Read Pashto Bible (Yusufzai) — د پښتو مقدس کتاب يوشع 16 Bible Online

يوشع 16 - Pashto Bible (Yusufzai) — د پښتو مقدس کتاب bible

يوشع 16

¹د يوسف اولاد ته چې کوم مُلک حواله شوے وو د هغې جنوبى سرحد د يريحو سره نزدې د اُردن نه شروع شوے وو، دا هغه ځائ وو چې د يريحو چينو نَمرخاتۀ طرف ته وو او صحرا ته تلے وو. دا د يريحو نه تلے وو او تر بيت‌اېل پورې د غرونو مُلک ته ننوتلے وو.

²د بيت‌اېل نه دا لوز ته تلے وو او عطارات ادار ته رسېدلے وو، چرته چې ارکيان اوسېدل.

³بيا دا د لاندينى بيت‌حورون پورې، نمرپرېواتۀ طرف ته د يفليطيانو علاقې ته تلے وو. دا د هغه ځائ نه جزر ته تلے وو او په مديتران سيند باندې ختم وو.

⁴دا زمکه د يوسف اولاد، د اِفرائيم قبيلو او د نمرپرېواتۀ طرف ته منسى ته مِلاو شوه چې د هغوئ خپل ميراث شى.

⁵دا د اِفرائيميانو د کورَنو علاقه وه: د هغوئ سرحد نَمرخاتۀ طرف ته د عطارات ادار نه پاسنى بيت‌حورون ته تلے وو.

⁶او د هغه ځائ نه د مديتران سيند ته تلے وو. مکمتاه د هغوئ په شمالى طرف باندې وو. هلته نَمرخاتۀ طرف ته سرحد د تانت شيلو طرف ته تاو وو او د ينوحاه نَمرخاتۀ طرف ته تلے وو.

⁷بيا دا د ينوحاه نه لاندې عطارات او نعراه ته تلے وو، چې يريحو ته رسېدلے وو او د اُردن سره ختم وو.

⁸نمرپرېواتۀ طرف ته سرحد د تفوح نه د قاناه نِهر ته تلے وو او د مديتران سيند سره ختم وو. دا هغه مُلک وو چې د اِفرائيم د قبيلې کورَنو ته ورکړے شوے وو چې د هغوئ ميراث شى،

⁹چې په کښې يو څو هغه واړۀ ښارونه او کلى هم شامِل وُو کوم چې د منسى په سرحدونو کښې دننه وُو، خو اِفرائيميانو له ورکړے شوى وُو.

¹⁰خو هغوئ هغه کنعانيان ونۀ شړل کوم چې په جزر کښې اوسېدل، نو په دې وجه کنعانيان تر اوسه پورې د اِفرائيميانو سره اوسېږى، خو د کنعانيانو نه يې په زور کار اخستلو.