Read Pashto Bible (Yusufzai) — د پښتو مقدس کتاب اول سموئيل 11 Bible Online

اول سموئيل 11 - Pashto Bible (Yusufzai) — د پښتو مقدس کتاب bible

اول سموئيل 11

¹تقريباً يوه مياشت وروستو عمونى بادشاه ناحس د جِلعاد په علاقه کښې د يبيس ښار خِلاف خپل لښکر روان کړو او ښار يې محاصره کړو. د يبيس سړو ناحس ته ووئيل، ”مونږ سره د صُلحې تړون وکړه، نو مونږ به تا خپل بادشاه ومنو.“

²ناحس جواب ورکړو، ”زۀ به ستاسو سره په يو شرط باندې د صُلحې تړون وکړم، زۀ به د هر يو کس ښۍ سترګه وباسم او دا به د ټولو بنى اِسرائيلو دپاره د شرم خبره وى.“

³د يبيس مشرانو ووئيل، ”مونږ له اووۀ ورځې راکړئ چې مونږ د بنى اِسرائيلو ټول مُلک ته پېغام وړُونکى ولېږُو. که مونږ هيچا هم بچ نۀ کړُو، نو مونږ به تاسو ته حواله شو.“

⁴پېغام وړُونکى جبعې ته ورسېدل، چرته چې ساول اوسېدو او کله يې چې ورته خبر بيان کړو نو خلقو په چغو چغو وژړل.

⁵ساول د پټى نه غوَيى روان کړى وُو او تپوس يې وکړو، ”څۀ شوى دى؟ دا خلق ولې ژاړى؟“ چې کوم خبر پېغام ‌وړُونکو د يبيس نه راوړے وو نو هغوئ هغه ورته بيان کړو.

⁶کله چې ساول دا واورېدل نو د خُدائ پاک روح د لوئ طاقت سره په هغۀ باندې نازل شو او ساول سخت غصه وو.

⁷هغۀ دوه غوَيى بوتلل، ټوټې ټوټې يې کړل او د دې خبردارى سره يې پېغام وړُونکى ولېږل چې د بنى اِسرائيلو ټول مُلک ته دا ټوټې يوسئ، ”څوک هم چې د جنګ دپاره په ساول او سموئيل پسې نۀ ځى نو د هغۀ د غوَيانو سره به دا چل کېږى!“ نو د دې په وجه د مالِک خُدائ يره په بنى اِسرائيلو باندې راغله او هغوئ ټول په يو ځائ راووتل.

⁸ساول هغوئ په بزق کښې راغونډ کړل، هغوئ درې لاکه د بنى اِسرائيل نه وُو او دېرش زره د يهوداه د قبيلې کسان وُو.

⁹هغوئ د يبيس پېغام ‌وړُونکو ته ووئيل، ”خپلو خلقو ته ووايئ چې سبا د غرمې نه مخکښې به هغوئ خلاص شى.“ کله چې د يبيس خلقو ته دا پېغام مِلاو شو، نو هغوئ ډېر خوشحاله شول

¹⁰او ناحس ته يې ووئيل، ”سبا به مونږ تا ته خپل ځان حواله کړُو او چې ستا څۀ خوښه وى نو هغه راسره وکړه.“

¹¹په هغه شپه ساول خپل سړى په دريو ډلو کښې تقسيم کړل او هغوئ سحر وختى د دشمن په خېمو باندې تېز ورغلل او په عمونيانو باندې يې حمله وکړه. تر غرمې پورې يې ټول وژلى وُو. ژوندى پاتې کسان خوارۀ وارۀ شول، هر يو سړى په خپله مخه منډې وهلې.

¹²بيا خلقو سموئيل ته ووئيل، ”هغه خلق چرته دى چې کومو وئيل چې ساول به زمونږ بادشاه نۀ وى؟ هغوئ مونږ ته حواله کړه او مونږ به يې ووژنو!“

¹³خو ساول ورته ووئيل، ”نن به هيڅ څوک هم نۀ شى وژلے، ځکه چې نن هغه ورځ ده چې مالِک خُدائ بنى اِسرائيليان بچ کړى وُو.“

¹⁴او سموئيل هغوئ ته ووئيل، ”راځئ چې يو ځل بيا ټول جِلجال ته لاړ شو او ساول دوباره خپل بادشاه جوړ کړُو.“

¹⁵نو هغوئ ټول جِلجال ته لاړل او هلته يې په مقدس ځائ کښې د ساول د بادشاهۍ اِعلان وکړو. هغوئ د سلامتۍ نذرانې پېش کړې او ساول او د بنى اِسرائيلو ټولو خلقو يوه لويه خوشحالى وکړه.