Read Pashto Bible (Yusufzai) — د پښتو مقدس کتاب اول سموئيل 24 Bible Online

اول سموئيل 24 - Pashto Bible (Yusufzai) — د پښتو مقدس کتاب bible

اول سموئيل 24

¹کله چې ساول د فلستيانو سره جنګ کولو نه راواپس شو، نو هغه خبر شو چې داؤد د عين جدى په صحرا کښې دے.

²ساول د بنى اِسرائيلو نه درې زره تکړه فوجيان ځان سره کړل او د ځنګلى چېلۍ ګټو نَمرخاتۀ طرف ته په داؤد او د هغۀ په سړو پسې روان شو.

³هغه د لارې په غاړه د ګډو شپول سره نزدې يو غار ته راغلو او اودس يې مات کړو. داسې هم په هغه غار کښې وشول چې په کوم غار کښې داؤد او د هغۀ سړى شاته حصه کښې پټ وُو.

⁴د داؤد سړو غلى شان هغۀ ته ووئيل، ”دا ستا دپاره يوه موقع ده! مالِک خُدائ تا ته وئيلى دى چې هغه به تا له ستا دشمن په لاس کښې درکړى او چې بيا دې څۀ خوښه وى نو هغه ورسره کولے شې.“ داؤد غلے لاړو او د ساول د چُوغې نه يې يوه ټُکړه پرې کړه خو ساول ته د دې پته ونۀ لږېده.

⁵خو خپل ضمير داؤد ملامته کړو ځکه چې هغۀ د ساول د چُوغې نه يوه ټُکړه پرې کړې وه،

⁶او هغۀ خپلو سړو ته ووئيل، ”مالِک خُدائ دې ما د دې نه وساتى چې زۀ خپل نېک ته څۀ نقصان ورسوم، کوم چې مالِک خُدائ خوښ کړے دے! زۀ خو به هغۀ ته نقصان نۀ رسوم، ځکه چې هغه بادشاه دے او مالِک خُدائ هغه خوښ کړے دے!“

⁷نو داؤد خپل سړى دې ته راضى کړل چې هغوئ به په ساول حمله نۀ کوى! ساول پاڅېدو، د غر نه روان شو او په خپله مخه لاړو.

⁸نو داؤد ورپسې لاړو او آواز يې ورته وکړو، ”بادشاه سلامت!“ ساول راوګرځېدو او داؤد د عزت نه زمکې ته ټيټ شو

⁹او وې وئيل، ”تۀ هغه خلقو ته غوږ ولې نيسې چې کوم وائى چې زۀ تا ته د نقصان رسولو کوشش کوم؟

¹⁰تا په خپله وليدل چې مالِک خُدائ دا اوس اوس په دې غار کښې تۀ ما له په لاس کښې راکړې. زما څۀ سړو ما ته ووئيل چې زۀ تا ووژنم، خو ما درته د رحم په نظر وکتل او ومې وئيل چې زۀ خو به تا ته نقصان نۀ رسوم، ځکه چې تۀ هغه څوک يې چې مالِک خُدائ بادشاه خوښ کړے يې.

¹¹وګوره زما پلاره! د خپلې چُوغې ټُکړه وګوره چې زما په لاس کښې ده. ما تۀ وژلے شوې، خو صِرف ما دا ټُکړه پرې کړه. په کار دى چې تۀ دا ومنې چې ما ستا خِلاف د بغاوت يا تا ته د نقصان رسولو خيال هم نۀ دے کړے. او تۀ ما د وژلو دپاره نيسى، اګر چې ما درسره هيڅ بد نۀ دى کړى.

¹²مالِک خُدائ دې اِنصاف وکړى چې په مونږ کښې څوک په غلطه دے! زما خِلاف دې چې کوم کار کړے وى نو مالِک خُدائ دې د هغې سزا درکړى، خو زۀ به تا ته هيڅ نقصان نۀ رسوم.

¹³لکه چې د مشرانو متل وائى، ”د بدانو هر کار بد وى.“ خو زۀ به تا ته نقصان نۀ رسوم.

¹⁴ګوره! د بنى اِسرائيلو بادشاه د چا د وژلو کوشش کوى؟ ګوره! هغه په چا پسې شوے دے؟ په يو مړ سپى پسې، په يوې ورَږې پسې.

¹⁵مالِک خُدائ به اِنصاف وکړى او هغه به فېصله وکړى چې په مونږ کښې څوک په غلطه دے. هغه دې مسئلې ته وګورى، زما حِفاظت دې وکړى او ما دې ستا د لاس نه بچ کړى.“

¹⁶کله چې داؤد خبرې ختمې کړې، نو ساول ووئيل، ”دا تۀ يې داؤده، زما زويه؟“ او هغه په ژړا شو.

¹⁷بيا هغۀ داؤد ته ووئيل، ”تۀ په حقه يې او زۀ په ناحقه يم. تۀ زما سره ډېر ښۀ يې، اګر چې ما ستا سره ډېر بد کړى دى!

¹⁸تا نن ما ته وښودل چې تۀ زما سره څومره ښۀ يې، ځکه چې تا زۀ ونۀ وژلم، تر دې پورې چې مالِک خُدائ زۀ تا له په لاس کښې درکړم.

¹⁹يو سړے څو ځلې خپل دشمن نيسى او بيا يې د نقصان رسولو نه بغېر پرېږدى؟ تا چې نن زما سره څۀ کړى دى مالِک خُدائ دې تا له د هغې اجر درکړى!

²⁰نو زما يقين دے چې تۀ به د بنى اِسرائيلو بادشاه يې او بادشاهى به ستا د اِختيار لاندې قائمه وى.

²¹خو تۀ زما سره د مالِک خُدائ په نوم لوظ وکړه چې تۀ به زما اولاد ته هيڅ نقصان نۀ رسوې، نو داسې به زما او زما د کورنۍ نوم بېخى نۀ هېرېږى.“

²²نو داؤد د ساول سره هغه لوظ وکړو. نو ساول واپس کور ته لاړو او داؤد او د هغۀ سړى محفُوظو ځايُونو ته لاړل.