Read Pashto Bible (Yusufzai) — د پښتو مقدس کتاب يوشع 4 Bible Online

يوشع 4 - Pashto Bible (Yusufzai) — د پښتو مقدس کتاب bible

يوشع 4

¹کله چې ټول قوم د اُردن د سيند نه واوړېدو نو مالِک خُدائ يشوَع ته ووئيل،

²”د دولسو قبيلو نه يو يو سړے خوښ کړه

³او هغوئ له حُکم ورکړه چې د اُردن د سيند د مينځ نه دولس کاڼى راواخلى هم هغه ځائ نه چرته چې اِمامان ولاړ وُو، دوئ ته ووايه چې دا کاڼى د ځان سره يوسى او هلته يې کېږدى چرته به چې نن شپه خېمې لګوئ.“

⁴بيا يشوَع هغه دولس سړى راوغوښتل کوم چې هغۀ د هر يوې قبيلې نه خوښ کړى وُو

⁵او ورته يې ووئيل، ”د مالِک خُدائ خپل خُدائ پاک د لوظ صندوق په وړاندې د اُردن سيند مينځ ته لاړ شئ په تاسو کښې هر يو کس به يو يو کاڼے اُوچتوى او د بنى اِسرائيلو د دولسو قبيلو دپاره به يو يو کاڼے په اُوږه باندى اوړئ،

⁶دا کاڼى به خلقو ته رايادوى چې مالِک خُدائ څۀ کړى وُو. په راتلونکى وختُونو کښې چې کله ستاسو ماشومان ستاسو نه تپوس کوى چې د دې کاڼو مطلب څۀ دے

⁷نو تاسو به ورته وايئ چې کله د مالِک خُدائ د لوظ صندوق هلته نه تېرېدو نو د اُردن سيند اوبۀ بهېدل بند شوى وُو دا کاڼى به د همېشه دپاره د بنى اِسرائيلو يو يادګار وى.“

⁸سړو د يشوَع په حُکمونو عمل وکړو او څنګه چې مالِک خُدائ يشوَع ته حُکم کړے وو هغوئ د اُردن سيند مينځ نه دولس کاڼى واخستل د بنى اِسرائيلو د هرې يوې قبيلې دپاره يې يو يو اُوچت کړو د خېمو ځائ ته يې يوړل او هلته يې کېښودل.

⁹يشوَع د اُردن سيند په مينځ کښې د دولسو کاڼو يو بل يادګار ودرولو چرته چې د لوظ صندوق وړُونکى اِمامان ولاړ وُو (هغه کاڼى تر ننه پورې هلته دى).

¹⁰هغه اِمامان چا چې د لوظ صندوق اُوچت کړے وو د اُردن سيند په مينځ کښې تر هغې پورې ولاړ وُو چې خلقو هغه هر څه وکړل چې مالِک خُدائ يې يشوَع ته حُکم کړے وو او موسىٰ هم د دې حُکم کړے وو. خلق په بيړه د سيند نه واوړېدل.

¹¹کله چې هغوئ ټول بلې غاړې ته واوړېدل نو اِمامان چې د لوظ صندوق يې اُوچت کړے وو د خلقو نه مخکښې روان وُو.

¹²د موسىٰ د وېنا په مطابق د روبين جاد او د منسى د نيمې قبيلې سړى د وسلحې سره د نورو خلقو نه مخکښې روان وُو او پورېوتل.

¹³تقريباً څلوېښت زره سړى سره د وسلحې د مالِک خُدائ په حضُور کښې يريحو سره نزدې مېدان ته لاړل.

¹⁴په هغه ورځ مالِک خُدائ يشوَع د خلقو په نظر کښې عزتمند کړو، هغوئ د هغۀ ټول عُمر هم هغه شان عزت کولو لکه چې څنګه يې د موسىٰ کړے وو.

¹⁵بيا مالِک خُدائ يشوَع ته ووئيل چې،

¹⁶”هغه اِمامانو له حُکم ورکړه چا چې د لوظ صندوق اُوچت کړے دے چې د اُردن د سيند نه بهر راوځى.“

¹⁷نو يشوَع اِمامانو له حُکم ورکړو، ”د اُردن سيند نه راووځئ.“

¹⁸هغه اِمامان چې د مالِک خُدائ د لوظ صندوق يې اُوچت کړے وو چې کله د سيند د تل نه اوچې زمکې ته راوختل نو د اُردن په سيند کښې اوبۀ روانې شوې او د مخکښې په شان په موج کښې بهېدلې

¹⁹د وړومبۍ مياشتې په لسمه ورځ خلق د اُردن سيند نه پورې وتل او په جِلجال کښې يې خېمې ولګولې چې د يريحو نمر خاتۀ طرف ته دے.

²⁰د اُردن سيند نه چې کوم دولس کاڼى اخستے شوى وُو نو يشوَع هلته ډېرے کړل.

²¹او بنى اِسرائيلو ته يې ووئيل، ”په راتلونکى وختُونو کښې چې کله ستاسو بچى درنه تپوس وکړى چې د دې کاڼو مطلب څۀ دے،

²²نو تاسو به ورته د هغه وخت په باره کښې ووايئ چې کله بنى اِسرائيل د اُردن په سيند کښې په اوچه زمکه تېر شوى وُو.

²³هغوئ ته ووايئ چې مالِک خُدائ زمونږ خُدائ پاک د اُردن سيند تر هغې پورې اوچ کړے وو چې مونږ ترې نه واوړيدلو لکه څنګه چې هغۀ د بحرِقُلزم تر هغې پورې اوچ کړے وو چې مونږ اوړيدلى نۀ وُو،

²⁴او د دې په وجه به د دنيا ټولو قومونو ته پته ولګى چې د مالِک خُدائ په لاس کښې قُدرت دے او تاسو به د مالِک خُدائ د خپل خُدائ پاک نه د همېشه دپاره يرېږئ.“