Read Pashto Bible (Yusufzai) — د پښتو مقدس کتاب اول سموئيل 29 Bible Online

اول سموئيل 29 - Pashto Bible (Yusufzai) — د پښتو مقدس کتاب bible

اول سموئيل 29

¹فلستيانو خپل ټول فوجيان افيق ته راغونډ کړل او بنى اِسرائيلو په يزرعيل کښې د چينې سره خېمې ولګولې.

²پينځۀ فلستى بادشاهان د خپلو سوُونو او زرګونو سړو د ډلو سره لاړل، داؤد او د هغۀ سړى د اکيس بادشاه سره شا ته روان وُو.

³فلستى مشرانو هغوئ وليدل او تپوس يې وکړو، ”دا عبرانيان دلته څۀ کوى؟“ اکيس ورته ووئيل چې، ”دا داؤد دے چې د بنى اِسرائيلو د بادشاه ساول يو آفسر دے. اوس هغه زما سره د ډېر وخت نه دے. د کومې ورځې نه چې هغه ما له راغلے دے نو هغۀ داسې يو کار هم نۀ دے کړے چې زۀ يې يوه غلطى راوباسم.“

⁴خو فلستى مشران اکيس ته په غصه وُو او هغۀ ته يې ووئيل، ”دا کس واپس هغه ښار ته ولېږه کوم چې تا ورکړے دے. هغه مۀ پريږده چې زمونږ سره جنګ له لاړ شى، کېدے شى چې هغه په جنګ کښې زمونږ خِلاف شى. په دې کښې څۀ شک نشته چې هغه به د خپل نېک خوشحالولو دپاره زمونږ د سړو سرونه قلم کړى.

⁵آخِر دا هم هغه داؤد دے، چې د هغۀ په باره کښې ښځې په ګډېدو کښې سندره وائى چې ساول زرګونه وژلى دى، خو داؤد يو په لس د هغې نه زيات وژلى دى.“

⁶اکيس داؤد راوغوښتلو او ورته يې ووئيل، ”زۀ په ژوندى مالِک خُدائ قسم کوم چې تۀ زما وفادار يې، او زۀ به خوشحاله وم چې تۀ زما سره تلے وې او په دې جنګ کښې زما ملګرتيا کړے وے. تۀ چې د کومې ورځې نه ما له راغلے يې ما په تا کښې هيڅ غلطى نۀ ده موندلې. خو هغه نور بادشاهان تا نۀ منى.

⁷نو په خېر سره واپس کور ته لاړ شه او داسې يو کار هم مۀ کوه چې هغوئ پرې خفه شى.“

⁸داؤد جواب ورکړو، ”صاحِبه! ما څۀ بد کړى دى؟ که داسې وى لکه چې تا ووئيل چې د کومې ورځې نه ما ستا خِدمت شروع کړے دے او تا په ما کښې هيڅ غلطى نۀ وى موندلې، نو ما له ستا سره تلل ولې نۀ دى په کار، چې تۀ زما نېک او بادشاه يې د دې دپاره چې زۀ ستا د دشمنانو سره جنګ وکړم؟“

⁹اکيس ورته ووئيل، ”زۀ دا منم، زۀ تا د خُدائ پاک د فرِښتې په شان وفادار ګڼم. خو هغه نورو بادشاهانو وئيلى دى چې تۀ زمونږ سره جنګ له نۀ شې تلے.

¹⁰نو داؤده! تاسو ټول چا چې ساول پرېښے دے او ما له راغلى يئ، سبا سحر وختى پاڅئ او چې څنګه رڼا شى نو لاړ شئ.“

¹¹نو داؤد او د هغۀ سړى په ورپسې ورځ سحر وختى روان شول چې فلستى مُلک ته واپس لاړ شى او فلستيان يزرعيل ته لاړل.