Read Pashto Bible (Yusufzai) — د پښتو مقدس کتاب قاضيان 4 Bible Online

قاضيان 4 - Pashto Bible (Yusufzai) — د پښتو مقدس کتاب bible

قاضيان 4

¹د اهُود د مرګ نه پس، بنى اِسرائيلو بيا د مالِک خُدائ خِلاف ګناه وکړه.

²نو مالِک خُدائ هغوئ يو کنعانى بادشاه يابين ته حواله کړل، چا چې د حصور په ښار کښې بادشاهى کوله. د هغۀ د لښکر مشر سِسيرا وو، کوم چې په حروست هګوئيم کښې اوسېدو.

³د يابين نهۀ سوه د اوسپنې ګاډۍ وې او هغۀ د ظلم زياتى سره شل کاله په بنى اِسرائيلو حکومت وکړو. بيا بنى اِسرائيلو د مدد دپاره مالِک خُدائ ته فرياد وکړو.

⁴نو د لفيدوت ښځه، دبوره يوه پېغمبره وه او په هغه وخت کښې هغې د يو قاضى په توګه د بنى اِسرائيلو خِدمت کولو.

⁵هغه به د اِفرائيم غرونو په مُلک کښې د راما او بيت‌اېل په مينځ کښې د کهجورې يوې خاص ونې لاندې کښېناسته او بنى اِسرائيل به هلته د فېصلو کولو دپاره ورتلل.

⁶يوه ورځ هغې په نفتالى کښې د قادِس ښار د ابى نوعم زوئ برق راوغوښتلو او ورته يې ووئيل، ”مالِک خُدائ، د بنى اِسرائيلو خُدائ پاک تا له دا حُکم درکړے دے چې د نفتالى او زبولون قبيلو نه لس زره سړى روان کړه او د تبور غر ته يې بوځه.

⁷زۀ به د يابين د لښکر مشر سِسيرا وغولوم چې د قيسون سيند سره ستا خِلاف جنګ وکړى. د هغۀ سره به خپلې ګاډۍ او فوجيان وى، خو زۀ به تا له په هغۀ باندې فتح درکړم.“

⁸برق جواب ورکړو، ”که تۀ زما سره ځې نو زۀ به لاړ شم، خو که تۀ راسره نۀ ځې، نو بيا زۀ هم نۀ ځم.“

⁹هغې جواب ورکړو، ”ټيک ده، زۀ به تا سره لاړه شم، خو په دې منصُوبه کښې به تا ته عزت نۀ ملاوېږى، ځکه چې مالِک خُدائ به سِسيرا يوې ښځې ته تسليم کړى.“ نو دبوره د برق سره قادِس ته روانه شوه.

¹⁰برق د زبولون او نفتالى قبيلې قادِس ته راوغوښتلې او لس زره سړى په هغۀ پسې روان وُو. دبوره د هغۀ سره لاړه.

¹¹په دې دوران کښې قينى حِبر په ضعننيم کښې د څېړې ونې سره نزدې د قادِس سره خپله خېمه لګولې وه. هغه د نورو قينيانو نه لرې تلے وو، چې هغوئ د موسىٰ د اوخى حوباب اولاد وو.

¹²کله چې سِسيرا خبر شو چې برق د تبور غرونو ته ختلے دے،

¹³نو هغۀ خپلې نهۀ سوه د اوسپنې ګاډۍ او ټول سړى راوغوښتل او هغوئ يې د حروست هګوئيم نه د قيسون سيند ته ولېږل.

¹⁴دبورې برق ته ووئيل، ”لاړ شه! مالِک خُدائ به ستا لارښوونه کوى، نن هغۀ تا له په سِسيرا باندې فتح درکړې ده.“ نو برق د خپلو لسو زرو سړو سره د تبور غر نه راکُوز شو.

¹⁵کله چې برق او د هغۀ لښکر حمله وکړه، نو مالِک خُدائ سِسيرا د خپلو ټولو جنګى ګاډو او سړو سره په وارخطايۍ آخته کړل. سِسيرا د خپلې ګاډۍ نه راټوپ کړل او پيدل وتښتېدو.

¹⁶برق تر حروست هګوئيم پورې په ګاډو او لښکر پسې وو او د سِسيرا ټول لښکر ووژلے شو. يو سړے هم پاتې نۀ شو.

¹⁷سِسيرا د قينى حِبر ښځې ياعيل خېمې ته وتښتېدو، ځکه چې د حصور بادشاه يابين د حِبر د کورنۍ سره د آمن تړون وو.

¹⁸ياعيل د سِسيرا سره مِلاوېدو دپاره راووتله او ورته يې ووئيل، ”صاحِبه! دننه راشه، زما خېمې ته دننه راشه. مۀ يرېږه.“ نو هغه دننه راغلو او هغه يې په بستره کښې پټ کړو.

¹⁹هغۀ هغې ته ووئيل، ”زۀ تږے يم، ما له لږې اوبۀ راکړه.“ نو هغې د پيو مشکيزه کولاو کړه، پئ يې په هغۀ وڅښل او بيا يې پټ کړو.

²⁰بيا هغۀ ورته ووئيل، ”د خېمې د دروازې په خولهٔ کښې ودرېږه، چې څوک راځى او تپوس کوى چې دلته څوک شته، نو ورته وايه چې نشته.“

²¹سِسيرا ډېر ستړے وو او په خوږ خوب اُودۀ شو. نو ياعيل څټک او د خېمې موږے واخستلو، غلې شان هغۀ له ورغله، هغې ورله موږے د تندى نه پورې غاړه وويستلو او موږے په زمکه کښې هم ښخ شو او هغه مړ شو.

²²کله چې برق په سِسيرا پسې وو نو ياعيل مِلاوېدو دپاره ورووتله او ورته يې ووئيل، ”دلته راشه! زۀ به تا ته هغه سړے وښايم چې تۀ يې ګورې.“ نو هغه د هغې سره دننه لاړو او سِسيرا هلته په زمکه مړ پروت وو چې په تندى کښې يې د خېمې موږے ټک وهلے شوے وو.

²³په هغه ورځ خُدائ پاک بنى اِسرائيلو له په کنعانى بادشاه يابين باندې فتح ورکړه.

²⁴بنى اِسرائيل په هغۀ باندې دومره زورور شول چې تباه يې کړو.