Read Pashto Bible (Yusufzai) — د پښتو مقدس کتاب کولوسيانو 2 Bible Online

کولوسيانو 2 - Pashto Bible (Yusufzai) — د پښتو مقدس کتاب bible

کولوسيانو 2

¹زَۀ غواړم چه تاسو په دے پوهه شئ چه ستاسو دَ پاره اَؤ دَ لوديکيانو دَ پاره اَؤ دَ هغوئ ټولو دَ پاره چه ما په شخصى طور نۀ پيژنى، څومره خوارى کوم،

²دَ دے دَ پاره چه دَ هغوئ په زړُونو کښے تسلى پيدا شى اَؤ چه هغوئ په مينه کښے دَ يو بل سره تړلى وى اَؤ دَ پُوره پوهے سره ترقى وکړى، اَؤ داسے به دَ خُدائے راز يعنے مسيح وپيژنى.

³دَ حِکمت اَؤ معرفت ټولے خزانے په هغۀ کښے جمع دى.

⁴دا زَۀ دَ دے دَ پاره وايم چه څوک تاسو ته په خوږو خبرو دوکه درنۀ کړى.

⁵ځکه چه اګر که په وجُود کښے ستاسو نه لرے يم خو په رُوح کښے ستاسو سره يم، اَؤ زَۀ ستاسو په وجه خوشحاله يم ځکه چه زَۀ وينم چه تاسو باقاعده په خپل ايمان کښے چه په مسيح دے، قائم يئ.

⁶نو تاسو چه مسيح عيسىٰ په طور دَ خپل مالِک قبُول کړو، هم هغه شان دَ هغۀ په يووالى کښے ژوندُون تيروئ.

⁷اَؤ په هغۀ کښے دَ ونو په شان بيخ ولرئ دَ ماڼئ په شان په هغۀ بُنياد ولرئ، اَؤ څۀ رنګ چه تاسو تعليم آخستے دے، هم هغه شان په ايمان کښے مظبُوط اوسئ، اَؤ دَ خُدائے ډير شکر کوئ.

⁸دَ خپل ځان خيال ساتئ چه هيڅوک هم تاسو په خپل فلسفيانه اَؤ بے مطلبه ټګئ کښے ګير نۀ کړى، ځکه دا حِکمت دَ مسيح نۀ دے بلکه دَ اِنسانى رواياتو اَؤ دَ دُنيا دَ اِبتدائ خبرو په مُطابق دے.

⁹ځکه هر څۀ چه خُدائے دے، هم هغه شان مسيح په خپل اِنسانى حالت کښے په کامل طور هم هغه دے.

¹⁰اَؤ تاسو دَ مسيح په يووالى کښے کمال ته رسيدلى يئ چه دَ ټولو حُکومتُونو اَؤ اِختيارُونو سر دے.

¹¹اَؤ په هغۀ کښے تاسو داسے سُنت شوئ چه په لاس سره نۀ کيږى، يعنے دَ مسيح نه سُنت شوئ، يعنے دَ خپل ګُناه لړلى فطرت نه بچ شوئ.

¹²اَؤ تاسو دَ مسيح سره په بپتسمه کښے ښخ شوئ اَؤ په هغۀ کښے مو دَ هغه خُدائے په قوت ايمان راؤړو چه هغه ئے دَ مړو نه ژوندے کړو، اَؤ تاسو هم ورسره ژوندى شوئ.

¹³اَؤ هغۀ تاسو هم چه دَ خپلو ګُناهُونو اَؤ دَ وجُود دَ ناسُنتوالى په وجه مړۀ وئ، دَ هغۀ سره ژوندى کړئ اَؤ زمُونږ ټول ګُناهُونه ئے وبخښل.

¹⁴هر څۀ چه مُونږ دَ شريعت دَ حُکمُونو په خلاف قُصورُونه کړى وُو، هغه په يوه روزنامچه کښے ليکلى شوى وُو، هغۀ هغه دَ روزنامچے ليک په خپله وران کړو، يعنے هغه ئے په سولئ ټک وهلو، اَؤ زمُونږ دَ مخے نه ئے لرے کړلو.

¹⁵اَؤ هغه شان هغۀ دَ حکومتُونو اَؤ دَ اِختيار دَ خاوندانو وسلے واخستلے، يعنے دَ سولئ په سبب هغوئ له دَ ماتے ورکولو سره ئے دَ ټولو په مخکښے ماتے خوړلى دُښمنان څرګند کړل.

¹⁶نو هيڅوک هم دَ خوراک څښاک يا دَ اختر يا دَ نوے مياشت يا دَ سبت په حقله دِ په تاسو اِلزام ونۀ لګوى.

¹⁷ځکه چه دا دَ راتلُونکو څيزُونو سورے دے خو مسيح حقيقت دے.

¹⁸هيچا له موقعه مه ورکوئ چه څوک دِ خپل ځان په ښۀ ګڼلو تاسو مُجرم کوى. داسے خلق په خاص خاص کشفُونو ليدو سره بل مجبُوروى چه هغوئ خپل ځان عاجزان کړى اَؤ فرښتے خُدايان ومنى. داسے عاجزى رښتينى نۀ ده اَؤ داسے خلق دَ خپل عقل په خبرو بے فائدے وپړسيږى.

¹⁹داسے خلقو خپل روابط دَ مسيح سره، يعنے دَ سر سره پريښى دى. دَ مسيح په ټول وجُود اِختيار دے، اَؤ هغه وجُود دَ مسيح نه دَ طاقت مُوندلو په وسيله پلے، بندُونه اَؤ اندامُونو په يو بدن کښے يو ځائے کيږى. داسے هغه دَ خُدائے دَ مرضئ په مُطابق لوئيږى.

²⁰که تاسو دَ دُنيا دَ قُوتُونو په نسبت دَ مسيح سره مړۀ شوئ نو بيا تاسو ولے دَ هغوئ په شان ژوند تيروئ چه دَ دے دُنيا وى؟ اَؤ تاسو ولے دَ هغوئ حُکمُونه منئ،

²¹لکه ”دے له لاس مه وروړئ، دا مۀ څکئ اَؤ په دے مۀ بلوسيږئ؟“

²²دا ټول څيزُونه په اِستعمالولو کښے به ختم شى ځکه چه دا حُکمُونه اَؤ تعليمُونه اِنسان جوړ کړى دى.

²³داسے ښکارى چه دَ دے حُکمُونو بُنياد په حکمت کيښودے شوے دے، دَ مِثال په طور هغوئ دَ خپلے مرضئ په مُطابق عبادت کوى اَؤ دَ دروغو عاجزى ښکاره کوى اَؤ دَ فقيرانو په شان په ځان سختے تيروى، خو داسے حُکمُونه بے فائدے دى ځکه چه هغوئ دَ نفسانى شوقُونو په قابو مُوندلو هيڅ فائده نۀ ورکوى.