Read Pashto Bible (Yusufzai) — د پښتو مقدس کتاب عبرانيانو 1 Bible Online

عبرانيانو 1 - Pashto Bible (Yusufzai) — د پښتو مقدس کتاب bible

عبرانيانو 1

¹په تيره زمانه کښے خُدائے زمُونږ دَ پلارانو نيکُونو سره ډير ځله په مُختلفو طريقو سره دَ نبيانو په معرفت خبرے وکړلے.

²خو په دے آخره زمانه کښے ئے مُونږ سره دَ خپل زوى په معرفت کلام وکړو چه هغه ئے دَ ټولو څيزُونو وارِث وګرزولو اَؤ دَ هغۀ په وسيله ئے هم ټول کائنات پيدا کړل.

³چه هغه دَ خُدائے دَ جلال مظهر اَؤ دَ هغۀ دَ ذات عکس دے اَؤ ټول څيزُونه دَ خپل قُدرت په کلام سمبالوى. هغۀ ګُناهُونه پاک کړل اَؤ په آسمان کښے دَ قادرِ مُطلق خُدائے په ښى لاس کښيناستو.

⁴نو داسے ئے زوئے له فرښتو نه دومره غوره شو څومره چه هغۀ په ميراث کښے دَ هغوئ نه لوئے نُوم مُوندلے وو.

⁵هيڅ کله هم خُدائے کُومے فرښتے ته دا نۀ دى وئيلى چه : ”تۀ زما زوئے يئے، ما نن اظهار کړے.“ اَؤ بيا دا چه : ”زَۀ به دَ هغۀ پلار يم اَؤ هغه به زما زوئے وى.“

⁶اَؤ بيا چه خُدائے خپل اول پيدا شوے، يعنے عيسىٰ، دنيا ته راولى نو وائى چه : ”دَ خُدائے ټولے فرښتے دِ هغۀ ته سجده وکړى.“

⁷اَؤ دَ فرښتو په باب کښے وائى چه : ”هغه دَ خپلو فرښتو نه بادُونه جوړ وى اؤ دَ خپلو خادمانو نه دَ اور شُغلے جوړوى.“

⁸خو دَ خپل زوى په حقله وائى چه : ”اَئے خُدايه! ستا تخت به تل تر تله وى اَؤ ستا دَ بادشاهئ امسا دَ صداقت امسا ده.

⁹تا دَ صداقت سره مينه اَؤ دَ بدکارئ نه نفرت وکړو، په دے وجه خُدائے، يعنے ستاسو خُدائے، تۀ په تيلو مسح کړلے اَؤ دَ خپلو ملګرو په نسبت ئے زيات خوشحاله کړلے.“

¹⁰اَؤ بيا دا چه : ”اَئے مالِکه! تا دَ مزکے بُنياد له ازل نه کيښودو اَؤ آسمان ستا دَ لاس کاريګرى ده.

¹¹هغه به فنا شى خو تۀ به باقى پاتے يئے، اَؤ هغه به ټول دَ جامو په شان زاړۀ شى.

¹²تۀ به هغه دَ چُوغے په شان راونغاړے اَؤ دَ جامو په شان به بدل کړے شى. خو تۀ هم هغه ئے اَؤ ستا کالُونه به ختم نۀ شى.“

¹³خو خُدائے په فرښتو کښے دَ چا په باب کښے کله وئيلى وُو چه : ”تۀ زما ښى لاس ته کښينه تر څو چه زَۀ ستا دُښمنان دَ پښو دَ لاندے دُنکاچه نۀ کړم.“

¹⁴فرښتے څۀ دى؟ هغوئ ټول خدمت ګُزار رُوحُونه دى کُوم چه دَ هغه خلقو دَ خدمت دَ پاره راليږلى شوى دى څوک چه دَ خلاصُون وارثان دى.