Read Pashto Bible (Yusufzai) — د پښتو مقدس کتاب اول سموئيل 31 Bible Online

اول سموئيل 31 - Pashto Bible (Yusufzai) — د پښتو مقدس کتاب bible

اول سموئيل 31

¹فلستيانو د جِلبوعه په غرۀ باندې د بنى اِسرائيلو خِلاف جنګ وکړو. د بنى اِسرائيلو فوجيان د فلستيانو نه وتښتېدل او د بنى اِسرائيلو ډېر کسان مړۀ شول.

²خو فلستيان ورورسېدل او د ساول درې زامن يې ووژل، يُونتن، ابينداب او مُلکيشوَع.

³د ساول نه ګېرچاپېره جنګ ډېر سخت وو او هغه په خپله د دشمن په غشو باندې لګېدلے وو او سخت زخمى وو.

⁴هغۀ وسلحه وړُونکى ځلمى ته ووئيل، ”خپله تُوره راوباسه او ما ووژنه، چې دا نا سنته فلستيان ما په تُوره ونۀ وهى او عذاب مې نۀ کړى.“ خو هغه ځلمے د داسې کولو په وجه سخت يرېدو. نو ساول خپله تُوره واخستله او خپل ځان يې پرې وروغورزولو.

⁵هغه ځلمى ته پته ولګېده چې ساول مړ شو، نو هغۀ خپل ځان په خپله تُوره وروغورزولو او د ساول په څنګ کښې مړ شو.

⁶نو داسې ساول، د هغۀ درې زامن او هغه ځلمے مړ شو، په هغه ورځ باندې د ساول ټول سړى مړۀ شول.

⁷کله چې د يزرعيل او د اُردن د سيند نَمرخاتۀ بل طرف ته بنى اِسرائيليان خبر شول چې د بنى اِسرائيلو لښکر تښتېدلے دے او ساول او د هغۀ زامن وژلے شوى دى، نو هغوئ خپل ښارونه پرېښودل. نو فلستيان راغلل او دا ښارونه يې ونيول.

⁸په ورپسې ورځ باندې فلستيان د لاشونو لوټ کولو دپاره لاړل او هغوئ د ساول او د هغۀ د دريو زامنو لاشونه وليدل چې د جِلبوعه په غرۀ باندې پراتۀ وُو.

⁹هغوئ د ساول سر پرې کړو او زغره يې ترې نه لرې کړه او ټولو فلستىيانو ته يې پېغام وړُونکى ولېږل چې خپلو بُت خانو او د هغوئ خلقو ته دا زېرے ورسوى.

¹⁰بيا هغوئ د هغۀ وسلحې د عستارات په بُت خانه واچولې او هغوئ د هغۀ لاش د بيت شان ښار په دېوال پورې په مېخُونو ټک وهلو.

¹¹کله چې په جِلعاد کښې د يبيس خلق خبر شول چې فلستيانو د ساول سره څۀ کړى دى،

¹²نو ښۀ بهادر سړى ووتل او ټوله شپه يې بيت شان ته مزل وکړو. هغوئ د ساول او د هغۀ د زامنو لاشونه د ښار دېوال نه راکُوز کړل او واپس يې يبيس ته يوړل او هلته يې وسوزول.

¹³بيا هغوئ هډُوکى يوړل او په ښار کښې يې د غز د ونې لاندې ښخ کړل او اووۀ ورځې هغوئ روژه ونيوله.