Read Pashto Bible (Yusufzai) — د پښتو مقدس کتاب قاضيان 20 Bible Online

قاضيان 20 - Pashto Bible (Yusufzai) — د پښتو مقدس کتاب bible

قاضيان 20

¹بيا په شمال کښې د دان نه واخله په جنوب کښې تر بير سبع پورې، هم داسې نَمرخاتۀ طرف ته د جِلعاد د مُلک ټول بنى اِسرائيل راووتل. قوم د يو تن په شان په مصفاه کښې د مالِک خُدائ په حضُور کښې راغونډ شو.

²د بنى اِسرائيلو د ټولو قبيلو مشران د خُدائ پاک د خلقو په دې غونډه کښې حاضر وُو او هلته څلور لاکه فوجيان د تُورو سره ولاړ وُو.

³په دې دوران کښې د بنيامين خلق خبر شول چې نور ټول بنى اِسرائيل په مصفاه کښې راغونډ شوى دى. بنى اِسرائيلو تپوس وکړو، ”مونږ ته ووايئ چې دا جرم څنګه شوے دے؟“

⁴د کوم ليوى چې بله ښځه وژلے شوې وه هغۀ جواب ورکړو، ”زۀ او زما بله ښځه د بنيامين په علاقه کښې جبعه ته د شپې تېرولو دپاره لاړُو.

⁵د جبعې سړى په ما باندې د حملې کولو دپاره راغلل او د کور نۀ يې ګېره واچوله. د هغوئ اراده زما قتلول وُو، خو هغوئ زما د بلې ښځې سره دومره غلط کار وکړو چې مړه شوه.

⁶ما د هغې لاش يوړو، ټوټې ټوټې مې کړو او يوه يوه ټوټه مې د بنى اِسرائيلو دولسو قبيلو ته ولېږله. دې خلقو په مونږ کښې سپک او شرمناک کار کړے دے.

⁷تاسو ټول بنى اِسرائيل دلته يئ. نو تاسو فېصله وکړئ چې مونږ له څۀ کول په کار دى.“

⁸ټول خلق يو ځائ پاڅېدل او وې وئيل، ”په مونږ کښې به يو کس هم واپس نۀ ځى که هغه په خېمه کښې اوسېږى او که په کور کښې.

⁹مونږ به داسې کار وکړُو چې پچه به واچوُو او څۀ سړى به خوښ کړُو چې په جبعه باندې حمله وکړى.

¹⁰د بنى اِسرائيلو لسمه برخه سړى به لښکر له خوراک رسوى او نور به لاړ شى چې د جبعې نه د دې بې شرمه کار بدله واخلى چې هغوئ د بنى اِسرائيل په مُلک کښې کړے دے.“

¹¹نو د بنى اِسرائيلو ټول سړى د دې يو مقصد دپاره راغونډ شول چې په ښار باندې حمله وکړى.

¹²د بنى اِسرائيلو قبيلو د بنيامين ټولې علاقې ته پېغام وړُونکى ولېږل چې ووائى، ”دا څومره سخت جرم دے چې ستاسو په مُلک کښې شوے دے؟

¹³نو د جبعه دا بدکاره کسان مونږ ته حواله کړئ، چې مونږ يې ووژنو او دا بد عمل د بنى اِسرائيلو نه لرې کړُو.“ خو د بنيامين خلقو خپلو خلقو يعنې بنى اِسرائيلو ته غوږ ونۀ نيولو.

¹⁴هغوئ د بنيامين د ټولو ښارونو نه جبعې ته راغلل چې د نورو بنى اِسرائيلو سره جنګ وکړى.

¹⁵۱۵‏-۱۶ هغوئ په هغه ورځ باندې د خپلو ښارونو نه شپږ ويشت زره وسلحه بند فوجيان راوغوښتل. د دې نه علاوه، د جبعې اوسېدونکو اووۀ سوه خاص خوښ شوى کسان هم راغونډ کړل کوم چې ګڅ مټى وُو. هر يو کس د ليندې په کاڼى باندې يو وېښتۀ ويشتلے شو او هيڅ کله ترې نه نۀ خطا کېدو.

¹⁶

¹⁷د بنيامين د خلقو نه بغېر نورو بنى اِسرائيلى قبيلو څلور لاکه وسلحه بند فوجيان راغونډ کړل چې کوم ټول تکړه فوجيان وُو.

¹⁸بنى اِسرائيل په بيت‌اېل کښې د عِبادت ځائ ته لاړل، هلته هغوئ د خُدائ پاک نه تپوس وکړو، ”کومې يوې قبيلې له اول په کار دى چې په بنيامينيانو باندې حمله وکړى؟“ مالِک خُدائ ورته ووئيل، ”د يهوداه قبيله.“

¹⁹نو په ورپسې سحر بنى اِسرائيل روان شول او د جبعې ښار ته نزدې يې خېمې ولګولې.

²⁰هغوئ د بنيامين په لښکر باندې حملې کولو له لاړل او ښار ته مخامخ يې د جنګ دپاره د فوجيانو قطارونه جوړ کړل.

²¹د بنيامين لښکر د ښار نه بهر راووتلو او د ورځې ختمېدو نه مخکښې هغوئ دوه وېشت زره بنى اِسرائيلى فوجيان وژلى وُو.

²²۲۲‏-۲۳ نو بنى اِسرائيليان د عِبادت ځائ ته لاړل او تر ماښامه پورې يې د مالِک خُدائ په حضُور کښې د غم ژړا وکړه. هغوئ د هغۀ نه تپوس وکړو، ”مونږ له په کار دى څۀ چې مونږ بيا د خپلو وړُونو بنيامينيانو خِلاف جنګ له لاړ شو؟“ مالِک خُدائ ورته ووئيل، ”او.“ نو بنى اِسرائيليان زړۀ‌ور شول او د جنګ دپاره يې هم هغه شان قطارونه جوړ کړل لکه څنګه يې چې په مخکښې ورځ باندې جوړ کړى وُو.

²³

²⁴هغوئ په دويم ځل د بنيامين د لښکر خِلاف روان شول.

²⁵بنيامينيان په دويم ځل د جبعې نه راووتل او په دې ځل هغوئ اتلس زره وسلحه بند بنى اِسرائيلى فوجيان ووژل.

²⁶نو ټول بنى اِسرائيل بيت‌اېل ته لاړل او د غم ژړا يې وکړه. هغوئ هلته د مالِک خُدائ په حضُور کښې کښېناستل او تر ماښامه پورې يې خوراک نۀ کولو. هغوئ د سلامتۍ نذرانې او څۀ سوزېدونکې نذرانې مالِک خُدائ ته پېش کړې.

²⁷۲۷‏-۲۸ د مالِک خُدائ د لوظ صندوق په هغه ورځو کښې په بيت‌اېل کښې وو او د هارون نمسے، د اِلعازار زوئ فينحاس د دې مشر وو. خلقو مالِک خُدائ ته ووئيل، ”مونږ له په کار دى چې د خپلو وړُونو بنيامينيانو سره بيا جنګ له لاړ شو او که نه؟“ مالِک خُدائ ورته ووئيل، ”جنګ وکړئ. زۀ به سبا په هغوئ باندې تاسو له فتح درکړم.“

²⁸

²⁹نو بنى اِسرائيلو د جبعې نه ګېرچاپېره څۀ فوجيان په پټو ځايُونو کښې کښېنول.

³⁰نو په دريمه ورځ هغوئ د بنيامين د لښکر خِلاف روان شول او جبعه ته مخامخ يې د جنګ دپاره د فوجيانو صفُونه جوړ کړل، لکه څنګه چې يې مخکښې جوړ کړى وُو.

³¹بنيامينيان د جنګ دپاره راووتل او د ښار نه لرې بوتلے شول. هغوئ د مخکښې په شان په کولاو مېدان کښې د بيت‌اېل په لاره او د جبعې په لاره د څۀ بنى اِسرائيلو وژل شروع کړل او تقريباً دېرش بنى اِسرائيليان يې ووژل.

³²بنيامينيانو ووئيل، ”مونږ هغوئ له هم هغه شان شکست ورکړو چې څنګه مو مخکښې ورکړے وو.“ خو بنى اِسرائيلو منصُوبه جوړه کړې وه چې هغوئ وباسى او په سړکُونو باندې يې د ښار نه لرې بوځى.

³³نو کله چې د بنى اِسرائيلو غټ لښکر بعل تمر ته ورسېدو نو صفونه يې جوړ کړل. بيا سړى د نمرپرېواتۀ طرف د جبعه ښار ګېرچاپېره د پټو ځايُونو نه د جنګ دپاره راووتل.

³⁴د بنى اِسرائيلو لسو زرو تکړه فوجيانو په جبعه حمله وکړه او دا سخت جنګ وو. بنيامينيانو ته پته نۀ وه چې د هغوئ تباهى رانزدې ده.

³⁵مالِک خُدائ بنى اِسرائيلو له د بنيامين په لښکر باندې فتح ورکړه. بنى اِسرائيلو په هغه ورځ باندې پينځۀ ‌ويشت زره او سل دشمنان ووژل چا چې تُورې راويستلې وې،

³⁶او بنيامينيانو ته پته ولګېده چې هغوئ شکست وخوړو. <h>بنى اِسرائيلو څنګه فتح وموندله</h> د بنى اِسرائيلو اصلى لښکر د بنيامينيانو نه راواپس شوے وو ځکه چې هغوئ په هغه سړو باندې اعتبار کولو چې هغوئ د جبعې نه ګېرچاپېره په پټو ځايُونو کښې کښېنولى وُو.

³⁷دا سړى په منډه منډه جبعې ته لاړل، هغوئ په ښار کښې خوارۀ شول او هلته يې هر يو کس ووژلو.

³⁸د بنى اِسرائيلو اصلى لښکر او په پټو ځايُونو کښې سړو يوه نښه مقرره کړې وه. کله به چې هغوئ د لوګى يوه لويه وريځ وليده چې د ښار نه ختله،

³⁹نو د جنګ د مېدان بنى اِسرائيليان به راوګرځېدل. تر هغه وخت پورې بنيامينيانو دېرش بنى اِسرائيليان وژلى وُو. خو هغوئ د خپل ځان سره ووئيل، ”بې شکه چې مونږ د مخکښينى جنګ په شان هغوئ له شکست ورکړو.“

⁴⁰بيا نښه څرګنده شوه، د ټول ښار نه د لوګى د وريځې ختل شروع شول. چې بنيامينيانو په ځان پسې وروستو وکتل نو حېران شول چې د ټول ښار نه لمبې ختلې.

⁴¹نو بنى اِسرائيليان راوګرځېدل او بنيامينيان په وارخطايۍ آخته شوى وُو ځکه چې هغوئ ته پته ولګېده چې د هغوئ تباهى رانزدې ده.

⁴²هغوئ د بنى اِسرائيلو نه په شا لاړل او کولاو مېدان ته يې منډه کړه، خو هغوئ تښتېدلے نۀ شول. هغوئ د اصلى لښکر او د هغه سړو په مينځ کښې ونيولے شول کوم چې اوس د ښار نه راوتل او هغوئ تباه شول.

⁴³بنى اِسرائيلو دشمنان ګېر کړل او بغېر د رکاوټ نه هغوئ د جبعه نَمرخاتۀ طرف ته يو ځائ پورې ورپسې وُو او د تګ په دوران يې هغوئ وژل.

⁴⁴د بنيامينيانو اتلس زره ښۀ فوجيان ووژلے شول.

⁴⁵هغه نور راوګرځېدل او د کولاو مېدان په طرف د رِمون ګټ ته وتښتېدل. د هغوئ نه پنځۀ زره سړى په لاره کښې ووژل شول. بنى اِسرائيل په هغه نورو پسې جِدوم ته روان وُو او دوه زره يې ووژل.

⁴⁶په هغه ورځ باندې ټول پنځۀ ‌ويشت زره بنيامينيان ووژلے شول چې ټول تکړه فوجيان وُو.

⁴⁷خو شپږ سوه سړى صحرا ته وتښتېدل او چې د رِمون ګټ ته ورسېدل نو هلته څلور مياشتې پاتې شول.

⁴⁸بنى اِسرائيليان هغه پاتې شوو بنيامينيانو پسې راواپس شول او ټول سړى، ښځې، ماشومان او داسې ځناور يې هم ووژل. هغوئ په هغه علاقه کښې هر يو ښار وسوزولو.