Read Pashto Bible (Yusufzai) — د پښتو مقدس کتاب يوشع 21 Bible Online

يوشع 21 - Pashto Bible (Yusufzai) — د پښتو مقدس کتاب bible

يوشع 21

¹د ليوى قبيلې د کورَنو مشران اِلعازار اِمام، د نون زوئ يشوَع او د ټولو بنى اِسرائيلو د قبيلو مشرانو له لاړل.

²هلته د کنعان په مُلک شيلو کښې مشرانو هغوئ ته ووئيل، ”مالِک خُدائ د موسىٰ په ذريعه حُکم کړے دے چې مونږ له به د اوسېدو دپاره ښارونه راکولے شى او داسې د دې نه ګېرچاپېره زمونږ د څاروو دپاره به د څران زمکه راکولے شى.“

³نو د مالِک خُدائ د حُکم په مطابق بنى اِسرائيلو د خپلو علاقو نه ليويانو له خاص ښارونه او د څران زمکې ورکړې.

⁴وړومبنى ښارونه د ليوى قبيلې ډلې قُهات کورَنو ته حواله کړے شول. هغه کورنۍ کومې چې د هارون اِمام اولاد وُو هغوئ ته د يهوداه، شمعون او بنيامين د علاقو نه ديارلس ښارونه حواله کړے شول.

⁵د قُهات باقى پاتې ډلې ته د اِفرائيم، دان او نمرپرېواتۀ طرف ته منسى د علاقو نه لس ښارونه حواله کړے شول.

⁶د جيرسون ډلې ته د يساکار، آشر، نفتالى او نَمرخاتۀ طرف ته منسى د علاقو نه ديارلس ښارونه حواله کړے شول.

⁷د مرارى ډلې کورَنو ته د روبين، جاد او زبولون علاقو نه دولس ښارونه حواله کړے شول.

⁸بنى اِسرائيلو د پچې په ذريعه دا ښارونه او د دې د څران زمکې ليويانو ته حواله کړې، هم هغه شان چې څنګه مالِک خُدائ د موسىٰ په ذريعه حُکم کړے وو.

⁹دا د هغه ښارونو نومونه دى کوم چې د يهوداه او شمعون د علاقو نه ورکړے شوى وُو

¹⁰دا د هارون اولاد له ورکړے شوى وُو چې هغوئ د قُهات ډله وه، چې هغوئ د ليويانو اولاد وو، ځکه چې اول هغوئ ته علاقه حواله کولے شوه.

¹¹هغوئ له د اربع ښار ورکړے شو اربع د عناق پلار وو، اربع اوس حبرون بللے شى، دا د يهوداه د غرونو په مُلک کښې دے، د دې سره د دې نه ګېرچاپېره د څران زمکه هم ورکړے شوه.

¹²خو د هغه ښار پټى او نزدې کلى د مخکښې نه د يفُنه زوئ کالب له په ميراث کښې ورکړے شوى وُو.

¹³دا ښارونه سره د څران د زمکې د هارون اِمام اولاد ته حواله شوى وُو: حبرون کوم چې د پناه ښار وو اولِبناه،

¹⁴يتير، استموع،

¹⁵حولون، دبير،

¹⁶عين، يُوطه او بيت شمس، چې د دې سره د څران زمکې هم وې: نهۀ ښارونه د يهوداه او شمعون دواړو قبيلو نه ورته حواله کړے شوى وُو.

¹⁷د بنيامين د علاقې نه هغوئ له څلور ښارونه ورکړے شوى وُو: جبعون، جبعه،

¹⁸عنتوت او د علمون ښارونه، چې د دې سره د څران زمکې هم وې.

¹⁹ټول ديارلس ښارونه، سره د څران د زمکې د هارون اولاد اِمامانو له ورکړے شوى وُو.

²⁰د ليوى قبيلې د قُهات ډلې نورو کورَنو ته د اِفرائيم د علاقې نه څۀ ښارونه حواله کړے شوى وُو.

²¹هغوئ له څلور ښارونه ورکړے شوى وُو: شِکم او د اِفرائيم د غرونو په مُلک کښې د دې د څران زمکه (شِکم د پناه يو ښار وو)، جزر،

²²قِبضيم او د بيت‌حورون ښارونه، چې د څران زمکې د دې سره وې.

²³د دان د علاقې نه هغوئ له څلور ښارونه ورکړے شوى وُو: التِقيه، جبتون،

²⁴ايالون او جات رِمون، چې د څران زمکې ورسره وې.

²⁵د نمرپرېواتۀ طرف ته منسى د علاقې نه هغوئ له دوه ښارونه ورکړے شوى وُو: تعنک او جات رِمون، چې د څران زمکې ورسره وې.

²⁶د قُهات ډلې کورَنو ته ټول لس ښارونه مِلاو شول، چې د څران زمکې ورسره وې.

²⁷د ليوى قبيلې يوې بلې ډلې جيرسون ته د نَمرخاتۀ په طرف منسى د علاقې نه دوه ښارونه مِلاو شول: په بسن کښې جولان، چې د پناه يو ښار وو او بعستراه چې د څران زمکې ورسره وې.

²⁸د يساکار د علاقې نه هغوئ ته څلور ښارونه مِلاو شول: قِيسون، دبرت،

²⁹يرموت او عين جنيم چې د څران زمکې ورسره وې.

³⁰د آشر د علاقې نه هغوئ ته څلور ښارونه مِلاو شول: مِسال، عبدون،

³¹حلقت او رِحوب چې د څران زمکې ورسره وې.

³²د نفتالى د علاقې نه هغوئ ته درې ښارونه مِلاو شول: په ګليل کښې قادِس، چې د پناه يو ښار وو او د څران زمکې ورسره وې، حمات دور او قرتان چې د څران زمکې ورسره وې.

³³د جيرسون ډلې مختلفو کورَنو ته ټول ديارلس ښارونه مِلاو شول چې د څران زمکې ورسره وې.

³⁴د ليوى قبيلې د مرارى پاتې ډلې ته د زبولون علاقې نه څلور ښارونه مِلاو شول: يقنِعام، قرتاه،

³⁵دِمنه او نحلال چې د څران زمکې ورسره وې.

³⁶د روبين علاقې نه هغوئ ته څلور ښارونه مِلاو شول: بصر، يهض،

³⁷قديمات او مفعت چې د څران زمکې ورسره وې.

³⁸د جاد قبيلې نه هغوئ ته څلور ښارونه مِلاو شول: په جِلعاد کښې رامات، چې د پناه يو ښار وو، چې د څران زمکې ورسره وې، محنايم،

³⁹حسبون او يعزير چې د څران زمکې ورسره وې.

⁴⁰نو د مرارى ډلې ته ټول دولس ښارونه حواله شوى وُو.

⁴¹۴۱‏-۴۲ بنى اِسرائيلو د خپل مُلک نه ټول اتۀ څلوېښت ښارونه ليويانو له ورکړے شوى وُو چې د هغې نه ګېرچاپېره د څران زمکې وې.

⁴³نو مالِک خُدائ بنى اِسرائيلو له هغه ټول مُلک ورکړو د کوم يې چې د هغوئ پلار نيکۀ سره د ورکولو لوظ کړے وو. کله چې بنى اِسرائيلو دا مُلک قبضه کړو، نو هغوئ هلته په هغه مُلک کښې دېره شول.

⁴⁴مالِک خُدائ هغوئ له هم هغه شان د هر طرف نه آمن ورکړے وو، لکه څنګه چې هغۀ د هغوئ د پلار نيکۀ سره لوظ کړے وو د هغوئ يو دشمن هم د هغوئ مقابله نۀ شوه کولے ځکه چې مالِک خُدائ هغوئ له په ټولو دشمنانو باندې فتح ورکړې وه.

⁴⁵مالِک خُدائ چې د بنى اِسرائيلو سره څومره وعدې کړې وې نو په هغې کښې يوه هم نۀ وه ناکامه شوې او ټولې يې پوره کړې وې.