Read Pashto Bible (Yusufzai) — د پښتو مقدس کتاب يوشع 13 Bible Online

يوشع 13 - Pashto Bible (Yusufzai) — د پښتو مقدس کتاب bible

يوشع 13

¹اوس يشوَع ډېر بوډا شوے وو. مالِک خُدائ هغۀ ته ووئيل، ”تۀ ډېر بوډا شوے يې خو تر اوسه پورې په ډېره علاقه باندې قبضه کول پاتې دى:

²د فلستيانو او جسوريانو ټوله علاقه،

³او ورسره په جنوب کښې د عويانو ټوله علاقه. د مِصر سرحد سره د سيحور نِهر نه واخله په شمال کښې د عقرون سرحد پورې علاقه د کنعانيانو ګڼلے شوه، او د فلستيانو بادشاهان په غزه، اشدود، اسقلون، جات او عقرون کښې اوسېدل.

⁴تر اوسه پورې د کنعانيانو او معاره ټول مُلک هلته دے کوم چې د صيدانيانو دے او هم داسې د امورى سرحد افيق پورې،

⁵د جبليانو مُلک، نَمرخاتۀ طرف ته ټول لبنان، د بعل جاد نه چې د حرمون غر جنوب طرف ته ده د حمات درې پورې.

⁶په دې کښې د هغه صيدانيانو ټوله علاقه شامِله ده کوم چې د لبنان د غرونو او مسرفات المائم په مينځ کښې د غرونو په مُلک کښې اوسېږى. کله چې اِسرائيليان مخ په وړاندې ځى نو زۀ به دا ټول خلق وشړم. لکه څنګه چې ما حُکم درکړے دے نو تۀ به هغه مُلک په بنى اِسرائيلو باندې تقسيم کړې.

⁷نو اوس دا زمکه په هغه نورو نهو قبيلو او د منسى په نيمه قبيله باندې تقسيم کړه چې د هغوئ خپل ميراث شى.“

⁸د روبين، جاد او د منسى نيمې قبيلې د مخکښې نه هغه زمکه اخستې وه کومه چې موسىٰ، د خُدائ پاک خِدمت‌ګار هغوئ له ورکړې وه، دا د اُردن سيند نَمرخاتۀ طرف ته وه.

⁹د هغوئ علاقه د ارنون وادۍ په غاړه تر عروعير او د هغه وادۍ په مينځ کښې ښار پورې خوره شوه او په دې کښې د ميدبا نه واخله تر ديبون پورې ټولې اُوچتې علاقې شامِلې وې.

¹⁰دا د عمون سرحد پورې لاړه او هغه ټول ښارونه په کښې شامِل وُو په کومو باندې چې امورى بادشاه سيحون حکومت کړے وو، چې هغۀ په حسبون کښې بادشاهى کړې وه.

¹¹په دې کښې د جلعاديانو، د جسوريانو او د معکيانو علاقې، د حرمون ټول غر او تر سلکه پورې ټول بسن شامِل وو.

¹²په کښې د عوج بادشاهى هم شامِله وه کوم چې د رفائيم آخرى بادشاه وو، چې هغۀ په عستارات او ادرعى باندې بادشاهى کړې وه. موسىٰ دې خلقو له شکست ورکړے وو او هغوئ يې شړلى وُو.

¹³خو بنى اِسرائيلو د جسور او معکه خلق نۀ وُو شړلى، هغوئ تر اوسه پورې د بنى اِسرائيلو سره اوسېږى.

¹⁴موسىٰ د ليوى قبيلې له په ميراث کښې هيڅ زمکه نۀ وه ورکړې. لکه څنګه چې مالِک خُدائ موسىٰ ته وئيلى وُو چې ليويانو ته به د خپلې برخې په توګه هغه قربانۍ ملاوېږى کومې چې مالِک خُدائ د بنى اِسرائيلو خُدائ پاک ته په قربان‌ګاه باندې سوزولے شى.

¹⁵موسىٰ د هغه مُلک يوه حِصه د روبين د قبيلې کورَنو له ورکړې وه چې د هغوئ ميراث شى.

¹⁶د هغوئ علاقه د ارنون وادۍ په غاړه د عروعير پورې او د هغه وادۍ تر مينځ پورې خوره وه او په دې کښې د ميدبا نه ګېرچاپېره ټولې اُوچتې علاقې شامِلې وې.

¹⁷په دې کښې حسبون او د اُوچتې علاقې ټول ښارونه شامِل وُو: ديبون، بامات بعل، بيت بعل معون،

¹⁸يهض، قديمات، مفعت،

¹⁹قريتيم، شِبمعاه او په وادۍ کښې په غر باندې ضرة سحر،

²⁰بيت فعو، د پِسګه غر ښکته علاقې او بيت يسيموت.

²¹په دې کښې د اُوچتې علاقې ټول ښارونه او د امورى بادشاه سيحون ټول مُلک شامِل وو، امورى بادشاه سيحون په حسبون بادشاهى کړې وه. موسىٰ هغۀ له او دغسې د ميديان دې حُکمرانانو له هم شکست ورکړو: عوى، رِقم، صور، حُور او رِبع. د سيحون په مُلک کښې دې ټولو بادشاهانو حکومت کړے وو.

²²کوم خلق چې بنى اِسرائيلو ووژل په هغې کښې د بعور زوئ بلعام فال کتُونکے هم شامِل وو.

²³نمرپرېواتۀ طرف ته د اُردن سيند د روبين قبيلې سرحد وو. دا هغه ښارونه او کلى وُو چې د روبين قبيلې کورَنو له ورکړے شوى وُو چې د هغوئ خپل ميراث شى.

²⁴موسىٰ د هغه مُلک يوه حِصه د جاد قبيلې کورَنو له هم ورکړې وه چې د هغوئ خپل ميراث شى.

²⁵د هغوئ په علاقه کښې يعزير او د جِلعاد ټول ښارونه، د عروعير پورې د عمونيانو نيم مُلک شامِل وو، کوم چې د ربه نَمرخاتۀ طرف ته دے،

²⁶د هغوئ مُلک د حسبون نه تر رامت مصفاه او بطونيم پورې او د محنايم نه تر دبير سرحد پورې خور وو.

²⁷د اُردن په وادۍ کښې په دې کښې بيت هارم، بيت نِمره، سکات، صفون او د حسبون بادشاه سيحون باقى پاتې بادشاهى شامِله وه. د هغوئ نمرپرېواتۀ طرف ته سرحد د ګليل ډنډ پورې د اُردن سيند وو.

²⁸دا هغه ښارونه او کلى وُو کوم چې د جاد قبيلې کورَنو له ورکړے شوى وُو چې د هغوئ خپل ميراث شى.

²⁹موسىٰ د هغه مُلک يوه حِصه د منسى نيمې قبيلې کورَنو له ورکړې وه چې د هغوئ خپل ميراث شى.

³⁰د هغوئ علاقه تر محنايم پورې خوره وه او په دې کښې ټول بسن، د بسن بادشاه عوج ټوله بادشاهى او هم داسې په بسن کښې د يائير ټول شپېتۀ کلى هم شامِل وُو.

³¹په کښې نيم جِلعاد او هم داسې عستارات او ادرعى، په بسن کښې د عوج په بادشاهۍ کښې ښارونه هم شامِل وُو. دا ټول د منسى زوئ مکير اولاد نيمو کورَنو له ورکړے شوى وُو.

³²کله چې موسىٰ د موآب په مېدانونو کښې وو نو هغۀ د يريحو نَمرخاتۀ طرف ته او د اُردن مُلک داسې تقسيم کړو.

³³خو موسىٰ ليوى قبيلې له په ميراث کښې هيڅ هم ورنۀ کړل. ځکه چې مالِک خُدائ د بنى اِسرائيلو خُدائ پاک د هغوئ ميراث دے لکه څنګه چې هغۀ ورسره وعده کړې وه.