Read Pashto Bible (Yusufzai) — د پښتو مقدس کتاب قاضيان 14 Bible Online

قاضيان 14 - Pashto Bible (Yusufzai) — د پښتو مقدس کتاب bible

قاضيان 14

¹يوه ورځ سمسون تمنت ته لاړو، هلته يې يوه پېغله فلسطينۍ وليده.

²هغه واپس کور ته لاړو او خپل مور پلار ته يې ووئيل، ”په تمنت کښې ما يوه فلسطينۍ جينۍ ليدلې ده او اوس هغه ما له وادۀ کړئ.“

³خو مور پلار يې ورته ووئيل، ”ستا په خپلوانو يا زمونږ په ټولو خلقو کښې جينۍ نشته څۀ، چې تۀ خامخا ځې او په ناسنته فلستيانو کښې جينۍ کوې؟“ خو سمسون خپل پلار ته ووئيل، ”هغه جينۍ ما له وکړه ځکه چې هغه مې خوښه ده.“

⁴مور پلار ته يې دا پته نۀ وه چې په دې کار کښې د مالِک خُدائ لاس وو، ځکه چې مالِک خُدائ د فلستيانو سره د جنګ دپاره يوه موقع لټوله. په هغه وخت کښې فلستيانو په بنى اِسرائيلو باندې حکومت کولو.

⁵نو سمسون د خپل مور پلار سره تمنت ته لاړو. کله چې هلته هغوئ د انګورو په باغونو کښې تېرېدل، هغۀ آواز واورېدو چې يو ځوان زمرے هغۀ ته مخامخ غورېږى.

⁶د مالِک خُدائ روح ناڅاپه په هغۀ باندې نازل شو او سمسون يې تکړه کړو او په تشو لاسونو يې زمرے ټوټې ټوټې کړو، لکه چې دا د چېلۍ بچے وى. خو هغۀ خپل مور پلار ته د دې په باره کښې ونۀ وئيل.

⁷بيا هغه لاړو او د هغه جينۍ سره يې خبرې وکړې او هغه يې خوښه شوه.

⁸يو څو ورځې پس سمسون د هغې سره وادۀ کولو دپاره واپس لاړو. په لاره کښې هغه راوګرځېدو چې د هغه ازمرى لاش وګورى چې کوم يې وژلے وو او هغۀ وليدل چې د دې په لاش کښې دننه ډېرې مچۍ او شات هم وُو.

⁹هغۀ شات د لاسونو سره راوويستل او په روانه کښې يې خوړل. بيا هغۀ خپل مور او پلار له هم يوړل او لږ يې ترې نه ورکړل او هغوئ هم وخوړل، خو سمسون ونۀ وئيل چې دا شات يې د مړ ازمرى نه راويستلى دى.

¹⁰د هغۀ پلار د هغه جينۍ کور ته لاړو او سمسون هلته اووۀ ورځې ډوډئ ورکړه. دا هلته د ځوانانو سړو رِواج وو.

¹¹کله چې فلستيانو هغه وليدو، نو هغوئ دېرش ځوانان ملګرى ورولېږل چې د هغۀ سره ايسار شى.

¹²۱۲‏-۱۳ سمسون هغوئ ته ووئيل، ”زۀ به ستاسو نه د يو سخت سوال تپوس وکړم. کۀ تاسو يې ما له د ډوډئ په دې اوو ورځو کښې جواب راکړو، نو زۀ به تاسو له د لټې دېرش جوړه کُرتې او دېرش جوړه جامې درکړم. خو کۀ جواب مو رانۀ کړو نو ما له به تاسو د لټې دېرش جوړه کُرتې او دېرش جوړه جامې راکوئ.“ هغوئ ورته ووئيل، ”مونږ ته خپل سخت سوال ووايه، چې مونږ يې واورو.“

¹⁴هغۀ ورته ووئيل، ”د خوړُونکى نه د خوراک څۀ شے راووتلو، د تکړه شى نه څۀ خوږ شے راووتلو.“ درې ورځې وروستو هم هغوئ د دې سخت سوال جواب ورنۀ کړے شو.

¹⁵په څلورمه ورځ هغوئ د سمسون ښځې ته ووئيل، ”خپل خاوند وغولوه چې مونږ ته د دې سخت سوال مطلب وښائى. که تا ونۀ ښودلو نو مونږ به ستا د پلار په کور اور ولګوُو او تا به هم په کښې وسوزوُو. تا مونږ د دې دپاره راغوښتى يُو څۀ چې غريبانان شو؟ که داسې نۀ ده؟“

¹⁶نو د سمسون ښځه په ژړا هغۀ له ورغله او ورته يې ووئيل، ”تۀ زما سره مينه نۀ کوې! تۀ زما نه کرکه کوې! تا زما د خلقو د بچو نه د سخت سوال تپوس وکړو او ما ته دې ونۀ وئيل چې د دې مطلب څۀ دے!“ هغۀ ورته ووئيل، ”ګوره! ما خپل مور پلار ته هم نۀ دى وئيلى. نو زۀ تا ته ولې ووايم؟“

¹⁷هغې د دې په باره کښې د خېرات په ټولو اوو ورځو کښې ژړل. خو په اوومه ورځ هغۀ ورته د دې سخت سوال مطلب وښودلو، ځکه چې هغې د دې په باره کښې هغه ډېر تنګ کړو. بيا هغې فلستيانو ته ووئيل.

¹⁸نو په اوومه ورځ د نمر‌پرېوَتو نه مخکښې، د ښار سړو هغۀ ته ووئيل، ”د شاتو نه به خوږ څۀ شے وى؟ د ازمرى نه به تکړه څۀ شے وى؟“ سمسون ورته په جواب کښې ووئيل، ”که تاسو زما په غوا يوې نۀ وے کړے، نو تاسو به د دې سخت سوال جواب نۀ وے راکړے.“

¹⁹د مالِک خُدائ روح ناڅاپه په هغۀ باندې راغلو او هغه يې تکړه کړو او هغه لاندې اسقلون ته لاړو، چرته چې يې دېرش سړى ووژل، جامې يې ترېنه وويستلې او د هغوئ جامې يې هغه سړو له ورکړې چا چې هغه سخت سوال حل کړے وو. د هغې نه پس هغه واپس کور ته لاړو، چې څۀ شوى وُو په هغې باندې سخت غصه وو،

²⁰او د سمسون ښځه هغه سړى له ورکړے شوه چې کوم د هغۀ په وادۀ کښې د هغۀ ښۀ ملګرے وو.