بادشاه وو چې د اُردن نَمرخاتۀ طرف ته اوسېدو.

⁴⁸دا وطن د ارنون سيند په غاړه، د عروعير ښار نه واخله، د سِريون غرۀ پورې خور وو، کُوم چې حرمون دے.

⁴⁹په دې کښې هغه ټوله علاقه هم شامِله وه چې د اُردن سيند نَمرخاتۀ طرف ته د مالګې درياب پورې وه اؤ د پِسګه د غرۀ تر لمنى پورې وه.