Read Pashto Bible (Yusufzai) — د پښتو مقدس کتاب يوشع 18 Bible Online

يوشع 18 - Pashto Bible (Yusufzai) — د پښتو مقدس کتاب bible

يوشع 18

¹کله چې هغوئ هغه مُلک فتح کړو نو د هغې نه پس، د بنى اِسرائيلو ټول قوم په شيلو کښې راغونډ شو او د مالِک خُدائ د حضُور مقدسه خېمه يې ودروله.

²د بنى اِسرائيلو اووۀ قبيلې تر اوسه پورې داسې وې چې هغوئ ته په هغه مُلک کښې حِصه نۀ وه حواله شوې.

³نو يشوَع بنى اِسرائيلو ته ووئيل، ”تاسو به تر څو پورې دومره اِنتظار کوئ چې تاسو لاړ شئ او هغه مُلک ونيسئ کوم چې مالِک خُدائ ستاسو د پلار نيکۀ خُدائ پاک تاسو له درکړے دے؟

⁴تاسو به د هرې قبيلې نه درې سړى خوښ کړئ او زۀ به هغوئ ولېږم چې هغه ټوله علاقه وګورى او د دې ميراث د تقسيمولو تفصيل راوړى او بيا به هغوئ ما له واپس راشى.

⁵هغه مُلک به په هغوئ باندې په اوو برخو کښې تقسيم شى، يهوداه به د هغې په جنوبى حِصه کښې ايسار شى او يوسف به د هغې په شمالى حِصه کښې ايسار شى.

⁶د دې اوو حِصو د تقسيم يو تفصيل وليکئ او ما له يې راوړئ. بيا به زۀ ستاسو دپاره د مالِک خُدائ ستاسو د خُدائ پاک په وړاندې د مشورې دپاره ستاسو سره پچه واچوم.

⁷خو ليويانو ته به ستاسو نورو قبيلو سره د زمکې ميراث نۀ ملاوېږى، ځکه چې د هغوئ برخه دا ده چې د مالِک خُدائ د اِمامانو په توګه خِدمت وکړى. او د جاد، روبين او د منسى قبيلو ته به نوره زمکه نۀ ملاوېږى ځکه چې د مخکښې نه هغوئ ته خپله زمکه د اُردن نَمرخاتۀ طرف ته مِلاو شوې ده، کومه چې د مالِک خُدائ خِدمت کوُونکى موسىٰ هغوئ له ورکړې ده.“

⁸کله چې هغه سړى د مُلک کتلو دپاره روان شول نو يشوَع ورته ووئيل چې داسې به وکړئ، ”په هغه ټول مُلک باندې وګرځئ او تفصيل يې جوړ کړئ او بيا ما له واپس راشئ. او بيا به زۀ دلته په شيلو کښې د مالِک خُدائ په وړاندې د مشورې دپاره ستاسو سره پچه واچوم.“

⁹نو هغه سړى په ټول مُلک باندې وګرځېدل او هغوئ د دې بيان وليکلو چې په اوو حِصو کښې به يې څنګه تقسيموى او د ښارونو تفصيل يې وليکلو. بيا هغوئ واپس يشوَع له د شيلو کېمپ ته لاړل.

¹⁰نو يشوَع د هغوئ دپاره په شيلو کښې پچه واچوله چې د مالِک خُدائ سره مشوره وکړى او د بنى اِسرائيلو هرې پاتې شوې قبيلې ته يې د زمکې خپله خپله برخه حواله کړه.

¹¹اول پچه د بنيامين د قبيلې راوتله. د هغوئ زمکه د يهوداه او يوسف قبيلو په مينځ کښې پرته وه.

¹²په شمال کښې د هغوئ سرحد د اُردن سره شروع کېدو او بيا د يريحو شمال طرف ته بره ختلے وو او پرېواتۀ طرف ته د بيت آون په صحرا کښې د غرونو په مُلک کښې تلے وو.

¹³هغه سرحد بيا بره د لوز جنوبى طرف ته تلے وو چې د دې بيت‌اېل نوم هم وو، بيا عطارات ادار ته کُوز شوے وو چې د بيت‌حورون په جنوب طرف په غر باندې وو.

¹⁴بيا سرحد په يو بل طرف باندې تلے وو، د دې غرۀ د نمرپرېواتۀ طرف نه جنوبى طرف ته تاو وو او قريت بعل ته تلے وو چې بل نوم يې قريت يعريم دے، کوم ځائ چې د يهوداه د قبيلې دے. دا د نمرپرېواتۀ طرف ته سرحد وو.

¹⁵جنوبى سرحد يې د قريت يعريم په غاړه شروع شوے وو او د نفتوح چينو ته تلے وو.

¹⁶بيا دا لاندې د غر لمنو ته کُوز شوے وو چې د هنوم وادى ترې نه ښکارېده، دا د رفائيم وادۍ شمالى سر سره دے. بيا دا د هنوم په وادۍ کښې جنوبى طرف ته، د يبوسيانو په جنوبى غاړه د عين راجل طرف ته تلے وو.

¹⁷بيا دا د عين شمس شمالى طرف ته او بيا جليلوت ته تاو وو، چې د ادميم درې ته مخامخ دے. سرحد بيا لاندې د بوهن کاڼى ته تلے وو، بوهن د روبين زوئ وو.

¹⁸او د هغه غاړې شمالى طرف ته تېر وو چې د اُردن وادى ترې نه ښکارېده. دا لاندې وادۍ ته ورننوتلے وو،

¹⁹د بيت حجله شمالى غاړې نه تېر وو او د مړ درياب د شمالى خولې سره ختم وو، په کوم ځائ کښې چې د اُردن سيند اوبۀ ورغورزېږى. دا جنوبى سرحد وو.

²⁰اُردن يې د نَمرخاتۀ طرف ته سرحد وو. دا د هغه مُلک سرحدونه وُو کوم چې د بنيامين قبيلې کورَنو ته مِلاو شو چې د هغوئ خپل ميراث شى.

²¹د بنيامين قبيلې کورَنو ښارونه دا وُو: يريحو، بيت حجله، عميق قصيص،

²²بيت اربع، صمريم، بيت‌اېل،

²³عويم، فاره، عفره،

²⁴کفرالعمونى، عُفنى او جبعه: دا دولس ښارونه وُو چې ګېرچاپېره ترې نه کلى هم وُو.

²⁵هلته جبعون، راما، بيروت،

²⁶مصفاه، کفيره، موضه،

²⁷رِقم، ارفيل، تراله،

²⁸ضِلع، الف، يبوس يا يروشلم، جبعه او قريت يعريم وُو: دا ټول څوارلس ښارونه وُو چې ګېرچاپېره ترې نه کلى هم وُو. دا هغه مُلک دے کوم چې د بنيامين قبيلې کورَنو ته مِلاو شو چې د هغوئ ميراث شى.