Read Pashto Bible (Yusufzai) — د پښتو مقدس کتاب تيطوس 3 Bible Online

تيطوس 3 - Pashto Bible (Yusufzai) — د پښتو مقدس کتاب bible

تيطوس 3

¹خپلو خلقو ته دا ورياد کړه چه دَ حاکمانو اَؤ دَ اِختيار دَ خاوندانو فرمانبردارى دِ کوى اَؤ دَ هغوئ حُکم دِ منى اَؤ دَ هر ښۀ کار دَ پاره دِ تيار ولاړ وى.

²دَ چا بد دِ نۀ وائى، تکرار دِ نۀ کوى بلکه نرم مزاج دِ وى، اَؤ دَ هر چا سره دِ ډير په صبر خبرے کوى.

³ځکه چه مُونږ هم اول ناپوهه، نافرمانه، ګُمراه اَؤ دَ قِسما قِسم خواهشاتو اَؤ دَ عيش و عشرت بنديان وُو اَؤ په بد خواهئ اَؤ په حسد کښے مو ژوند تيروو، دَ نفرت لائق وُو اَؤ دَ يو بل نه مو نفرت کاوو.

⁴خو هر کله چه زمُونږ خلاصوُونکى خُدائے فضل وکړو اَؤ دَ اِنسان سره دَ هغۀ مينه ظاهره شوه،

⁵نو هغۀ مُونږ له خلاصُون راکړو، خو دَ صداقت دَ هغه ښۀ کارُونو په سبب نه، کُوم چه مُونږ په خپله کړى وُو، بلکه دَ خپل رحمت په مُطابق اَؤ دَ نوى پيدايښت په وينځلو اَؤ دَ رُوحُ القُدس زمُونږ دَ بيا دَ نوى کولو په وسيله.

⁶خُدائے رُوحُ القُدس زمُونږ دَ خلاصوُونکى عيسىٰ مسيح په وسيله په مُونږ ډير زيات نازل کړو،

⁷دَ دے دَ پاره چه مُونږ دَ هغۀ په فضل صادِق کړے شُو اَؤ دَ تل دَ ژوندُون دَ اُميد وارثان شُو.

⁸دا خبره رښتيا ده اَؤ زَۀ غواړم چه تۀ دَ دے خبرو تاکيد وکړے دَ دے دَ پاره چه چا چه په خُدائے ايمان راوړے دے، هغوئ په ښو کارُونو کښے دَ بوختيدو خيال وکړى. دا کارُونه غوره اَؤ دَ اِنسان دَ پاره سُود من دى.

⁹خو دَ بے وقوفئ په بحثُونو، نسب نامو اَؤ جګړو اَؤ دَ هغه جنګُونو نه چه دَ شريعت په حقله جوړيږى، ځان ساته، ځکه چه دا لا حاصله اَؤ بے فائدے دى.

¹⁰دوه ځلے نصيحت کوه خو بيا دَ بدعتى سړى نه ځان ساته.

¹¹اَؤ په دے پوهه شه چه داسے سړے بے لارے شوے دے اَؤ خپل ځان ئے مُجرم کړے دے ځکه چه په ګُناه کښے ژوند تيروى.

¹²هر کله چه زَۀ تا ته ارتِماس يا تخيکوس دروليږم نو نيکوپوليس ته دَ راتلو کوشِش وکړه ځکه چه ما هلته دَ ژمى تيرولو نيت کړے دے.

¹³دَ شرعے عالم زيناس اَؤ اپولوس دَ را استولو کوشِش وکړه، په دے شان چه هغوئ ته دَ څۀ څيز کمے رانۀ شى.

¹⁴اَؤ زمُونږ خلق دِ هم په ښۀ کارُونو کښے آخته وى، دَ دے دَ پاره چه حاجت پيښ شى نو ورسره څۀ وى، اَؤ بے کاره دِ نۀ کښينى.

¹⁵زما ټول ملګرى تا ته سلام وائى. چه مُونږ دَ ايمان دَ مخه خپل ګڼى، هغوئ ته زمُونږ سلام وايه. په تاسو ټولو دِ دَ خُدائے فضل جارى وى.