Read Pashto Bible (Yusufzai) — د پښتو مقدس کتاب يوشع 12 Bible Online

يوشع 12 - Pashto Bible (Yusufzai) — د پښتو مقدس کتاب bible

يوشع 12

¹بنى اِسرائيلو دوو بادشاهانو له شکست ورکړو، نو د اُردن نَمرخاتۀ طرف ته، د ارنون وادۍ نه واخله د اُردن تر وادۍ پورې او هم داسې په شمال کښې د حرمون غر پورې ټول مُلک يې فتح کړے وو او قبضه يې پرې کړې وه.

²يو امورے بادشاه سيحون وو چې هغۀ به په حسبون باندې بادشاهى کوله. د هغۀ په بادشاهۍ کښې نيم جِلعاد شامِل وو: د عروعير نه واخله چې د ارنون وادۍ په غاړه وو او د هغه وادۍ په مينځ کښې ښار او هم داسې د يبوق سيند پورې چې دا د عمون سرحد وو،

³په دې کښې د اُردن وادى يعنې په جنوب کښې د ګليل ډنډ نه واخله د مړ درياب نَمرخاتۀ طرف تر بيت يسيموت پورې او د پِسګه غر د لمنو پورې علاقې شامِلې وې.

⁴هغوئ د بسن بادشاه عوج له هم شکست ورکړو، چې هغه د رفائيم آخرى بادشاه وو، هغۀ په عستارات او ادرعى باندې بادشاهى کوله.

⁵د هغۀ په بادشاهۍ کښې د حرمون غر، سلکه او د جسور سرحدونو پورې ټول بسن او معکه او نيم جِلعاد او هم داسې د حسبون بادشاه سيحون د علاقې پورې مُلک په کښې شامِل وو.

⁶موسىٰ او بنى اِسرائيلو دې دوو بادشاهانو له شکست ورکړے وو. د مالِک خُدائ خِدمت کوُونکى موسىٰ د هغوئ مُلک د روبين، جاد او د منسى نيمې قبيلې له د دې دپاره ورکړے وو چې د هغوئ خپل ميراث شى.

⁷نو يشوَع او بنى اِسرائيلو د اُردن نمرپرېواتۀ طرف ته دې ټولو بادشاهانو له شکست ورکړو چې په دې کښې د لبنان وادۍ بعل جاد نه واخله په جنوب کښې د ادوم سره نزدې د خلق غر پورې علاقې شامِلې وې. يشوَع دا مُلک په قبيلو باندې تقسيم کړو او دا يې ورکړو چې پوخ ميراث يې شى.

⁸په دې حِصه کښې د غرونو مُلک، نمرپرېواتۀ طرف ته د غرونو لمنې، د اُردن وادى او د دې لمنې، نَمرخاتۀ طرف ته کُوز مُلک او په جنوب کښې خُشک مُلک شامِل وو. په دې مُلک کښې حِتيان، اموريان، کنعانيان، فارصيان، حِويان او يبوسيان اوسېدل.

⁹بنى اِسرائيلو د دې ښارونو بادشاهانو له شکست ورکړو: يريحو، عى چې بيت‌اېل ته نزدې وو،

¹⁰يروشلم، حبرون،

¹¹يريموت، لکيس،

¹²عجلون، جزر،

¹³دبير، جدر،

¹⁴حُرمه، عراد،

¹⁵لِبناه، عدولام،

¹⁶مقيده، بيت‌اېل،

¹⁷تفوح، حِفر،

¹⁸افيق، لشرون،

¹⁹مدون، حصور،

²⁰سِمرون مرون، اکشاف،

²¹تعنک، مِجدو،

²²قادِس، يقنِعام چې په کرمل کښې وو،

²³دور چې د سمندر په غاړه وو، جوئيم، چې په ګليل کښې وو،

²⁴او تِرضاه. دا ټول يو دېرش بادشاهان وُو.