Read Pashto Bible (Yusufzai) — د پښتو مقدس کتاب تِسالونيکانو اول 5 Bible Online

تِسالونيکانو اول 5 - Pashto Bible (Yusufzai) — د پښتو مقدس کتاب bible

تِسالونيکانو اول 5

¹نو اَئے ورُوڼو! دَ دے خبرے هيڅ حاجت نِشته چه دَ وختُونو اَؤ دَ موقعو په بابت تاسو ته څۀ وليکلے شى،

²ځکه چه تاسو په خپله په دے ښۀ پوهيږئ چه دَ مالِک دَ راتلو ورځ دغه شان راتلُونکے ده لکه چه دَ شپے غل راځى.

³څۀ وخت چه به خلق وائى چه ”سلامتيا اَؤ امن دے“ هم هغه وخت به په دوئ دغه شان ناڅاپى هلاکت راشى لکه اُميدواره ښځه چه په دړدونو کښے شى، اَؤ هغوئ به هيڅ کله بچ نۀ شى.

⁴خو تاسو اَئے ورُوڼو! په تيارۀ کښے نۀ يئ چه هغه ورځ به په تاسو په حيرانتيا لکه دَ غل راشى.

⁵ځکه چه تاسو ټول دَ نُور اَؤ دَ ورځے يئ، مُونږ نۀ دَ شپے يُو اَؤ نۀ دَ تيارے.

⁶نو دَ نورو په شان اُوده پاتے نۀ شُو بلکه ويښ اَؤ بيدار اوسُو.

⁷ځکه چه څوک چه اُودۀ کيږى هغه په شپه کښے اُودۀ کيږى، اَؤ څوک چه نشه کيږى هغه په شپه کښے نشه کيږى.

⁸خو مُونږ چه دَ ورځے يُو مُونږ بايد بيدار اوسُو، اَؤ دَ ايمان اَؤ دَ مينے زغره آغوستے اَؤ دَ خلاصون دَ اُميد ټوپئ په سر کړُو.

⁹ځکه چه خُدائے مُونږ دَ غضب دَ پاره نه، بلکه دَ دے دَ پاره مُقرر کړى يُو چه مُونږ دَ خپل مالِک عيسىٰ مسيح په وسيله خلاصُون بيا مُومُو.

¹⁰اَؤ هغه زمونږ دَ خاطره ځکه مړ شو چه که مُونږ بيدار يُو يا که اُودۀ، ټول دَ هغۀ سره ژوند تير کړُو.

¹¹نو تاسو يو بل ته تسلى ورکړئ اَؤ دَ يو بل دَ ترقئ سبب جوړ شئ، اَؤ بے شکه چه تاسو داسے کوئ هم.

¹²اَؤ اَئے ورُوڼو! مُونږ تاسو ته خواست کوُو، څوک چه په تاسو کښے خوارى کوى اَؤ په مالِک کښے تاسو ته لار ښوُونکى وى اَؤ تاسو ته نصيحت کوى دَ هغوئ قدر کوئ.

¹³اَؤ دَ هغوئ دَ کار په سبب په مينه دَ هغوئ عزت کوئ، اَؤ په خپلو کښے صُلح لرئ.

¹⁴اَؤ اَئے ورُوڼو! مُونږ درته دا نصيحت کوُو چه سُستو خلقو ته خبردارے ورکوئ، کم همتو ته دلاسه ورکوئ اَؤ کمزورى راټينګوئ، ټولو سره زغم کوئ.

¹⁵ګورئ چه څوک دَ بدئ په بدله کښے بدى ونۀ کړى بلکه هميشه په نيکئ پسے ګرزئ، دَ يو بل سره اَؤ دَ نورو سره هم.

¹⁶هر وخت خوشحاله اوسئ.

¹⁷په دعا کښے ناغه مه کوئ.

¹⁸اَؤ په هر حال کښے شکر کوئ ځکه چه په عيسىٰ مسيح کښے ستاسو په حقله دَ خُدائے دغه رضا ده.

¹⁹دَ رُوحُ القُدس دَ اثر لرے کولو کوشِش مۀ کوئ.

²⁰دَ نبوتُونو سپکاوے مه کوئ.

²¹ټولے خبرے آزميئ اَؤ چه کُومے خبرے ښے وى هغه راټينګوئ.

²²دَ هر قِسم بدئ نه ځان ساتئ.

²³خُدائے چه دَ سلامتئ سر چينه دے تاسو دِ په خپله بلکل پاک کړى، اَؤ ستاسو رُوح اؤ ځان اَؤ تن دِ زمُونږ دَ مالِک عيسىٰ مسيح تر راتلو پورے پُوره بے عيبه وساتى.

²⁴ستاسو رابلُونکے رښتُونے دے، هغه به هم دغسے کوى.

²⁵اَئے ورُوڼو! زمُونږ دَ پاره دُعا کوئ.

²⁶په پاکه مينه يو بل ښکل کړئ اَؤ ټولو وروڼو ته زمُونږ سلام ووايئ.

²⁷زَۀ تاسو ته دَ مالِک په نُوم حُکم درکوم چه دا خط ټولو ورُوڼو ته واؤروئ

²⁸زمُونږ دَ مالِک عيسىٰ مسيح فضل دِ تاسو سره وى.