Read Pashto Bible (Yusufzai) — د پښتو مقدس کتاب عبرانيانو 7 Bible Online

عبرانيانو 7 - Pashto Bible (Yusufzai) — د پښتو مقدس کتاب bible

عبرانيانو 7

¹اَؤ ملکِ صِدق دَ شاليم بادشاه، دَ عظيم خُدائے کاهن وو. کله چه اِبراهيم بادشاهانو له شکست ورکړو اَؤ واپس راتلو نو ملکِ صِدق دَ هغۀ هر کلے وکړو اَؤ دَ هغۀ دَ پاره ئے برکت وغوښتو.

²هغۀ ته اِبراهيم دَ ټولو څيزُونو عُشر ورکړو. دَئے اول خو دَ خپل نُوم دَ معنىٰ په مُطابق ”دَ صداقت بادشاه“ دے اَؤ بيا دَ شاليم، يعنے ”دَ صُلح بادشاه.“

³په پاک کلام کښے نۀ خو دَ ملکِ صِدق دَ پلار څۀ ذکر شته، نۀ دَ مور اَؤ نۀ دَ پلار نيکۀ اَؤ نۀ دَ هغۀ دَ پيدايښت اَؤ نۀ دَ مرګ بيان مُوندلے کيږى، دغه شان هغه دَ خُدائے دَ زوئے په شان تل تر تله کاهن دے.

⁴نو بيا غور وکړئ چه دا څۀ رنګ مشر وو چا ته چه دَ قوم نيکۀ اِبراهيم دَ غنيمت دَ ښۀ نه ښۀ مال عُشر ورکړو.

⁵اوس دَ لاوى په اَؤلاد کښے چه څوک دَ کاهنتوب عُهده مُومى، هغوئ ته حُکم دے چه دَ اُمت، يعنے دَ خپلو ورُوڼو نه اګر که هغه دَ اِبراهيم له نسل نه وى، دَ شريعت په مُطابق دِ عُشر آخلى.

⁶خو اګر که دَ ملکِ صِدق نسب دَ هغوئ نه جُدا دے، هغۀ دَ اِبراهيم نه عُشر واخستو چه ورسره لوظُونه کړى شوى وُو، نو دَ هغۀ دَ پاره ئے برکت وغوښتو.

⁷اَؤ په دے کښے دويمه خبره نِشته چه ورکوټے له لوئے نه برکت مُومى.

⁸اَؤ دلته خو کاهن چه مړ کيدُونکے دے عُشر آخلى، خو هلته ئے ملکِ صِدق آخلى دَ چا په حق کښے چه ګواهى ورکولے کيږى چه ژوندے دے.

⁹نو بيا مُونږ وئيلے شُو چه لاوى چه عُشر آخلى دَ اِبراهيم په وسيله عُشر ورکړو.

¹⁰ځکه چه څۀ وخت چه ملکِ صِدق دَ اِبراهيم هر کلے وکړو نو لاوى تر هغه وخته پورے پيدا شوے نۀ وو، نو داسے وئيلے شُو چه دَ نيکۀ اِبراهيم په وجُود کښے وو.

¹¹نو بيا دَ لاوى کاهنانو په طريقه قوم ته شريعت ورکړے شوے وو اَؤ که دَ هغۀ دَ طريقے په مُطابق دَ قوم خلق کامل کيدے شول نو دَ دے حاجت نۀ وو چه بل قِسم کاهن مقرر کړے شى، يعنے داسے کاهن چه دَ ملکِ صِدق په طريقه وى اَؤ دَ هارون په طريقه نۀ وى.

¹²اَؤ چه کاهنتوب بدل شو نو دَ شريعت بدليدل هم ضرورى دى.

¹³ځکه چه دَ چا په باب کښے چه دا خبرے کولے شى، هغه دَ بلے قبيلے دے په کُومه کښے چه هيچا هم دَ قُربانګاه خدمت نۀ دے کړے.

¹⁴يعنے ظاهره ده چه زمُونږ مالِک له يهُوداه دَ قبيلے نه پيدا شو اَؤ دَ دے قبيلے په باب کښے مُوسىٰ دَ کاهنتوب هيڅ ذکر نۀ دے کړے.

¹⁵نو زمُونږ دعوىٰ نوره هم صفا ښکاره شوه چه دَ ملکِ صِدق په شان يو بل داسے کاهن پيدا کيدُونکے وو،

¹⁶څوک چه دَ جسمانى حُکمُونو دَ شريعت په مُطابق نه، بلکه دَ غير فانى ژوندُون دَ قُوت په مُطابق وټاکلے شو.

¹⁷ځکه چه دَ هغۀ په حق کښے دا ګواهى ورکړے شوے ده چه : ”تۀ به دَ ملکِ صِدق په طريقه تل تر تله کاهن يئے.“

¹⁸غرض دا چه اول حُکم دَ کمزورئ اَؤ دَ بے فائدے کيدو په وجه منسُوخ شو،

¹⁹ځکه چه شريعت هيڅ څيز کامل کړے نۀ دے اَؤ دَ هغۀ په ځائے ئے يوه غوره اُميد کيښودو چه دَ هغۀ په وسيله مُونږ خُدائے ته نزدے کيدے شُو.

²⁰اَؤ دَ مسيح مُقرر کيدل بغير دَ قسمه ونۀ شو، ولے چه هغوئ خو بغير دَ قسمه کاهنان مُقرر شوى دى

²¹خو دَئے دَ قسم سره دَ خُدائے دَ طرفه مُقرر شو چه هغۀ دَ دۀ په باب کښے ووئيل چه : ”مالِک قسم خوړلے دے اَؤ دَ هغۀ نه به ګرزى نه چه تۀ تل تر تله کاهن يئے.“

²²دَ دے دَ پاره عيسىٰ دَ يو غوره وعدے ضامن شو.

²³دَ کاهنانو شمير ځکه زيات شو چه هغوئ دَ مرګ په وجه په خپلے عُهدے باندے قائم پاتے کيدے نۀ شُو.

²⁴خو عيسىٰ تل تر تله ژوندے پاتے کيږى، نو ځکه هغه داسے کاهن دے چه دَ هغۀ په ځائے بل هيڅوک نۀ مُقرر کيږى.

²⁵دَ دے دَ پاره چه څوک دَ دَۀ په وسيله خُدائے ته راځى هغه هغوئ ته پُوره پُوره خلاصُون ورکولے شى ځکه چه هغه دَ هغوئ دَ شفاعت دَ پاره هميشه ژوندے دے.

²⁶ځکه چه دغه شان مشر کاهن زمُونږ هم په کار دے چه هغه پاک اَؤ بے ريا اَؤ بے داغه وى، اَؤ له ګُناه ګارانو نه جُدا کړے اَؤ له آسمانُونو نه اُوچت کړے شوے وى.

²⁷اَؤ دَ هغه مشرانو کاهنانو په شان دے ته مُحتاجه نۀ وى چه هره ورځ اول دَ خپلو ګُناهُونو دَ پاره اَؤ بيا دَ اِسرائيل دَ اُمت دَ ګُناهُونو دَ پاره قُربانئ ورکوى ځکه چه دا هغۀ په يو ځل وکړل څۀ وخت چه ئے خپل ځان قُربان کړو.

²⁸ځکه چه شريعت خو کمزورى کسان مشران کاهنان مُقرروى، خو کله چه خُدائے دَ شريعت نه وروسته په قسم خوړلو سره وعده کوى نو هغه زوئے مُقرر کوى چه دَ تل دَ پاره قائم پاتے کيږى.