Read Pashto Bible (Yusufzai) — د پښتو مقدس کتاب اول سموئيل 19 Bible Online

اول سموئيل 19 - Pashto Bible (Yusufzai) — د پښتو مقدس کتاب bible

اول سموئيل 19

¹بيا ساول خپل زوئ يُونتن او خپلو ټولو درباريانو ته ووئيل چې ما د داؤد د قتلولو منصُوبه جوړه کړې ده خو يُونتن د داؤد نه ډېر خوشحاله وو،

²نو يُونتن داؤد ته ووئيل، ”زما پلار تا قتل کول غواړى. نو مِهربانى وکړه چې سبا سحر د ځان حِفاظت وکړه، په يو محفوظ ځائ کښې پټ شه او هلته اوسېږه.

³چې په کوم پټى کښې تۀ پټ يې نو زۀ به هلته لاړ شم او د خپل پلار سره به ودرېږم او زۀ به د هغۀ سره ستا په باره کښې خبره وکړم. که ما ته د څۀ پته ولګى نو زۀ به تا خبر کړم.“

⁴يُونتن ساول ته د داؤد صِفت وکړو او ورته يې ووئيل، ”بادشاه سلامت دې د خپل خِدمت کوُونکى داؤد خِلاف غلط کار نۀ کوى.“ يُونتن ووئيل، ”هغۀ تا ته هيڅ نقصان نۀ دے رسولے. هغۀ چې ستا څۀ مدد هم کولے شو نو هغۀ همېشه کړے دے.

⁵کله چې هغۀ جوليت وژلو نو هغۀ خپل ژوند په خطره کښې واچولو او مالِک خُدائ د بنى اِسرائيلو دپاره يوه لويه فتح وموندله. کله چې تا هغه فتح وليده نو تۀ خوشحاله شوې. نو بيا تۀ ولې د يو بې ګناه سړى سره بد کوې او بغېر د څۀ وجې داؤد وژنې؟“

⁶نو ساول د يُونتن خبره ومنله او د ژوندى مالِک خُدائ په نوم يې قسم وکړو چې داؤد به نۀ وژنى.

⁷نو يُونتن داؤد راوغوښتو او هر څۀ يې ورته ووئيل، بيا يې هغه ساول له بوتلو او داؤد د مخکښې په شان په دربار کښې خِدمت کولو.

⁸د فلستيانو سره بيا جنګ شروع شو. داؤد په هغوئ باندې د دومره لوئ طاقت سره حمله وکړه چې هغوئ وتښتېدل.

⁹يوه ورځ د مالِک خُدائ رالېږلے شوى بدروح ساول ونيولو. هغه په خپل کور کښې ناست وو او نېزه يې په لاس کښې وه او داؤد هلته خپله بينجو غږوله.

¹⁰ساول کوشش وکړو چې داؤد د نېزې په سر باندې د دېوال سره ونښلوى، خو داؤد د هغه ځائ نه ټوپ کړل او نېزه په دېوال کښې ونښتله. په هغه شپه داؤد منډه کړه او وتښتېدو.

¹¹بيا ساول يو څو سړى ولېږل چې د داؤد کور ولټوى او په ورپسې سحر يې ووژنى. د داؤد ښځې ميکل هغۀ له خبردارے ورکړو او ورته يې ووئيل، ”که تۀ نن شپه لا نۀ ړې نو سبا به مړ يې.“

¹²هغې د يوې کړکئ نه هغه کُوز کړو او هغه په منډه منډه وتښتېدو.

¹³بيا هغې د کور هغه بُت واخستو په کټ کښې يې واچولو، د دې په سر يې د چېلو وړۍ واچولې او په يوه کپړه باندې يې پټ کړو.

¹⁴کله چې د ساول سړى د داؤد په بوتلو پسې راغلل، نو ميکل هغوئ ته ووئيل چې هغه بيمار دے.

¹⁵خو ساول هغوئ ورولېږل چې داؤد راولى. هغۀ هغوئ له حُکم ورکړو چې، ”هغه په خپل کټ کښې دلته راوړئ، چې وې وژنم.“

¹⁶هغوئ دننه لاړل او په کټ کښې يې هغه د کور والا بُت وليدو چې په سر باندې يې د چېلو وړۍ وې.

¹⁷ساول د ميکل نه تپوس وکړو، ”تا زما سره داسې دوکه ولې وکړه او زما دشمن سره دې په تښتېدو کښې مدد ولې وکړو؟“ هغې ورته په جواب کښې ووئيل، ”هغۀ ما ته ووئيل چې که په تښتېدو کښې مې د هغۀ مدد ونۀ کړو نو هغه به مې ووژنى.“

¹⁸نو داؤد وتښتېدو او په راما کښې سموئيل له لاړو او هغه هر څۀ يې ورته ووئيل چې ساول ورسره کړى وُو. بيا هغه د سموئيل سره نَيوت ته لاړل او هلته ايسار شول.

¹⁹ساول خبر شو چې داؤد په راما کښې په نَيوت کښې دے،

²⁰نو هغۀ يو څو سړى ورولېږل چې وې نيسى. نو هغوئ وليدل چې د پېغمبرانو يوې ډلې پېغام ورکولو چې د خپل مشر سموئيل سره ولاړ وُو. بيا د خُدائ پاک روح د ساول سړى ونيول او هغوئ هم پېغام ورکول شروع کړل.

²¹کله چې ساول د دې نه خبر شو، نو هغۀ نور پېغام وړُونکى ورولېږل او هغوئ هم پېشګوئې ورکوله. هغۀ په دريم ځل پېغام وړُونکى ولېږل او بيا د هغوئ سره هم هغه شان وشول.

²²بيا هغه په خپله راما ته روان شو. کله چې هغه په سيکو کښې لوئ کُوهى ته راغلو او هغۀ تپوس وکړو چې سموئيل او داؤد چرته دى نو ورته ووئيلے شول چې هغوئ په نَيوت کښې دى.

²³چې کله هغه هلته روان وو، نو د خُدائ پاک روح هغه هم ونيولو او هغۀ تر نَيوت پورې په ټوله لار کښې پېشګوئې ورکوله.

²⁴هغۀ خپلې جامې وويستلې او د سموئيل په مخکښې يې پېشګوئې ورکول شروع کړل او په هغه ټوله ورځ او ټوله شپه بربنډ پروت وو. (نو دا ځکه دا متل شروع شو، ”ساول پېغمبر جوړ شوے دے څۀ؟“)