Read Pashto Bible (Yusufzai) — د پښتو مقدس کتاب کولوسيانو 1 Bible Online

کولوسيانو 1 - Pashto Bible (Yusufzai) — د پښتو مقدس کتاب bible

کولوسيانو 1

¹دَ پولوس له طرفه چه دَ خُدائے په رضا دَ مسيح عيسىٰ رسُول دے اَؤ زمُونږ ملګرى تيموتيوس له طرفه،

²په مسيح کښے هغه پاکو اَؤ ايماندارو ورُوڼو ته چه په کولوسى کښے دى. زمُونږ دَ پلار خُدائے له طرفه دِ په تاسو فضل اَؤ سلامتى وى.

³مُونږ ستاسو په حق کښے هميشه دُعا کوُو اَؤ دَ خپل مالِک عيسىٰ مسيح دَ پلار، يعنے دَ خُدائے شکر کوُو،

⁴ځکه چه مُونږ آؤريدلى دى چه ستاسو په مسيح عيسىٰ ايمان دے اَؤ دَ ټولو پاکانو سره مينه کوئ،

⁵دَ هغه اُميد په سبب چه ستاسو دَ پاره په آسمان اِنتظار کوى، چه ذکر ئے تاسو دَ زيرى دَ حق په کلام کښے آؤريدلے دے،

⁶نو تاسو دَ هغه اُميد په باب کښے واؤريدل. لکه چه دَ کُومے ورځے نه تاسو په اول ځل دَ خُدائے دَ فضل کلام واؤريدو اَؤ رښتُونے مو وګڼلو نو په تاسو کښے هم دغسے وده کوى لکه چه په ټول جهان کښے هم ميوه ورکوى اَؤ ترقى کوى.

⁷اَؤ تاسو دا پيغام زمُونږ دَ خوږ ملګرى اِپفراس نه زده کړے دے چه زمُونږ دَ پاره دَ مسيح اِتبارى خادم دے.

⁸هغۀ مُونږ ته وښوول چه رُوحُ القُدس په تاسو کښے څنګه مينه پيدا کړله.

⁹نو په دے وجه چه دَ کُومے ورځے نه مُونږ دا آؤريدلى دى، مُونږ هم دَ خُدائے نه ستاسو دَ پاره دَ دے په دُعا اَؤ خواست کولو کښے هميشه لګيا يُو چه تاسو دِ دَ ټولے رُوحانى پوهے اَؤ حِکمت سره دَ خُدائے دَ مرضئ دَ عِلم نه معمُور شئ،

¹⁰دَ دے دَ پاره چه ستاسو چال چلن دَ مالِک لايق وى اَؤ دَ هغۀ په هر شان خوښ شئ، اَؤ په تاسو کښے دَ هر قِسم نيک کار ميوه وشى، اَؤ دَ خُدائے په پيژندګلو کښے په لوئيدو شئ،

¹¹دَ هغۀ دَ جلال دَ قُدرت په مُطابق دَ هر قِسم قُوت سره مظبُوط شئ چه په خوشحالئ سره په هر شان سره صبر اَؤ زغم کولے شئ.

¹²اَؤ دَ هغه پلار شکر کوئ چا چه تاسو دَ دے جوګه کړئ چه دَ هغۀ په ميراث کښے حصه دار شئ. دا هغه ميراث دے چه دَ پاکانو سره به دَ هغه نُور په بادشاهت کښے برخه ولرئ.

¹³خُدائے مُونږ دَ تيارے دَ قبضے نه راخلاص کړلُو اَؤ دَ خپل محبُوب زوئے په بادشاهئ کښے ئے داخل کړلُو.

¹⁴په هغۀ کښے مُونږ ته فديه، يعنے دَ ګُناهُونو نه مُعافى حاصله ده.

¹⁵مسيح دَ ناليدلى خُدائے په عکس اَؤ دَ ټول مخلُوق نه اُوچت دے.

¹⁶ځکه چه دَ هغۀ په وسيله ټول څيزُونه پيدا کړے شول چه په آسمان کښے وى يا په مزکه، ليدُونکى وى يا ناليدُونکى، تختُونه وى يا رياستُونه يا حُکومتُونه يا اِختيارات، هر څۀ دَ مسيح په وسيله اَؤ دَ هغۀ دَ پاره پيدا شو.

¹⁷اَؤ دغسے مسيح دَ ټولو څيزُونو نه اول دے اَؤ ټول څيزُونه په هغۀ کښے قائم دى.

¹⁸اَؤ هغه دَ بدن، يعنے دَ جماعت سر دے، هغه ئے ازل دے، اَؤ دَ مړو نه بيا ژوندے کيدُونکو نه دَ ټولو نه اول پيدا شو دَ پاره دَ دے چه په ټولو خبرو کښے دَ هغۀ درجه اول وى.

¹⁹ځکه چه دَ خُدائے دا خوښه شوه چه دَ هغۀ ټول کامليت دِ په مسيح کښے پاتے شى.

²⁰اَؤ خُدائے دَ هغۀ دَ وينے په سبب چه په سولئ وبهيدله، صُلح وکړله اَؤ ټول څيزُونه ئے دَ هغۀ په وسيله دَ ځان سره پخلا کړل، آيا که هغه دَ مزکے وى يا که دَ آسمانُونو.

²¹اول تاسو پخپله هم دَ خُدائے نه لرے وئ اَؤ دَ هغۀ دُښمنان وئ ځکه چه ستاسو خيالُونه اَؤ کارُونه بد وُو.

²²خو اوس دَ مسيح دَ جسمانى مرګ په وسيله خُدائے تاسو سره پُخلا شو چه هغه تاسو مُقدس، بے عيبه اَؤ بے الزامه په خپل مخکښے حاضر کړى،

²³په دے شرط چه تاسو دَ ايمان په بُنياد مضبوط اَؤ ټينګ يئ اَؤ دَ هغۀ اُميد پرے نۀ ږدئ چه په زيرى آؤريدو سره ستاسو په زړُونو کښے پيدا شو. هغه زيرے ټول مخلُوقات ته واؤرولے شو، اَؤ زَۀ پولوس دَ هغۀ خادم شوم.

²⁴زَۀ اوس په هغه کړاوُونو کښے خوشحاله يم کُوم چه ستاسو دَ خاطره تيروم، اَؤ دَ مُصيبتُونو کمے دَ مسيح دَ بدن، يعنے دَ جماعت دَ خاطره په خپل وجُود کښے پُوره کوم.

²⁵دَ خُدائے دَ هغه اِنتظام په مُطابق زَۀ دَ جماعت خادم شوم چه ستاسو دَ پاره ما ته وسپارلے شو، دَ دے دَ پاره چه زَۀ دَ خُدائے دَ کلام پُوره پُوره پيغام ورکړم،

²⁶يعنے هغه راز چه دَ زمانو اَؤ دَ پيړيو راسے پټ وو خو اوس دَ هغۀ پاکانو ته ظاهر شو.

²⁷خُدائے پاکانو ته ظاهرول غوښتل چه دا بے حده شاندار اَؤ قيمتى راز دَ غير يهُوديانو دَ پاره هم دے، اَؤ هغه راز دا دے چه مسيح په تاسو کښے اوسيږى اَؤ هم هغه دَ راتلُونکى جلال اُميد دے.

²⁸مُونږ دَ هغۀ پيغام واؤروُو اَؤ هر چا له نصيحت کوُو اَؤ هر يو ته په پُوره هوښيارتيا تعليم ورکوُو چه مُونږ هر څوک په مسيح کښے کامل کړُو اَؤ پيش ئے کړُو.

²⁹اَؤ دَ دے دَ پاره زَۀ دَ مسيح دَ هغه قُوت په مُطابق دَ زړۀ سره خوارى کوم چه په ما کښے په زور اثر کوى.