Read Pashto Bible (Yusufzai) — د پښتو مقدس کتاب اول سموئيل 7 Bible Online

اول سموئيل 7 - Pashto Bible (Yusufzai) — د پښتو مقدس کتاب bible

اول سموئيل 7

¹نو د قريت يعريم خلق راغلل او د مالِک خُدائ د لوظ صندوق يې د ابينداب نومې سړى کور ته يوړو، چې هغه په غر باندې اوسېدو. هغوئ د ابينداب زوئ اِلعازار د دې مشر مقرر کړو.

²د مالِک خُدائ د لوظ صندوق ډېره موده تقريباً تر شلو کالو پورې په قريت يعريم کښې ايسار وو. په دې وخت کښې ټولو بنى اِسرائيلو مالِک خُدائ ته د مدد دپاره وژړل.

³سموئيل بنى اِسرائيلو ته ووئيل، ”که تاسو د زړۀ د اخلاصه مالِک خُدائ ته رواوړئ، نو تاسو به خامخا د ټولو پردو معبودانو او عستارات بُتانو نه ځان خلاصوئ. خپل ځانونه مالِک خُدائ ته حواله کړئ او صِرف د هغۀ عِبادت کوئ او هغه به تاسو د فلستيانو د زور نه خلاص کړى.“

⁴نو بنى اِسرائيلو د بعل او عستارات د بُتانو نه خپل ځانونه خلاص کړل او صِرف د مالِک خُدائ عِبادت يې کولو.

⁵بيا سموئيل ټول بنى اِسرائيليان راوغوښتل چې په مصفاه کښې راغونډ شى او ورته يې ووئيل، ”زۀ به هلته ستاسو دپاره مالِک خُدائ ته سوال وکړم.“

⁶نو هغوئ ټول په مصفاه کښې راغونډ شول. هغوئ څۀ اوبۀ راوويستلې او مالِک خُدائ ته يې د يوې نذرانې په توګه توئ کړې او ټوله ورځ يې روژه ونيوله. هغوئ ووئيل، ”مونږ د مالِک خُدائ خِلاف ګناه کړې ده.“ نو سموئيل په مصفاه کښې د بنى اِسرائيلو مشر جوړ شو.

⁷کله چې فلستيان خبر شول چې بنى اِسرائيل په مصفاه کښې راغونډ شوى دى، فلستى بادشاهان د خپلو سړو سره د هغوئ خِلاف جنګ له راووتل. بنى اِسرائيليان د دې نه خبر شول او ويرېدل،

⁸او سموئيل ته يې ووئيل، ”مالِک خُدائ زمونږ خُدائ پاک ته دعا کول مۀ پريږده چې مونږ د فلستيانو نه بچ کړى.“

⁹سموئيل يو داسې ګډُورے حلال کړو چې مور يې رودله او د يوې نذرانې په توګه يې ټول مالِک خُدائ ته وسوزولو. بيا يې مالِک خُدائ ته دعا وکړه چې د بنى اِسرائيلو مدد وکړى او مالِک خُدائ د هغۀ دعا واورېده.

¹⁰کله چې سموئيل نذرانه پېش کوله، نو فلستيان د حملې دپاره مخکښې ورغلل، خو بيا هم په هغه وخت مالِک خُدائ د هغوئ خِلاف د يو لوئ تندر په شان آواز وکړو. فلستيان دومره په وار خطايۍ آخته شول چې وتښتېدل.

¹¹بنى اِسرائيليان د مصفاه نه روان شول او تقريباً تر بيت کَر پورې په فلستيانو پسې وُو او په لاره باندې يې وژل.

¹²بيا سموئيل يو کاڼے واخستلو او د مصفاه او شين په مينځ کښې يې ولګولو او وې وئيل، ”مالِک خُدائ زمونږ هر قِسم مدد کړے دے.“ او په دې باندې يې ”د مدد کاڼے“ نوم کېښودو.

¹³نو فلستيانو شکست وخوړو او مالِک خُدائ دې ته پرې نۀ ښودل چې تر کومې پورې سموئيل ژوندے وو چې هغوئ د بنى اِسرائيلو په علاقه قبضه وکړى.

¹⁴بنى اِسرائيلو ته هغه ټول ښارونه واپس مِلاو شول چې د عقرون او جات په مينځ کښې وُو او فلستيانو قبضه کړى وُو او داسې بنى اِسرائيلو خپله ټوله علاقه واپس واخستله. او د کنعانيانو او بنى اِسرائيلو په مينځ کښې هم آمن وو.

¹⁵سموئيل ټول عُمر د بنى اِسرائيلو قاضى وو.

¹⁶هغه به هر کال په بيت‌اېل، جِلجال او مصفاه کښې ګرځېدو او په دې ځايُونو کښې يې لانجې هوارولې.

¹⁷بيا به هغه واپس په راما کښې خپل کور ته تلو، هلته يې هم د قاضى په توګه خِدمت کولو. هغۀ په راما کښې مالِک خُدائ ته يوه قربان‌ګاه هم جوړه کړې وه.