Read Pashto Bible (Yusufzai) — د پښتو مقدس کتاب يوحنا دويم 1 Bible Online

يوحنا دويم 1 - Pashto Bible (Yusufzai) — د پښتو مقدس کتاب bible

يوحنا دويم 1

¹دا خط دَ مشر له طرف نه دے، اَؤ هغه ميرمنے اَؤ دَ هغے بچو په نُوم ليکلے کيږى چا سره چه زَۀ رښتينى مينه لرم، يواځے زَۀ نه، بلکه ټول هغه څوک چه دَ حق نه خبر دى،

²اَؤ دَ حق دَ خاطره چه په مُونږ کښے دے اَؤ تل تر تله به په مُونږ کښے پاتے وى.

³دَ خُدائے پلار اَؤ دَ هغۀ دَ زوئے عيسىٰ مسيح فضل، رحم اَؤ سلامتى دِ په حقيقت اَؤ مينے سره په مُونږ کښے پاتے وى.

⁴زَۀ په دے ډير خوشحاله شوم چه مے واؤريدل چه ستاسو ځنى بچى دَ حق په لار روان دى څنګه چه پلار مُونږ ته حُکم کړے وو.

⁵اَئے خوږے ميرمنے! اوس زَۀ درته يو عرض کوم چه راځئ چه دَ يو بل سره مينه لرُو. دا خيال مه کوئ چه نوے حُکم درکوم بلکه هغه يو دوباره دريادوم کُوم چه مُونږ ته دَ اول نه راکړے شوے وو.

⁶اَؤ دَ مينے نه زما مطلب دا دے چه مُونږ دَ خُدائے په حُکمُونو عمل وکړُو. دا هم هغه حُکم دے چه تاسو له اول نه آؤريدلے دے چه تاسو ته پکار دى چه په مينه کښے ژوند تير کړئ.

⁷ډير فريبيان دُنيا ته راغلى دى چه دَ عيسىٰ مسيح په جسم کښے دُنيا ته راتلل نۀ منى، داسے کسان لوئے ټګماران اَؤ خردَجالان دى.

⁸تاسو خبردار شئ چه کُومه خوارى چه مُونږ په تاسو کړے ده، هغه دِ ستاسو په سبب ضائع نۀ شى بلکه تاسو دِ دَ هغے پُوره اجر بيا مُومئ.

⁹هر هغه څوک چه دَ مسيح په تعليم قائم پاتے نۀ وى بلکه هغه پريږدئ، دَ هغۀ سره خُدائے نِشته، څوک چه دَ مسيح په تعليم عمل کوى نو دَ هغۀ سره پلار اَؤ زوئے دواړه شته.

¹⁰که څوک درته راشى اَؤ دا تعليم درنۀ کړى نو هغه خپل کورته مه پريږدئ اَؤ مه ورته سلام وايئ.

¹¹ځکه چه هر هغه څوک چه هغۀ ته سلام وائى، هغه دَ هغۀ په بدو کارُونو کښے شريک دے.

¹²ډيرے خبرے داسے دى چه زَۀ ئے تاسو ته ليکل غواړم خو دَ هغے زَۀ په ليک کښے راوستل نۀ غواړم، خو زَۀ دا اُميد لرم چه دربه شم اَؤ درسره به مخامخ خبرے وکړم دَ دے دَ پاره چه زمُونږ خوشحالى پُوره شى.

¹³هغه خور چه خُدائے غوره کړے ده دَ هغے بچى تا ته سلام وائى.