Read Pashto Bible (Yusufzai) — د پښتو مقدس کتاب تثنيه 6 Bible Online

تثنيه 6 - Pashto Bible (Yusufzai) — د پښتو مقدس کتاب bible

تثنيه 6

¹دا ټول هغه حُکمونه دى چې مالِک خُدائ ستاسو خُدائ پاک ما له حُکم راکړے دے چې تاسو ته يې وښايم. چې په هغه وطن کښې پرې عمل کوئ چې تاسو ورننه وځئ اؤ قبضه پرې کوئ.

²اؤ چې تر کُومې پورې تاسو، ستاسو بچى اؤ ستاسو نمسى ژوندى وى نو د مالِک خُدائ ستاسو خُدائ پاک نه خامخا يرېږئ. کۀ تاسو د هغۀ په ټول قانُون عمل وکړو کُوم چې زۀ تاسو له درکوم نو په هغه وطن کښې به ستاسو عُمر زيات شى.

³اے اِسرائيليانو، غوږ شئ! اؤ په دې حُکمُونو باندې عمل کوئ نو ستاسو هر کار به سم وى اؤ په هغه وطن کښې به مو ډېر اولاد پېدا شى چې زرخېز اؤ آباد دے، لکه څنګه چې مالِک خُدائ، ستاسو د پلار‌نيکۀ خُدائ پاک، تاسو سره وعده کړې ده.

⁴اے اِسرائيليانو! واورئ : مالِک خُدائ زمُونږ خُدائ پاک دے، مالِک خُدائ يو دے.

⁵مالِک خُدائ ستاسو خُدائ پاک سره د زړۀ د اِخلاصه، د خپل ټول رُوح سره اؤ د خپل ټول طاقت سره مينه کوئ.

⁶کُوم حُکمونه چې درکوم نو هغه په ياده ياد کړئ.

⁷خپلو بچو ته دا بيا بيا وريادوئ. کۀ په کور کښې ناست يئ يا په لاره روان يئ، چې څملئ يا پاڅئ، نو د دې په باره کښې د هغوئ سره خبرې کوئ.

⁸دا په خپلو مټو اؤ په خپلو تندو باندې وتړئ چې ستاسو د پاره د يادېدو د نښې په شان وى.

⁹دا د خپلو کورُونو په چوکاټُونو اؤ په خپلو دروازو باندې وليکئ.

¹⁰لکه څنګه چې مالِک خُدائ ستاسو خُدائ پاک ستاسو پلار‌نيکۀ، اِبراهيم، اِسحاق اؤ يعقُوب سره لوظ کړے دے، هغه به تاسو له لوئ لوئ اؤ ښائسته ښارونه درکړى کُوم چې تاسو نۀ وى جوړ کړى.

¹¹کورُونه به مو د ښو ښو څيزُونو نه ډک وى چې کُوم تاسو په کښې ايښى نۀ وى اؤ هلته به کُوهى وى چې تاسو کنستلى نۀ وى اؤ د انګُورو اؤ زيتُونو باغُونه به وى چې تاسو کَرلى نۀ وى. کله چې مالِک خُدائ تاسو دې وطن ته راولى اؤ د خوراک د پاره څۀ غواړئ نو هغه هر څۀ به تاسو ته ملاوېږى،

¹²نو پام کوئ چې مالِک خُدائ هېر نۀ کړئ کُوم چې تاسو د مِصر وطن نه راوويستلئ، چرته چې تاسو غُلامان وئ.

¹³مالِک خُدائ د خپل خُدائ پاک نه يرېږئ، صِرف د هغۀ عِبادت کوئ اؤ صِرف د هغۀ په نُوم قسم خورئ.

¹⁴د نورو معبُودانو عِبادت مۀ کوئ، د هغه خلقو د معبُودانو کُوم چې ستاسو په خوا اؤ شا کښې وى.

¹⁵ځکه چې مالِک خُدائ ستاسو خُدائ پاک کُوم چې تاسو سره اوسېږى، هغه يو غېرتى خُدائ پاک دے. د هغۀ غضب به په تاسو راشى اؤ هغه به د زمکې مخ نه تاسو ورک کړى.

¹⁶د مالِک خُدائ ستاسو خُدائ پاک آزمېښت مۀ اخلئ، لکه څنګه چې تاسو هغه په مَسه کښې وآزمائيلو.

¹⁷پام کوئ چې د هغۀ په ټول قانُون عمل کوئ کُوم چې هغۀ تاسو له درکړے دے.

¹⁸د مالِک خُدائ په نظر کښې چې څۀ صحيح اؤ ښۀ وى نو هم هغه کوئ، نو ستاسو هر يو کار به سم وى. تاسو به هغه آبادې زمکې ته ورننه وځئ اؤ ستاسو به شى چې مالِک خُدائ ستاسو پلار‌نيکۀ سره د هغې وعده کړې ده،

¹⁹اؤ لکه چې هغۀ څنګه وعده کړې ده، تاسو به خپل دُښمنان د هغه ځائ نه وشړئ.

²⁰په راتلُونکى زمانه کښې کله چې بچى درنه تپوس کوى چې مالِک خُدائ زمُونږ خُدائ پاک د دې ټول قانُون د منلو حُکم مُونږ له ولې راکړے دے؟

²¹نو هغوئ ته ووايئ چې مُونږ د مِصر د بادشاه غُلامان وُو اؤ مالِک خُدائ د خپل لوئ طاقت سره مُونږ بچ کړُو.

²²مُونږ په خپلو سترګو وليدل چې هغۀ مِصريانو، د هغوئ بادشاه اؤ د هغۀ ټولو آفسرانو ته خپلې مُعجزې اؤ يروُونکى کارُونه وښودل.

²³هغۀ مُونږ د مِصر نه آزاد کړُو چې دلته مو راولى اؤ دا وطن راکړى، لکه چې څنګه هغۀ زمُونږ پلار‌نيکۀ سره وعده کړې وه.

²⁴بيا مالِک خُدائ زمُونږ خُدائ پاک مُونږ ته حُکم وکړو چې د هغۀ په ټول قانُون به عمل کوُو اؤ د هغۀ درناوے به کوُو. کۀ مُونږ داسې وکړل نو زمُونږ قوم به همېشه د هغۀ د نظر لاندې وى اؤ کاميابى به زمُونږه وى.

²⁵کۀ مُونږ په وفادارۍ سره په هغه هر څۀ عمل وکړُو چې خُدائ پاک يې مُونږ ته حُکم کړے دے، نو هغه به زمُونږ نه رضا وى.