Read Pashto Bible (Yusufzai) — د پښتو مقدس کتاب تثنيه 8 Bible Online

تثنيه 8 - Pashto Bible (Yusufzai) — د پښتو مقدس کتاب bible

تثنيه 8

¹ما چې نن کُوم قانُون درکړے دے په هغه ټول په وفادارۍ سره عمل کوئ، نو چې داسې تاسو ژوندى پاتې شئ اؤ ودان شئ اؤ هغه وطن قبضه کړئ چې مالِک خُدائ د هغې وعده ستاسو پلار‌نيکۀ سره کړې ده.

²هغه راياد کړئ چې مالِک خُدائ ستاسو خُدائ پاک په تېرو څلوېښتو کالونو کښې څنګه په بيابان کښې په دې اُوږد سفر کښې ستاسو لارښودنه وکړه، په تاسو يې سختۍ راولېږلې چې په تاسو کښې عاجزى وى اؤ هغه تاسو وآزمائى، نو چې هغه په دې پوهه شى چې ستاسو په زړۀ کښې څۀ دى اؤ د هغۀ په حُکمُونو عمل کوئ اؤ کۀ نۀ.

³هغۀ په تاسو باندې عاجزى اؤ لوږه راوستله، نو بيا هغۀ تاسو له د خوراک د پاره من درکړل، هغه خوراک چې د دې نه مخکښې هيڅ کله ستاسو پلار‌نيکۀ هم نۀ وو خوړلے. هغۀ دا د دې د پاره وکړل چې تاسو ته وښائى چې بنيادم دې په دې يقين نۀ ساتى چې هغه صِرف په ډوډۍ ژوندے پاتې کېږى، خو په هغه خبره دې يقين ساتى چې د مالِک خُدائ د خُلې نه وځى.

⁴په دې څلوېښتو کالو کښې ستاسو جامې نۀ دى زَړې شوې اؤ نۀ مو خپې پړسېدلې دى.

⁵ياد لرئ چې مالِک خُدائ ستاسو خُدائ پاک ستاسو د اصلاح د پاره سزا درکوى لکه چې يو پلار خپلو بچو له تربيت ورکوى.

⁶نو بيا، هم هغه شان کوئ چې څنګه مالِک خُدائ حُکم درکړے دے : د هغۀ د قانُون په مُطابق ژوند تېروئ اؤ د هغۀ فرمانبردارى کوئ.

⁷مالِک خُدائ ستاسو خُدائ پاک تاسو هغه زرخېز وطن ته راولى، يو داسې وطن چې سيندُونه اؤ ولې په کښې وى چې د هغه چينو نه وتلې وى چې د درو اؤ غرُونو نه بهېږى،

⁸يو داسې وطن چې غنم، وربشې، انګُور، اينځر، انار، د زيتُونو تېل اؤ شات په کښې پېدا کېږى.

⁹هلته به هيڅ کله وږى نۀ شئ اؤ نۀ به مُحتاج شئ. د هغې په تيګو کښې اوسپنه شته دے اؤ د هغې غرُونو نه تاسو تانبه راويستلے شئ.

¹⁰تاسو چې د خوراک د پاره څۀ غواړئ هغه هر څۀ به درته ملاوېږى اؤ چې مالِک خُدائ ستاسو خُدائ پاک کُوم آباد وطن درکړے دے د هغې د پاره به تاسو د هغۀ شُکر ادا کړئ.

¹¹پام کوئ چې مالِک خُدائ ستاسو خُدائ پاک هېر نۀ کړئ، نن چې کُوم قانُون زۀ درکوم چې په هغې باندې عمل کولو کښې ناکام نۀ شئ.

¹²کله چې تاسو ته د خوراک د پاره هغه هر څۀ مِلاؤ شى چې تاسو يې غواړئ اؤ د اوسېدو د پاره ښائسته کورُونه جوړ کړئ

¹³کله چې ستاسو څاروى، ګډې، ستاسو سپين زر اؤ سرۀ زر اؤ ستاسو نور هر څيز زيات شى،

¹⁴نو دا خبره يقينى کړئ چې تاسو مغرُوره نۀ شئ اؤ مالِک خُدائ ستاسو خُدائ پاک هېر نۀ کړئ چې هغۀ تاسو د مِصر نه راوويستلئ، چرته چې تاسو غُلامان وئ.

¹⁵هغۀ تاسو د هغه لوئ اؤ يروُونکى بيابان په لاره بوتلئ چرته چې زهرژن ماران اؤ لړمان وُو. په هغه خُشکه اؤ تږې زمکه کښې هغۀ ستاسو د پاره د سختې تيګې نه اوبۀ روانې کړې.

¹⁶په بيابان کښې د خوراک د پاره هغۀ تاسو له من درکړل، هغه خوراک چې ستاسو پلار‌نيکۀ هيڅ کله نۀ وو خوړلے. هغۀ په تاسو سختۍ راولېږلې چې تاسو وآزمائى، نو چې داسې په آخِر کښې ستاسو هر څۀ سم شى.

¹⁷پام کوئ چې تاسو په خپل زړۀ کښې دا ونۀ وايئ چې په خپل طاقت اؤ قُوت سره تاسو خپل ځانُونه مالداره کړى دى.

¹⁸ياد لرئ دا مالِک خُدائ ستاسو خُدائ پاک دے چې هغۀ تاسو له د مالداره کېدو طاقت درکړے دے. هغه ځکه دا کوى چې هغه تر نن ورځ پورې وفادار دے چې په هغه تړون باندې ودرېږئ کُوم چې هغۀ ستاسو پلار‌نيکۀ سره کړے وو.

¹⁹هيڅ کله مالِک خُدائ ستاسو خُدائ پاک مۀ هېروئ اؤ نۀ چې نورو معبُودانو ته واوړئ چې د هغوئ عِبادت اؤ خِدمت وکړئ. کۀ تاسو داسې وکړل، نو زۀ نن تاسو له خبردارے درکوم چې بې‌شکه تاسو به تباه شئ.

²⁰کۀ چرې تاسو د مالِک خُدائ فرمانبردارى ونۀ کړئ، نو د هغه قومُونو په شان به تاسو تباه شئ کُوم چې مالِک خُدائ ستاسو خُدائ پاک ستاسو مخ په وړاندې تلو سره تباه کوى.