Read Pashto Bible (Yusufzai) — د پښتو مقدس کتاب قاضيان 18 Bible Online

قاضيان 18 - Pashto Bible (Yusufzai) — د پښتو مقدس کتاب bible

قاضيان 18

¹په هغه وخت کښې چې د بنى اِسرائيلو يو بادشاه هم نۀ وو نو په هغه ورځو کښې د دان قبيلې يوه داسې علاقه لټوله چې دعوه پرې وکړى او قبضه يې کړى ځکه چې د بنى اِسرائيلو په قبيلو کښې هغوئ ته خپله زمکه نۀ وه مِلاو شوې.

²نو د دان خلقو د قبيلې د ټولو کورَنو نه پينځۀ تکړه سړى خوښ کړل هغوئ يې د صُرعه او اِستال ښارونو ته ولېږل او ورته يې ووئيل چې، ”هغه مُلک ولټوئ.“ کله چې هغوئ د غرونو مُلک اِفرائيم ته ورسېدل، نو هغوئ د ميکاه په کور کښې ايسار شول.

³کله چې هغوئ هلته وُو، نو هغوئ د هغه ځوان ليوى په لهجه باندې پوهه شول، نو هغوئ ورغلل او تپوس يې ترې نه وکړو، ”تۀ دلته څۀ کوې؟ تۀ دلته چا راوستلے يې؟“

⁴هغۀ جواب ورکړو، ”زۀ د ميکاه سره کار کوم، زۀ د اِمام په توګه د هغۀ سره خِدمت کوم او هغه ما له تنخوا راکوى.“

⁵هغوئ هغۀ ته ووئيل، ”د خُدائ پاک نه لږ تپوس وکړه چې مونږ به په خپل سفر کښې کامياب شو او که نۀ.“

⁶اِمام جواب ورکړو، ”په خېر لاړ شئ، ستاسو سفر د مالِک خُدائ نه منظُور شوے دے.“

⁷نو هغه پينځۀ سړى راوان شول او د ليس ښار ته لاړل. هغوئ وليدل چې د هغه ځائ خلق د صيدايانو په شان په آمن سره اوسېدل. هغوئ آمن پسند او غلى خلق وُو، د هيچا سره يې هم لانجه نۀ وه، هغوئ سره د ضرورت ټول څيزُونه موجود وُو. هغوئ د صيدايانو نه ښۀ لرې اوسېدل او د نورو خلقو سره يې هيڅ لېن دېن نۀ کولو.

⁸کله چې هغه پينځۀ سړى صُرعه او اِستال ته راوګرځېدل، نو د مُلک خلقو د هغوئ نه تپوس وکړو چې، ”تاسو څۀ وليدل.“

⁹هغوئ جواب ورکړو، ”راځئ چې په ليس حمله وکړُو. مونږ هغه مُلک وليدو او هغه ډېر ښۀ وو. دلته هسې مۀ ايسارېږئ. زر شئ! او هغه مُلک ونيسئ.

¹⁰کله چې تاسو هلته ورسېږئ، نو تاسو به وګورئ چې هغه آمن پسند خلق دى. هغه يو لوئ ښار دے، او چې څۀ غواړئ هغه هر څۀ په کښې شته او خُدائ پاک هغه تاسو له درکوى.“

¹¹نو د دان قبيلې شپږ سوه سړى د صُرعه او اِستال نه لاړل او د جنګ وسلحه ورسره وه.

¹²هغوئ لاړل او د يهوداه په قريت يعريم کښې يې خېمې ولګولې. نو دا ځکه د هغه ځائ نوم تر اوسه پورې د ”دان کېمپ“ دے.

¹³هغوئ د هغه ځائ نه لاړل او د غرونو په مُلک اِفرائيم کښې د ميکاه کور ته راغلل.

¹⁴بيا هغه پينځۀ سړى کوم چې د ليس مُلک کتلو له تلى وُو هغوئ خپلو ملګرو ته ووئيل، ”تاسو ته پته وه څۀ چې هلته په يو کور کښې يوه مجسمه او يو په قالب کښې جوړ شوے بُت دے؟ هلته نور بُتان او مقدس پېش بند هم دے. ستاسو څۀ خيال دے چې څۀ وکړُو؟“

¹⁵هغوئ د ميکاه کور ته لاړل، چرته چې هغه ځوان ليوى اوسېدو او سلام يې ورباندې واچولو.

¹⁶په دې دوران کښې چې د دان کوم شپږ سوه فوجيان چې د جنګ دپاره تيار وُو، هغوئ په دروازه کښې ولاړ وُو.

¹⁷هغه پينځۀ جاسوسان سيدها کور ته ننوتل او هغه ټول بُتان او مقدس پېش بند يې واخستلو، په دې دوران کښې اِمام د شپږ سوو وسلحه بندو سړو سره په دروازه کښې ايسار وو.

¹⁸کله چې سړى د ميکاه کور ته ننوتل او مقدس څيزُونه يې راواخستل، نو اِمام د هغوئ نه تپوس وکړو، ”تاسو څۀ کوئ؟“

¹⁹هغوئ ورته ووئيل، ”غلے شه! چې يوه خبره هم ونۀ کړې. مونږ سره لاړ شه او زمونږ اِمام او مشر شه. د يو سړى د کورنۍ د اِمام کېدو نه دا ښۀ نۀ ده څۀ چې د بنى اِسرائيلو د يوې قبيلې اِمام شې؟“

²⁰نو اِمام په دې باندې ډېر خوشحاله شو او هغه مقدس څيزُونه يې واخستل او د هغوئ سره لاړو.

²¹نو هغوئ خپل بچى، څاروى او خپل هر څۀ د ځان نه مخکښې کړل او روان شول.

²²هغوئ د هغه کور نه ښۀ لرې مزل کړے وو نو ميکاه خپل ګاونډيان راغونډ کړل او د دان په سړو پسې لاړل او ورورسېدل.

²³او هغوئ ته يې چغه کړه. د دان سړى راوګرځېدل او د ميکاه نه يې تپوس وکړو، ”څۀ چل دے چې دومره ډېر خلق راغونډ شوى يئ؟“

²⁴ميکاه ورته په جواب کښې ووئيل، ”مطلب دې څۀ دے، څۀ خبره ده؟ تۀ زما اِمام بوځې او زما جوړ کړى معبودان اوړې او ځې نو نور زما سره څۀ پاتې کېږى؟“

²⁵د دان سړو ورته ووئيل، ”ستا دپاره به دا ښۀ وى چې نور هيڅ غږ ونۀ کړې. ګنى دا سړى به غصه شى او حمله به درباندې وکړى او بيا به تۀ او ستا ټوله کورنۍ مړه شى.“

²⁶نو هغوئ په خپله مخه لاړل. ميکاه ته پته ولګېده چې د دان سړى په هغوئ باندې ډېر زيات تکړه دى، نو هغه راوګرځېدو او کور ته لاړو.

²⁷۲۷‏-۲۸ کله چې د دان سړو اِمام او هغه څيزُونه يوړل چې کوم ميکاه جوړ کړى وُو، هغوئ لاړل او په ليس يې حمله وکړه، چې کوم آمن پسند خلق وُو او د جنګ دپاره تيار نۀ وُو هغوئ د بيت رِحوب په وادۍ کښې وُو او هغوئ د دې اوسېدونکى قتل کړل او په ښار يې اور بل کړو. داسې هيڅ څوک هم نۀ وُو چې هغوئ يې بچ کړى وے، ځکه چې ليس د صيدا نه ښۀ لرې وو او د نورو خلقو سره د هغوئ لېن دېن نۀ وو. د دان قبيلې خلقو هغه بيا جوړ کړو او په هغې کښې اوسېدل.

²⁹هغوئ د دې نوم د ليس نه دان ته بدل کړو، دان د هغوئ پلار نيکۀ او يعقوب زوئ وو.

³⁰د دان خلقو د ځان دپاره جوړ شوى بُتان ولګول، او د موسىٰ نمسى او د جيرسوم زوئ يُونتن او د هغۀ زامنو تر هغې پورې د اِمامانو په توګه خِدمت کولو چې جلاوطنۍ ته بوتلے شول.

³¹تر کومې پورې چې د خُدائ پاک کور په شيلو کښې وو نو تر هغه وخته پورې د ميکاه بُت هلته وو.