Read Pashto Bible (Yusufzai) — د پښتو مقدس کتاب اول سموئيل 18 Bible Online

اول سموئيل 18 - Pashto Bible (Yusufzai) — د پښتو مقدس کتاب bible

اول سموئيل 18

¹کله چې داؤد خبرې ختمې کړې نو هغه د بادشاه زوئ يُونتن سره مِلاو شو. هغه د داؤد خوږ دوست جوړ شو او د هغۀ سره يې د خپل ځان په شان مينه کوله.

²ساول هم د هغه ورځې نه داؤد ځان سره وساتلو او هغه يې د پلار کور ته نۀ پرېښودو.

³يُونتن داؤد له د دوستۍ پوخ لاس ورکړو ځکه چې د هغۀ سره يې د خپل ځان په شان مينه لرله.

⁴هغۀ چې کومه چُوغه اغوستله هغه يې وويستله او داؤد له يې ورکړه، خپله زغره، تُوره، لينده او خپله پټۍ يې هم ورکړه.

⁵ساول به چې داؤد په هر کار پسې هم ولېږلو، نو هغه به يې په ښۀ طريقه سر ته رسولو. نو ساول هغه په خپل لښکر کښې آفسر جوړ کړو. په دې باندې د ساول ټول آفسران او سړى خوشحاله شول.

⁶کله چې داؤد د جوليت د وژلو نه پس واپس راتلو او فوجيان کورونو ته واپس راروان وُو، نو د بنى اِسرائيلو هر ښار نه د ساول بادشاه سره مِلاوېدو دپاره ښځې بهر راووتلې. هغوئ د خوشحالۍ سندرې وئيلې، ګډېدې او بينجو او تمبل يې غږول.

⁷په سندرو کښې ښځو وئيل، ”ساول زرګونه وژلى دى، خو داؤد يو په لس د هغې نه زيات وژلى دى.“

⁸ساول په دې خفه شو او سخت غصه شو. هغۀ ووئيل، ”هغوئ د داؤد دپاره د لسو زرګونو دعوه کړې ده، خو زما دپاره صِرف د زرګونو دعوه، هغوئ به بيا داؤد بادشاه کړى!“

⁹نو د هغه ورځې نه هغۀ داؤد ته د شک په نظر کتل شروع کړل.

¹⁰په ورپسې ورځ د خُدائ پاک د طرف نه يو بد روح ساول ناڅاپه ونيولو، نو هغۀ په خپل کور کښې د ليونى په شان چغې وهلې. داؤد بينجو غږوله لکه چې هغۀ به هره ورځ غږوله او ساول نېزه په لاس کښې نيولې وه.

¹¹ساول د ځان سره ووئيل، ”زۀ به هغه د دېوال سره ونښلوم او هغۀ دوه ځلې نېزه ورګزار کړه، خو داؤد هر ځل ځان بچ کولو.“

¹²ساول د داؤد نه يرېدو ځکه چې هغه مالِک خُدائ پرېښے وو او د داؤد مل وو.

¹³نو ساول هغه د ځان نه لرې کړو او د زرو سړو مشر يې جوړ کړو. داؤد په جنګ کښې د سړو مشرى کوله

¹⁴او هغه په هر کار کښې کاميابېدو، ځکه چې مالِک خُدائ د هغۀ مل وو.

¹⁵ساول د داؤد کاميابى وليده او نور هم ترې ويرېدو.

¹⁶خو په بنى اِسرائيلو او يهوداه کښې هر يو کس د داؤد سره مينه کوله ځکه چې هغه يو ښۀ مشر وو.

¹⁷بيا ساول داؤد ته ووئيل، ”دا زما مشره لور ميرب ده. دا به زۀ تا ته په دې شرط وادۀ کړم چې تۀ به د يو تکړه او وفادار فوجى په شان زما خِدمت کوې او د مالِک خُدائ جنګونه به کوې.“ (د ساول خيال دا وو چې داؤد به پخپله نۀ وژنى بلکه په فلستيانو باندې به يې ووژنى.)

¹⁸داؤد ورته ووئيل، ”زۀ څوک يم او زما د کورنۍ څۀ حيثيت دے چې زۀ د بادشاه زُوم جوړ شم؟“

¹⁹خو چې کله هغه وخت راغلو چې ميرب داؤد له ورکړى، نو هغه يې يو بل محولاتى سړى له ورکړه چې نوم يې عدرى اېل وو.

²⁰خو د ساول لور ميکل په داؤد ميئنه شوه او کله چې ساول ترې نه خبر شو نو هغه خوشحاله شو.

²¹هغۀ د ځان سره ووئيل، ”زۀ به ميکل داؤد له ورکړم، زۀ هغۀ له دا د دې دپاره ورکوم چې د هغۀ دپاره يو دام جوړ شى او فلستيان يې ووژنى.“ نو ساول په دويم ځل داؤد ته ووئيل، ”تۀ به زما زُوم شې.“

²²هغۀ خپلو آفسرانو ته حُکم وکړو چې د داؤد سره په پرده کښې خبرې وکړى او ورته ووائى، ”بادشاه ستا نه خوشحاله دے او د هغۀ ټول آفسران تا خوښوى، دا ستا دپاره يو ښۀ وخت دے چې د هغۀ لور وادۀ کړې.“

²³نو هغوئ داؤد ته ووئيل او هغۀ جواب ورکړو، ”د بادشاه زُوم جوړېدل دا يوه لويه د عزت خبره ده، دا زما په شان غريب او کمزورى کس دپاره ډېره لويه خبره ده.“

²⁴چې داؤد څۀ وئيلى وُو آفسرانو هغه ساول ته ووئيل،

²⁵او ساول هغوئ له حُکم ورکړو چې داؤد ته ووايئ، ”بادشاه ستا نه د ناوې دا قيمت غواړى چې تۀ صِرف د سلو وژلو شوو فلستيانو سړو د سنتۍ پوستکې راوړې، دا به د هغۀ د دشمنانو نه بدل اخستل وى.“ (نو دا د ساول منصُوبه وه چې فلستيان داؤد ووژنى.)

²⁶د ساول آفسرانو داؤد ته هغه څۀ ووئيل چې څۀ ساول وئيلى وُو او داؤد په دې خوشحاله وو چې د بادشاه زُوم به جوړ شى. د وادۀ د ورځې مقررېدو نه مخکښې،

²⁷داؤد او د هغۀ سړى لاړل او دوه سوه فلستيان يې ووژل. هغۀ د هغوئ د سنتۍ پوستکى راوړل او ټول په شمېر کښې پوره وُو، د دې دپاره چې زُوم يې جوړ شى. نو ساول خپله لور داؤد له ورکړه چې وادۀ يې کړى.

²⁸ساول ته صفا پته ولګېده چې مالِک خُدائ د داؤد مل دے او دا چې د هغۀ لور ميکل هم ورسره مينه کوى.

²⁹نو هغه د داؤد نه نور هم ويرېدو او چې تر څو پورې ژوندے وو نو هغه يې دشمن وو.

³⁰د فلستيانو لښکرې به راتلې او جنګ به يې کولو او داؤد به د ساول د نورو آفسرانو نه په جنګ کښې زيات کامياب وو. نو په دې وجه داؤد ښۀ مشهُور شو.