Read Pashto Bible (Yusufzai) — د پښتو مقدس کتاب يوحنا اول 3 Bible Online

يوحنا اول 3 - Pashto Bible (Yusufzai) — د پښتو مقدس کتاب bible

يوحنا اول 3

¹پلار مُونږ سره څومره زياته مينه کړے ده چه مُونږ ته دَ خُدائے بچى ووئيلے شُو اَؤ دغه شان مُونږ هم يُو. اَؤ دُنيا مُونږ ځکه نۀ پيژنى چه هغه ئے هم نۀ دے پيژندلے.

²خوږو دوستانو! مُونږ اوس هم دَ خدائے بچى يُو خو په دِے نۀ پوهيږو چه څنګه به شُو، خو مونږ په دے پوهيږُو چه هر کله چه عيسىٰ راښکاره شى نو مُونږ به دَ هغۀ په شان شُو ځکه چه مُونږ به ئے هم په هغه شان ووينُو څنګه چه هغه دے.

³هر څوک چه په مسيح دا اُميد لرى، هغه ځان داسے پاک ساتى لکه چه مسيح پاک دے.

⁴هر څوک چه ګُناه کوى، هغه نافرمانى کوى، ګُناه خو نافرمانى کول ده.

⁵تاسو خبر يئ چه مسيح ځکه ښکاره شو چه ګُناهُونه لرے کړى، اَؤ په هغۀ کښے هيڅ ګُناه نِشته

⁶نو هر څوک چه په مسيح کښے قائم وى، هغه په ګُناه کولو آخته نۀ وى، اَؤ هر څوک چه په ګُناه کولو آخته وى، نۀ خو هغۀ ليدلے دے اَؤ نۀ ئے پيژندلے دے.

⁷زما بچو! هيڅوک دِ تاسو بے لارے نۀ کړى ځکه چه څوک چه صداقت کوى هغه صادِق دے لکه چه مسيح صادِق دے.

⁸هر څوک چه ګُناه کوى، هغه دَ اِبليس بچے دے ځکه چه اِبليس له ازل نه په ګُناه کولو کښے آخته دے. اَؤ دَ خُدائے زوئے له ازل نه ځکه ښکاره شو چه دَ اِبليس کارُونه برباد کړى.

⁹له خُدائے نه پيدا شوى هيڅ کله هم په ګُناه کښے نۀ اوسيږى ځکه چه په هغۀ کښے دَ خُدائے اصل قائم وى، اَؤ هغه ګُناه کولے نۀ شى ځکه چه هغه دَ خُدائے بچے دے.

¹⁰هم دغه دَ خُدائے دَ بچو اَؤ دَ اِبليس دَ بچو فرق دے، هيڅوک هم چه صداقت نۀ کوى دَ خُدائے بچے نۀ دے، اَؤ نۀ هغه څوک چه دَ ورور سره مينه نۀ لرى.

¹¹ځکه چه له شروع نه چه کُوم پيغام تاسو آؤريدلے دے، هغه دا دے چه مُونږ دِ دَ يو بل سره مينه ولرُو.

¹²نۀ چه دَ قائين په شان جوړ شُو چه دَ شرير بچے وو اَؤ خپل ورور ئے قتل کړو. اَؤ هغه ئے ولے مړ کړو؟ ځکه چه دَ هغۀ عمل بد وو اَؤ دَ هغۀ دَ ورور ښۀ.

¹³زما ورُوڼو! په دے حيرانيږئ مه که دُنيا تاسو سره دُښمنى کوى.

¹⁴مُونږ پوهيږُو چه له مرګ نه په ژوندُون کښے شوى يُو په دے ځکه چه مُونږ له خپلو ورُوڼو سره مينه لرُو، اَؤ څوک چه مينه نۀ لرى هغه لا تر اوسه دَ مرګ په حالت کښے دے.

¹⁵ځکه چه هر هغه څوک چه دَ خپل ورور نه نفرت کوى، خُونى دے، اَؤ تاسو په خپله خبر يئ چه يو خُونى هم په خپل ځان کښے دَ تل ژوندُون نۀ لرى.

¹⁶په دے وجه مُونږ پوهيږو چه مينه څۀ ده، ځکه چه مسيح زمُونږ دَ پاره خپل ځان ورکړو اَؤ مُونږ له هم په کار دى چه خپل ځانُونه دَ خپلو ورُوڼو دَ پاره ورکړُو.

¹⁷که څوک مالدار وى اَؤ خپل ورور حاجتمند وينى اَؤ بيا هم زړۀ سواندے پرے نۀ کوى نو هغه څنګه دَ خُدائے مينه په خپل زړۀ کښے لرى؟

¹⁸زما بچو! مينه دِ تش په خبرو يا په ژبه نۀ وى بلکه هغه په رښتيا اَؤ په عملى طور په کار ده.

¹⁹هم دغه شان به مُونږ پوهه شُو چه مُونږ دَ حقيقت يُو، اَؤ دَ خُدائے په مخکښے دا باور لرُو.

²⁰که زمُونږ زړۀ مُونږ ملامتوى نو هم خُدائے زمُونږ دَ زړۀ نه ډير لوئے دے اَؤ له هر څۀ نه خبر دے.

²¹خوږو دوستانو! که چرے زمُونږ زړۀ مُونږ نۀ ملامتوى نو بيا مُونږ دَ خُدائے په مخکښے باور لرُو.

²²اَؤ څۀ چه ترے غواړو هغه ئے راکوى، ځکه چه مُونږ دَ هغۀ په حُکمُونو عمل کوُو اَؤ څۀ چه هغه خوښوى هم هغسے کوُو.

²³دا دَ هغۀ حُکم دے چه دَ هغۀ دَ زوى عيسىٰ مسيح په نُوم ايمان راؤړُو اَؤ دَ هغۀ دَ حُکم په مُطابق دَ يو بل سره مينه ولرُو.

²⁴هر څوک چه دَ خُدائے په حُکمُونو عمل کوى نو هغه په خُدائے کښے قائم وى اَؤ خُدائے په هغۀ کښے. اَؤ هم دغه شان مُونږ پوهيږو چه هغه دَ رُوحُ القُدس په وسيله په مُونږ کښے اوسيږى چه په مُونږ ئے نازل کړے دے.