Read Pashto Bible (Yusufzai) — د پښتو مقدس کتاب قاضيان 2 Bible Online

قاضيان 2 - Pashto Bible (Yusufzai) — د پښتو مقدس کتاب bible

قاضيان 2

¹د مالِک خُدائ فرِښته د جِلجال نه بوکيم ته لاړه او بنى اِسرائيلو ته يې ووئيل، ”ما تاسو د مِصر نه راوويستلئ او هغه مُلک ته مې راوستلئ چې ستاسو د پلار نيکۀ سره ما د هغې وعده کړې ده. ما وئيل زۀ به هيڅ کله ستاسو سره خپل تړون مات نۀ کړم.

²تاسو چې د هغه خلقو سره هيڅ تړون ونۀ کړئ کوم چې په دې مُلک کښې اوسېږى بلکه د هغوئ د قربانۍ ځايُونه راوغورزوئ. خو تاسو زما د حُکم نافرمانى کړې ده. تاسو داسې ولې کړى دى؟

³اوس زۀ تاسو ته وايم چې تاسو مخ په وړاندې ځئ نو زۀ به دا خلق نۀ شړم. هغوئ به ستاسو دشمنان شى او د هغوئ معبودان به ستاسو دپاره يو دام جوړ شى.“

⁴کله چې د مالِک خُدائ فرِښتې دا خبرې بنى اِسرائيلو ته وکړې نو ټول قوم په چغو چغو وژړل،

⁵نو ځکه چې په هغه ځائ يې بوکيم نوم کېښودو چې مطلب يې ژړا دے او هلته هغوئ مالِک خُدائ ته قربانۍ پېش کړې.

⁶يشوَع چې کله بنى اِسرائيل رخصت کړل، نو هره يوه قبيله لاړله چې د هغه مُلک خپله خپله برخه ونيسى.

⁷تر کومې پورې چې يشوَع ژوندے وو، نو بنى اِسرائيلو د مالِک خُدائ خِدمت کولو او د هغۀ د مرګ نه پس چې تر کومې پورې هغه مشران ژوندى وُو چې هغوئ په خپله هغه ټول لوئ کارونه ليدلى وُو چې مالِک خُدائ د بنى اِسرائيلو دپاره کړى وُو، نو هغوئ هم هغه شان کول.

⁸د مالِک خُدائ خِدمت کوُونکے د نون زوئ يشوَع د يو سل او لسو کالو په عُمر کښې مړ شو.

⁹هغه په خپله زمکه کښې ښخ کړے شو هغه ځائ د جعس په شمالى طرف د اِفرائيم غرونو په مُلک تمنت حِرس کښې وو.

¹⁰هغه ټول نسل هم مړ شو او ورپسې نسل مالِک خُدائ او هغه څۀ هېر کړل چې مالِک خُدائ د بنى اِسرائيلو دپاره کړى وُو.

¹¹نو بنى اِسرائيلو د مالِک خُدائ خِلاف ګناه وکړه او د بعل د بُتانو عِبادت يې شروع کړو.

¹²هغوئ د مالِک خُدائ عِبادت پرېښودو، کوم چې د هغوئ د پلار نيکۀ خُدائ پاک وو، هغه خُدائ پاک چې هغوئ يې د مِصر د مُلک نه راويستلى وُو او هغوئ د نورو معبودانو عِبادت شروع کړو، د هغه خلقو د معبودانو چې د هغوئ په خواوشا کښې اوسېدل، هغوئ ورته سجدې وکړې او مالِک خُدائ يې په غصه کړو.

¹³هغوئ د مالِک خُدائ عِبادت پرېښودو او د بعل او عستارات خِدمت يې شروع کړو.

¹⁴نو مالِک خُدائ بنى اِسرائيلو ته سخت په غصه شو او هغوئ يې ډاکوانو ته حواله کړل او ډاکوانو هغوئ لوټ کړل. هغۀ په هغوئ باندې ټول د خوا او شا دشمنان غالِب کړل، نو هغوئ نور د دې جوګه نۀ وُو چې خپلو دشمنانو ته ټينګ شى.

¹⁵هر ځل چې هغوئ جنګ له تلل، نو مالِک خُدائ به د هغوئ خِلاف وو او هغوئ به يې د شکست سره مخ کول، لکه څنګه چې هغۀ وئيلى وُو چې هغه به هم داسې وى. هغوئ په سخت کړاو کښې راګېر وُو.

¹⁶بيا مالِک خُدائ په بنى اِسرائيلو باندې قاضيان مقرر کړل او دې قاضيانو د ډاکوانو نه خلاص کړل.

¹⁷خو بنى اِسرائيلو خپلو قاضيانو ته غوږ ونۀ نيولو. بنى اِسرائيلو د مالِک خُدائ سره بې غېرتى وکړه او د نورو معبودانو عِبادت يې وکړو. هغوئ زر د هغې لارې نه واوړېدل چې په کومه باندې د هغوئ پلار نيکۀ روان وُو، چې هغوئ په فرمانبردارۍ سره د مالِک خُدائ د حُکم په مطابق روان وُو.

¹⁸کله هم چې مالِک خُدائ بنى اِسرائيلو له يو قاضى ورکړو، نو خُدائ به د هغه قاضى مل وو او خلق به يې د خپلو دشمنانو نه بچ کول او چې تر کومې به هغه قاضى ژوندے وو نو مالِک خُدائ به په هغوئ رحم کولو ځکه هغوئ د خپلو تکليفُونو او مصيبتونو لاندې فرياد کولو.

¹⁹خو چې کله به قاضى مړ شو، نو خلق به هم هغه ناولو کارونو ته وروګرځېدل او د مخکښينى نسل نه به يې بدتر عمل کولو. هغوئ به د نورو معبودانو خِدمت او عِبادت کولو او د خپلو بدو عملونو او خپلو ضدى طريقو پرېښودو نه به يې اِنکار کولو.

²⁰نو مالِک خُدائ به بنى اِسرائيلو ته سخت په قهر شو او وې به يې وئيل، ”دې نسل هغه تړون مات کړے دے چې ما يې د دوئ پلار نيکۀ له د پوره کولو حُکم ورکړے وو. ځکه چې دوئ زما نافرمانى کړې ده،

²¹د يشوَع د مرګ په وخت چې په هغه مُلک کښې کوم قومونه پاتې وُو نو زۀ به هغوئ نور نۀ شړم.

²²زۀ به هغوئ د دې دپاره اِستعمال کړم چې دا معلومه کړم چې دا بنى اِسرائيليان د خپل پلار نيکۀ په شان زما په لاره روان دى او که نه.“

²³نو مالِک خُدائ هغه قومونه پرېښودل چې په هغه مُلک کښې پاتې شى، هغۀ نه يشوَع له په هغوئ باندې فتح ورکړه او نۀ يې د يشوَع د مرګ نه پس زر هغوئ وشړل.