Read Pashto Bible (Yusufzai) — د پښتو مقدس کتاب رُوميانو 9 Bible Online

رُوميانو 9 - Pashto Bible (Yusufzai) — د پښتو مقدس کتاب bible

رُوميانو 9

¹رښتيا وايم ځکه چه زَۀ په مسيح پورے تعلق لرم، دروغ نۀ وايم، اَؤ زما خپل ضمير دَ رُوحُ القُدس په وسيله زما ګواه دے

²چه زما دَ قومى خپلوانو دَ خاطره زما په زړۀ کښے ډير غم اَؤ نۀ ختميدوُنکے دړد دے.

³ځکه چه زما خوښه ده چه زَۀ دِ دَ خپلو ورُوڼو دَ خاطره چه زما قومى خپلوان دى، لعنتى شم اَؤ دَ دوئ دَ پاره دِ زَۀ دَ مسيح نه جُدا شم.

⁴هغوئ اِسرائيليان دى اَؤ هغوئ دَ خُدائے بچى بللے شوى دى اَؤ دَ جلال حقدار اَؤ دَ وعدے، اَؤ شريعت اَؤ عبادت اَؤ لوظُونه ټول دَ هغوئ دى.

⁵دَ قوم بزرګان دَ هغوئ دى اَؤ دَ هغوئ نه په اِنسانى طور مسيح هم پيدا دے چه خُدائے دے اَؤ له ټولو نه اُوچت دے اَؤ تل تر تله دَ ثنا لائق دے، آمين.

⁶دا نامُمکنه ده چه دَ خُدائے کلام غلط ثابت شوے وى ځکه چه دَ يعقُوب ټول اَؤلاد غوره اِسرائيليان نۀ دى.

⁷اَؤ نۀ دَ اِبراهيم ټول اَؤلاد دَ خُدائے بچى دى، خو لکه چه صحيفے وائى چه : ”دَ اِسحاق په نسل کښے به ستا اَؤلاد پيدا کيږى.“

⁸مطلب دا چه هغوئ چه دَ جِسم په مُطابق وزيږيدل، هغوئ دَ خُدائے زامن نۀ دى بلکه دَ خُدائے دَ وعدے په مُطابق زيږدلى دَ اِبراهيم اَؤلاد بللے شى.

⁹ځکه چه وعده داسے وه چه ”په مُقرر وخت به زَۀ راځم اَؤ ساره به يو زوئے راؤړى.“

¹⁰خو خبره تر دے نۀ ده، ځکه چه دَ رِبقه دَ دوؤ زامنو يو پلار وو، يعنے زمُونږ نيکۀ اِسحاق

¹¹نو ربقے ته دَ هغوئ دَ زيږيدو نه آګاهو ووئيلے شول چه په هغه وخت کښے چه هغوئ لا هيڅ ښۀ يا بد نۀ وُو کړى، خو بيا هم دَ دے دَ پاره چه دَ خُدائے هغه ټاکلے مقصد تر سره شى کُوم چه دَ عمل په وسيله نۀ دے بلکه دَ خُدائے په بلنه،

¹²نو هغے ته وئيلى شوى وُو چه : ”مشر به دَ کشر خادم وى.“

¹³اَؤ دا په صحيفو کښے ليکلى دى چه : ”يعقُوب سره مے مينه وکړله اَؤ عيساؤ سره کينه.“

¹⁴نو په دے باب کښے مُونږ څۀ ووايُو؟ آيا خُدائے بے اِنصافه دے څۀ؟ هيڅ کله نه.

¹⁵لکه چه هغۀ مُوسىٰ ته ووئيل چه : ”په چا چه زَۀ رحم کوم، په هغه به ئے کوم اَؤ په چا چه زَۀ ترس کوم، په هغه به ئے کوم.“

¹⁶نو دا به بيا په خوښوُونکى يا کوُونکى پورے نۀ ده بلکه دَ خُدائے په رحم باندے ده.

¹⁷لکه چه صحيفه فرعون ته وائى چه : ”ما تۀ دَ دے مقصد دَ پاره پيدا کړے ئے چه په تا خپل قُدرت ښکاره کړم اَؤ چه زما نُوم په توله دُنيا کښے ښکاره شى.“

¹⁸دغه شان هغه دَ خپلے رضا په مُطابق په چا رحم کوى اَؤ بعضے سختوى هم.

¹⁹نو تۀ به ما ته وايئے چه بيا خُدائے سړے ولے ملامتوى ځکه چه دَ هغۀ دَ مرضئ مُخالفت څوک کولے شى؟

²⁰اَئے صاحبه! تۀ څوک يئے چه خُدائے ته به واپس جواب ورکوے؟ ”آيا يو لوښے کُلال ته دا وئيلے شى چه تا زَۀ په دے رنګ ولے ساز کړلم؟“

²¹بے شکه کُلال چه دَ خټے سره څۀ کول غواړى، هغه کولے شى. آيا هغه دَ مرضئ خاوند نۀ دے چه دَ دغه خاؤرے نه دوه لوښى جوړ کړى، يو دَ خاص اِستعمال دَ پاره اَؤ بل دَ عام اِستعمال دَ پاره؟

²²خو څۀ خبره ده، که دَ خُدائے مرضى وه چه خپل غضب وښائى اَؤ خپل طاقت څرګند کړى نو ځکه ئے دَ غضب هغه لوښو سره ډير صبر وکړو چه دَ ورک کيدو دَ پاره تيار شوى وُو،

²³له پاره دَ دے چه دَ خپلے لويئ دولت دَ رحم په لوښو څرګند کړى کُوم ئے چه اول دَ لويئ دَ پاره ساز کړى وُو.

²⁴هغه مُونږ يُو چه هغۀ نۀ يواځے دَ يهُوديانو نه خو هم ئے دَ غير يهُوديانو نه رابللى يُو.

²⁵لکه چه ئے دَ هوشع په کتاب کښے ليکلى دى چه : ”څوک چه زما اُمت نۀ وو، هغوئ ته به خپل اُمت ووايم، اَؤ کُوم قام چه محبُوب نۀ وو، هغۀ ته به خپل محبُوب ووايم.

²⁶ځکه چه په کُوم ځائے کښے چه هغوئ ته دا وئيلے شوى وُو چه تاسو زما اُمت نۀ يئ، هغوئ ته به دَ رب الحئ زامن ووئيلے شى.“

²⁷خو يشعياه دا خبره دَ بنى اِسرائيلو په حق کښے په چغو وائى چه : ”سره دَ دے چه بنى اِسرائيل به دَ سمندر دَ شګو په شان بے شميره وى، خو لږ به ئے خلاصُون ومُومى،

²⁸ځکه چه دَ رب په مزکه عدالت به لنډ اَؤ آخرى وى.“

²⁹لکه چه يشعياه وړاندے هم وئيلى وُو چه : ”که رب العاسکر مُونږ ته زمُونږ دَ نسل نه څۀ باقى نۀ وے پريښے نو مُونږ به دَ صدُوم دَ ښار په شان شوى وُو اَؤ دَ عُموره دَ ښار په حساب به راغلى وُو.“

³⁰نو بيا مُونږ څۀ ووايُو؟ چه غير يهُودى قومُونه چه دَ خُدائے سره دَ صادِق کيدلو کوشِش ئے ونۀ کړو خو هغۀ هغوئ دَ ايمان په وسيله صادِق کړل.

³¹خو بل پلو چه بنى اِسرائيلو چه دَ شريعت په وسيله دَ خُدائے سره دَ صادِق کيدلو کوشِش وکړو نو هغوئ کامياب نۀ شول.

³²داسے ولے وشول؟ دَ دے وجه دا وه چه دَ هغوئ کوشِش دَ ايمان په وسيله نۀ وو بلکه په عمل وو. هغوئ په کاڼى تيندک وخوړلو.

³³لکه چه صحيفے وائى چه : ”ګورئ، زَۀ دلته په صيُون کښے دَ تيندک يو کاڼے اَؤ دَ غورزولو دَ پاره يو ګټ ږدم، خو څوک چه په هغۀ ايمان لرى، هغه به شرمولے نۀ شى.“