Read Pashto Bible (Yusufzai) — د پښتو مقدس کتاب ګلتيانو 4 Bible Online

ګلتيانو 4 - Pashto Bible (Yusufzai) — د پښتو مقدس کتاب bible

ګلتيانو 4

¹خو زَۀ دا وايم چه وارث تر څو چه نابالغه دے، اګر که دے دَ ټول جايداد مالِک دے، په هغۀ اَؤ په غُلام کښے هيڅ فرق نۀ وى.

²خو کُوم ميعاد چه پلار مُقرر کړے دے تر هغے وخته هغه دَ سرپرستانو اَؤ مُختارانو دَ اِختيار لاندے وى.

³دغه شان مُونږ هم چه کله چه ماشُومان وُو نو دَ دُنيا دَ قوتُونو په پابندئ کښے دَ غُلامئ په حالت کښے مو ژوند تيروو.

⁴خو هر کله چه نيټه پُوره شوه نو خُدائے خپل زوئے راوليږلو چه دَ ښځے نه وزيږيدو اَؤ دَ شريعت دَ لاندے پيدا شو،

⁵دَ دے دَ پاره چه څوک چه دَ شريعت دَ لاندے وُو، په بيعه واخلى اَؤ آزاد ئے کړى، چه مُونږ دَ خُدائے زامن شُو.

⁶اَؤ په دے سبب چه تاسو دَ خُدائے زامن يئ خُدائے دَ خپل زوئے رُوح زمُونږ زړُونو ته راوليږلو کُوم چه دَ ”آبا،“ يعنے ”اَئے پلاره“ غږ کوى.

⁷نو اوس نور تۀ غُلام نۀ يئے بلکه زوئے يئے، اَؤ چه زوئے يئے نو دَ خُدائے وارث هم يئے.

⁸خو هغه وخت تاسو دَ خُدائے نه ناخبر وئ اَؤ تاسو دَ هغه معبُودانو په غُلامئ کښے وئ څوک چه خُدائے نۀ دى.

⁹خو اوس تاسو خُدائے وپيژندلو بلکه خُدائے تاسو وپيژندلئ، نو بيا دَ هغه زړو اَؤ بے ځايه اولنو خبرو پلو څنګه ورګرزئ، چه دَ هغوئ بيا غُلامى کول غواړئ؟

¹⁰تاسو خاص ورځے، مياشتے اَؤ مُقرر وختُونه اَؤ کالُونه منئ.

¹¹زَۀ ستاسو په باب کښے ربړيږم چه هسے نه چه کُومه خوارى چه ما په تاسو کړے ده هغه عبث لاړه شى.

¹²زما ورُوڼو! زَۀ درته منت کوم چه خپل ځانُونه زما په شان کړئ ځکه چه ما هم خپل ځان ستاسو په شان کړے دے. تاسو زما څۀ نقصان نۀ دے کړے.

¹³بلکه تاسو خبر يئ چه ما په اول ځل دَ ناجوړتيا په حالت کښے تاسو ته زيرے آؤرولے وو.

¹⁴اَؤ تاسو زما هغه جسمانى حالت کُوم چه ستاسو دَ آزمايش باعث وو، نۀ خو سپک وګڼلو، نۀ مو دَ هغۀ نه کرکه وکړه، اَؤ زَۀ مو دَ خُدائے فرښته وګڼلم لکه څنګه چه تاسو مسيح عيسىٰ ته په خپله هر کلے وئيلے وے.

¹⁵نو هغه وخت تاسو ډيره خوشحالى کړے وه، خو اوس هغه خوشحالى چرته ده؟ زَۀ ستاسو ګواه يم چه که کيدے شوے نو تاسو به خپلے سترګے راويستلے وے اَؤ ما ته به مو راکړے وے.

¹⁶نو آيا زَۀ دَ حق وئيلو په سبب ګنى ستاسو دُښمن شوے يم؟

¹⁷هغوئ تاسو دوستان خو جوړول غواړى خو په نيک نيتئ نه، بلکه هغوئ تاسو له ما نه جُدا کول غواړى دَ پاره دَ دے چه تاسو دَ هغوئ دَ دوستئ ليواله شئ.

¹⁸دا خو ښه خبره ده چه په ښه خبره کښے هر وخت دَ دوست جوړولو کوشِش وکړے شى، نۀ يواځے هغه وخت چه زَۀ ستاسو سره موجُود يم بلکه هغه وخت هم چه غير حاضر يم.

¹⁹ګرانو بچو! زَۀ يو ځل بيا ستاسو دَ پاره لکه د لنګانۀ په درد آخته يم، تر څو چه تاسو دَ مسيح په څير شوى نۀ يئ.

²⁰زړۀ مے غواړى چه زَۀ دِ اوس تاسو سره وَئے، نو ما به بيا خپل انداز بدل کړے وَئے ځکه چه زَۀ ستاسو په باب کښے پريشان يم.

²¹اوس راته ووايئ، تاسو چه دَ شريعت دومره ليواله يئ، آيا دَ شريعت خبره نۀ آؤرئ څۀ؟

²²ځکه چه دا په کښے ليکلى دى چه دَ اِبراهيم دوه زامن وُو، يو له وينځے نه اَؤ بل دَ آزادے ښځے نه.

²³خو دَ وينځے زوئے په عام طور، اَؤ دَ آزادے زوئے دَ خُدائے دَ لوظ په مُطابق پيدا شو.

²⁴دا يو مِثال دے اَؤ دا دوه ښځے دَ دوؤ لوظُونو په مِثال دى، يوه چه دَ سينا په غرۀ کړے شوے وه چه غُلامان پيدا کوى، اَؤ هاجره ئے نُوم دے.

²⁵اَؤ هاجره لکه دَ سينا غر په عربو کښے ده چه دَ موجوده بيتُ المُقدس په مِثال دے ځکه چه هغه اَؤ دَ هغے بچى په غُلامئ کښے دى.

²⁶خو دَ آسمانى بيتُ المُقدس هغه آزاده ده څوک چه زمُونږ مور ده.

²⁷ځکه چه صحيفے وائى چه : ”اَئے شنډے ښځے! خوشحالى وکړه! چا چه چرے هم بچى نۀ دى راوړى. دَ خوشحالئ چغے ووهه چا چه دَ لنګانۀ دړدُونه نۀ وُو زغملى. ځکه چه پريښولے ښځه به دَ هغے ښځے نه ډير بچى راؤړى چه خاوند لرى.“

²⁸نو اَئے زما ورُوڼو! تاسو دَ اِسحاق په شان دَ خُدائے دَ لوظ بچى يئ.

²⁹خو لکه څنګه چه په هغه ورځو کښے په عام طور پيدا شوى زوئے دَ خُدائے دَ رُوح په قُدرت پيدا شوے زوئے وربړولو، دغه شان نن هم دے.

³⁰خو صحيفے څۀ وائى چه : ”وينځه اَؤ دَ هغے زوئے وشړئ ځکه چه دَ وينځے زوئے به دَ آزادے دَ زوئے سره په ميراث کښے شريک نۀ شى.“

³¹نو زما ورُوڼو! تاسو اوس پوهه شئ چه مُونږ دَ وينځے بچى نۀ يُو، زمُونږ مور آزاده ده.