Read Pashto Bible (Yusufzai) — د پښتو مقدس کتاب قاضيان 3 Bible Online

قاضيان 3 - Pashto Bible (Yusufzai) — د پښتو مقدس کتاب bible

قاضيان 3

¹بيا مالِک خُدائ څه قومونه په هغه مُلک کښې د دې دپاره پرېښودل چې هغه بنى اِسرائيليان وآزمائى چې کوم د کنعان په جنګونو کښې شامِل نۀ وُو.

²هغۀ داسې د دې دپاره وکړل چې د بنى اِسرائيلو هر يو نسل ته د جنګ چل وښائى، خصوصاً هغوئ ته چې کومو مخکښې هيڅ کله هم جنګ نۀ دے کړے.

³په هغه مُلک کښې پينځۀ فلستى ښارونه پاتې شول، ټول کنعانيان، صيدايان او حِويان چې د بعل حرمون غر نه واخله د حمات درې پورې د لبنان په غرونو کښې اوسېدل.

⁴هغوئ د بنى اِسرائيلو دپاره يو آزمېښت وو، چې دا معلومه شى چې مالِک خُدائ د موسىٰ په ذريعه بنى اِسرائيلو له کوم حُکمونه ورکړى وُو چې په هغې باندې عمل کوى او که نه.

⁵نو داسې بنى اِسرائيل د کنعانيانو، حِتيانو، اموريانو، فارصيانو، حِويانو او يبوسيانو سره اوسېدل.

⁶هغوئ د دوئ لوڼه وادۀ کړې او خپلې لوڼه يې د هغوئ زامنو له ورکړې او د هغوئ د معبودانو عِبادت يې وکړو.

⁷بنى اِسرائيلو د مالِک خُدائ خِلاف ګناه وکړه، خپل خُدائ پاک يې هېر کړو او د بعل او اشيرې د بُتانو عِبادت يې وکړو.

⁸نو مالِک خُدائ بنى اِسرائيلو ته په قهر شو او د ميسوپوتاميه بادشاه کوشن رِسعتيم ته يې حواله کړل او اتۀ کاله يې په هغوئ حکومت وکړو.

⁹بيا بنى اِسرائيلو مالِک خُدائ ته فرياد وکړو او مالِک خُدائ د هغوئ د بچ کولو دپاره يو خلاصوُونکے ورولېږلو. دا عتنې اېل وو چې د کالب د کشر ورور قنز زوئ وو.

¹⁰د مالِک خُدائ روح په هغۀ باندې نازل شو او هغه د بنى اِسرائيلو قاضى شو. عتنى اېل جنګ له لاړو او مالِک خُدائ هغۀ له د ميسوپوتاميه په بادشاه باندې فتح ورکړه.

¹¹څلوېښت کاله په هغه مُلک کښې آمن وو او بيا د قنز زوئ عتنى اېل مړ شو.

¹²بنى اِسرائيلو د مالِک خُدائ خِلاف بيا ګناه وکړه، نو د دې په وجه مالِک خُدائ د موآب بادشاه عجلون د بنى اِسرائيلو نه طاقتور کړو.

¹³عجلون عمونيان او عماليقيان د ځان سره ملګرى کړل، هغوئ بنى اِسرائيلو له شکست ورکړو او د کهجورو ښار يريحو يې قبضه کړو.

¹⁴بنى اِسرائيليان اتلس کاله د عجلون بادشاه د اِختيار لاندې وُو.

¹⁵بيا بنى اِسرائيلو مالِک خُدائ ته فرياد وکړو او مالِک خُدائ د هغوئ د بچ کولو دپاره يو خلاصوُونکے ورولېږلو. د هغۀ نوم اهُود وو هغه د بنيامين د قبيلې د جيرا زوئ وو او هغه ګڅ مټے وو. بنى اِسرائيلو اهُود د موآب بادشاه عجلون ته د محصُول سره ورولېږلو.

¹⁶اهُود يوه دوه مخېزه تُوره جوړه کړې وه چې تقريباً اتلس اِنچې اُوږده وه. هغۀ دا د خپلو جامو لاندې د ښۍ پښې سپينې پورې تړلې وه.

¹⁷بيا هغۀ محصُول عجلون له يوړو، څوک چې ډېر څورب سړے وو.

¹⁸کله چې اهُود هغۀ له محصُول ورکړو، چې کومو سړو دا راوړے وو نو هغوئ يې رخصت کړل.

¹⁹خو چې کله اهُود د کاڼو بُتانو ته ورسېدو چې جِلجال ته نزدې وُو، نو عجلون ته راواپس شو او ورته يې ووئيل، ”بادشاه سلامت! زما سره ستا دپاره يو د راز خبره ده.“ نو بادشاه ورته ووئيل، ”اوس خبره مۀ کوه!“ او د هغۀ ټول نوکران د هغۀ د حضُور نه لاړل.

²⁰بيا چې کله بادشاه په چت باندې په خپله يخه کوټه کښې ناست وو، اهُود هغۀ له ورَغلو او ورته يې ووئيل، ”زما سره ستا دپاره د خُدائ پاک نه يو پېغام دے.“ نو بادشاه د تخت نه پاڅېدو.

²¹اهُود د خپل ګڅ لاس سره د ښى طرف نه تُوره راوويسته او د بادشاه په خېټه کښې يې ننه ويستله.

²²تُوره دومره ډُوبه لاړه چې د دې لاسکے په وازګه باندې پټ شولو. اهُود تُوره د بادشاه د خېټې نه راونۀ ايستله او د بادشاه کولمو نه ګند راووتلو.

²³بيا اهُود برنډې ته ووتلو، هغۀ پسې يې دروازې بندې کړې او تالې يې ولګولې،

²⁴او ترې نه لاړو. نوکران راغلل او وې لېدل چې دروازې تالا وې، هغوئ صِرف دا خيال کولو چې بادشاه دننه دے او متيازې کوى.

²⁵هغوئ تر څۀ وخته پورې انتظار وکړو، خو چې هغۀ بيا هم دروازه کولاو نۀ کړه، نو هغوئ چابى واخستله او دا يې کولاو کړه. او د هغوئ نېک دننه په فرش باندې مړ پروت وو.

²⁶په کوم وخت چې هغوئ اِنتظار کولو نو اهُود وتښتېدو، هغه د کاڼو بُتانو نه تېر شو او سعيرت ته وتښتېدو.

²⁷کله چې هغه د غرونو مُلک اِفرائيم ته ورسېدو، نو هغۀ بيګل وغږولو چې بنى اِسرائيليان د جنګ دپاره راغونډ کړى، بيا يې هغوئ د غر نه لاندې بوتلل.

²⁸هغۀ ورته ووئيل، ”په ما پسې راځئ! مالِک خُدائ تاسو له په خپلو دشمنانو يعنې موآبيانو باندې فتح درکړې ده.“ نو هغوئ په اهُود پسې لاندې لاړل او هغه ځائ يې قبضه کړو چې په کوم ځائ کښې به موآبيان د اُردن سيند نه پورې وتل، هغوئ هيچا له هم د پورې وتلو اِجازت ورنۀ کړو.

²⁹هغوئ په هغه ورځ باندې تقريباً لس زره ښۀ، تکړه موآبيان فوجيان ووژل، يو هم ونۀ تښتېدلو.

³⁰په هغه ورځ بنى اِسرائيلو موآبيانو له شکست ورکړو او اتيا کاله په هغه مُلک کښې آمن وو.

³¹ورپسې مشر د عنات زوئ شمجر وو. هغۀ شپږ سوه فلستيان په تېره لخته باندې ووژل او بنى اِسرائيليان يې هم بچ کړل.