Read Pashto Bible (Yusufzai) — د پښتو مقدس کتاب يوشع 1 Bible Online

يوشع 1 - Pashto Bible (Yusufzai) — د پښتو مقدس کتاب bible

يوشع 1

¹د مالِک خُدائ خِدمت کوُونکى موسىٰ د مرګ نه پس مالِک خُدائ د موسىٰ مددګار د نون زوئ يشوَع سره کلام وکړو.

²هغۀ ووئيل، ”زما خِدمت کوُونکےموسىٰ مړ دے نو اوس تۀ او اِسرائيليان تيار شئ او د اُردن د سيند نه پورې غاړه هغه زمکې ته واوړئ چې زۀ به يې تاسو له درکوم.

³چې زۀ به هر هغه ځائ تاسو له درکوم چې چرته تاسو قدم ږدئ هم هغه شان لکه څنګه چې ما د موسىٰ سره وعده کړې وه.

⁴ستاسو علاقه به په جنوب کښې د بيابان نه واخله په شمال کښې د لبنان غرونو پورې، نَمرخاتۀ طرف د فرات د لوئ سيند نه واخله، نمرپرېواتۀ طرف ته د مديتران سيند پورې خوره وى چې په دې کښې به د حِتيانو ټول مُلک شامِل وى.

⁵يشوَع چې تر کومې پورې تۀ ژوندې يې هيڅ څوک به تا له شکست نۀ شى درکولے. زۀ به ستا هغه شان مل يم لکه څنګه چې د موسىٰ مل وم. زۀ به همېشه تا سره يم او هيڅ کله به دې نۀ پرېږدم.

⁶تکړه او زړۀور اوسه ځکه کله چې دوئ هغه زمکه قبضه کوى نو تۀ به د هغوئ مشر يې چې ما د دوئ پلار نيکۀ سره د هغې لوظ کړے وو.

⁷تکړه او زړۀور اوسه او په هغه ټول شريعت باندې عمل کوه چې زما خِدمت کوُونکى موسىٰ تا له درکړے دے. د هغې نه يو خوا بل خوا مۀ اوړه او بيا چې هر چرته هم تۀ ځې نو کامياب به يې.

⁸ستاسو په خولهٔ باندې دې د شريعت د کِتاب خبرې وى. شپه او ورځ په دې غور کوئ. او چې په دې کښې څۀ ليکلى دى نو په هغې ښۀ عمل کوئ. نو تاسو به کامياب يئ.

⁹دا ياد ساته چې ما تا ته حُکم کړے وو چې تکړه او زړۀور اوسه! يريږه مه او چې بې‌حوصلې نۀ شې، ځکه چې تۀ هر چرته هم ځې نو زۀ مالِک خُدائ ستا خُدائ پاک به ستا مل يم.“

¹⁰بيا يشوَع مشرانو له حُکم ورکړو چې،

¹¹”کېمپ ته لاړ شئ او خلقو ته ووايئ چې، څۀ خوراک تيار کړئ ځکه چې درې ورځې پس به تاسو د اُردن سيند نه واوړئ او هغه مُلک به قبضه کړئ چې مالِک خُدائ ستاسو خُدائ پاک يې تاسو له درکوى.“

¹²يشوَع د روبين، جاد او د منسى نيمې قبيلې ته ووئيل،

¹³”هغه څۀ مۀ هېروئ چې د مالِک خُدائ خِدمت کوُونکى موسىٰ تاسو ته وئيلى وُو چې، مالِک خُدائ ستاسو خُدائ پاک به تاسو له د آرام ځائ درکړى او هغه به تاسو له دا زمکه درکړى.

¹⁴ستاسو ښځې، ماشومان او څاروى به په هغه زمکه باندې پاتې شى چې موسىٰ د اُردن سيند بلې غاړې ته تاسو له درکړې ده. خو ستاسو تکړه لښکر به سره د وسلحې د بنى اِسرائيلو وروڼو د مدد دپاره مخکښې روان وى،

¹⁵تر دې چې مالِک خُدائ هغوئ او تاسو له هم آرام درکړى او چې هغوئ هغه زمکه ونيسى چې مالِک خُدائ ستاسو خُدائ پاک هغوئ له ورکړې ده. نو بيا به تاسو خپل هغه مُلک ته راشئ او قبضه به يې کړئ چې د اُردن سيند نه اخوا نَمرخاتۀ طرف ته دے، کوم چې د مالِک خُدائ خِدمت کوُونکى موسىٰ تاسو له درکړے دے.“

¹⁶هغوئ يشوَع ته ووئيل، ”مونږ به هغه هر څۀ کوُو چې تۀ يې مونږ ته حُکم کوې او هر چرته مو چې لېږې نو مونږ به ځُو.

¹⁷مونږ به ستا په خبره عمل کوُو لکه څنګه مو چې همېشه د موسىٰ خبره منلې ده. او مالِک خُدائ ستا خُدائ پاک دې ستا هغه شان مل وى لکه څنګه چې هغه د موسىٰ مل وو.

¹⁸او څوک هم چې ستا د حُکمونو نه بغاوت کوى او ستا په خبرو باندې عمل نۀ کوى نو مړ به کړے شى. نو بس تۀ تکړه او زړۀور اوسه.“