Read Pashto Bible (Yusufzai) — د پښتو مقدس کتاب عبرانيانو 3 Bible Online

عبرانيانو 3 - Pashto Bible (Yusufzai) — د پښتو مقدس کتاب bible

عبرانيانو 3

¹نو اَئے پاکو ورُوڼو! تاسو چه په آسمانى بلنه کښے شريک يئ، په هغه رسُول اَؤ مشر کاهن عيسىٰ غور وکړئ دَ چا چه مُونږ اِقرار کوُو.

²خُدائے هغه مُقرر کړو اَؤ هغه دَ خُدائے وفادار پاتے شو لکه څنګه چه مُوسىٰ دَ خُدائے په ټول کور کښے وفادار وو.

³ځکه چه هغه دَ مُوسىٰ نه دومره زيات دَ عزت خاوند وګڼلے شو څومره چه دَ کور جوړوُونکے له کور نه زيات عزتمن وى.

⁴ځکه چه دَ هر يو کور څوک نه څوک جوړوونکے وى، خو چا چه ټول څيزُونه جوړ کړل هغه خُدائے دے.

⁵مُوسىٰ خو دَ خُدائے په ټول کور کښے دَ خادم په شان ديانتدار وو دَ پاره دَ دے چه دَ راتلُونکو خبرو په باب کښے ګواهى ورکړى.

⁶خو مسيح دَ زوى په حيثيت دَ خُدائے دَ کور مُختار دے، اَؤ دَ خُدائے کور مُونږ يو خو په دے شرط چه دَ خپلے زړه ورتيا اَؤ اُميد فخر تر آخره ټينګ قائم وساتُو.

⁷نو بيا لکه چه څنګه رُوحُ القُدس فرمائى : ”که تاسو نن دَ هغۀ آواز واؤرئ،

⁸نو خپل زړُونه مه سختوئ څنکه چه دَ غُصے راوستو په وخت مو دَ آزميښت په ورځ په بيابان کښے کړى وُو،

⁹چرته چه ستاسو پلارُونو نيکُونو زما جاج اَؤ آزميښت وکړو اَؤ څلويښت کاله پورے ئے زما کارُونه وليدل.

¹⁰ځکه زَۀ دَ هغے پيړئ نه خفه شوم اَؤ ما ووئيل چه دَ دوئ زړُونه هميشه ګُمراه کيږى اَؤ هغوئ زما لارے ونۀ پيژندلے.

¹¹ځکه ما په خپل غضب کښے قسم وخوړلو چه دوئ به زما په آرام کښے داخليدے نۀ شى.“

¹²نو ورُوڼو! خبردار شئ، په تاسو کښے دِ دَ چا داسے بد اَؤ بے ايمانه زړۀ نۀ وى چه دَ ژوندى خُدائے نه وګرزى.

¹³بلکه تر کُومه پورے چه دَ نن ورځ وئيلے کيږى، هره ورځ په خپلو کښے نصيحت کوئ چه په تاسو کښے څوک دَ ګُناه په تيندک خوړلو کښے سخت زړے نۀ شى.

¹⁴ځکه چه مُونږ په مسيح کښے شريک شوى يُو خو هله چه په خپل اولنى باور تر آخره ټينګ قائم پاتے شُو.

¹⁵لکه چه صحيفے وائى چه : ”که تاسو نن دَ هغۀ آواز واؤرئ، نو خپل زړُونه هغسے مه سختوئ لکه چه مو دَ غُصے راوستو په وخت کړى وُو.“

¹⁶نو کُومو خلقو دَ غږ په آؤريدو غُصه ور وسته؟ آيا هغه ټول نۀ وُو څوک چه دَ مُوسىٰ په وسيله دَ مصر نه وتلى وُو څۀ؟

¹⁷اَؤ هغه دَ کُومو خلقو نه تر څلويښتو کالو پورے خفه وو؟ آيا دَ هغوئ نه نه، چا چه ګُناه وکړه اَؤ دَ هغوئ مړى په بيابان کښے پراتۀ وُو؟

¹⁸اَؤ دَ چا په باب کښے هغۀ قسم وخوړلو چه ”هغوئ به زما په آرام کښے داخليدے نۀ شى؟“ هغه چا چه نافرمانى وکړه.

¹⁹غرض دا چه مُونږ وينُو چه هغوئ ځکه داخليدے نۀ شول چه ايمان ئے راوړے نۀ وو.