Read Patamona Matthew 11 Bible Online

Matthew 11 - Patamona bible

Matthew 11

¹Sàlà yamùk enupantok tùlù tùuya 12 pan kon ta'lon kon pàk yenuka'nùssak tùuya yau, Jesus uya màlà pata nàmàppù molopai itàppù kappon yamùk yenupase molopai itekale yekamase tok pata yamùk màlà yawolon kon nà yau.

²Patikichi tau echii'ma Christ wotokoyi yekale yetasak tùuya yau, John Enpataukanài uya, ta'lon kon tonpa yamùk yeunokoppù ipyak.

³“Ina pàk yekamakà, àmàlà ken na' mùkkàlà, wapùla ka' tùulon màmuku ina uya màlà lù?” tukaik Jesus yekamappoppù tok uya.

⁴Jesus uya tok yeikuppù, “Ennapotàk kon molopai John pàk metayatài'nùk molopai menyatài'nùk mekamatàik,” tukaik.

⁵“Enpùn pata yenyan. Tùusasen pen nùsayan. Welei pokon kon uchipittàsak man. Panattàppan netayan. Molopai iwelichak kon wuluukasak man. Molopai Wakù Itekale yekama man entuppa'nokon pàk.

⁶Tùutauchinpasen mùkkàlà kappon kasei tetok ya upàk pùn,” teppù Jesus uya.

⁷John ya'lon kon wennapo tùse Jesus uya tukkan kon kappon yamùk yelupappù màlà ipàk, “Wontaik yak John piyak àutàsak kon yau ken, yà'là yene auya'nokon pàk enpen mettantàu? Wanak wepeima assetun yau?

⁸Yà'là yense ken mùtàtantàu? Kappon wepontàsak ka' wakù pon yak yense lù? Kappon yamùk màlà kasa wakù pe tùwepontàsan mùkyamlo kin patassek yau tùwemassan!

⁹Yekamatàk kon upàk, yà'là yense ken mùtàtantàu? Katù Maimu yenpoikanài? Ewaik, àpàkù'nokon tekamayaik, Katù Maimu yenpoikanài yentaino mentantàu.

¹⁰Masapùla John mùkkàlà Katù Maimu uselupappù ipàk lùppù, ‘Pùsàlàichi mùkkàlà umaimu yekamanài, yeunoko uya màlà awapiya asanta konekase àponaloppe.’ {MAL 3.1} teppù Jesus uya.

¹¹“Ailon kulu sàlà, John Enpataukanài mùkkàlà eke kulu, ànù'là iwemassak lùppù yentaino. Tùse mùkkàlà àssà'mùla nai'nùk itepulu pe we'nàtok epùn po motau swechi màlà itentai.

¹²John uya tekale yekamappù motapai sàlà tepose Itepulu pe we'nàtok epùn po wettalumattàsak man àsà ton ke molopai àsà ton kàyik yamùk wechi imokkaiche man teka'nonkaik.

¹³Tamù'nawolon kon Katù Maimu yenpoikannan molopai Law, uselupappù màlà John wechi molo yawàlà'ne.

¹⁴Molopai tok nekama itekale pàk ailon tesak auya'nokon yau, John mùkkàlà Elijah, tùuyàpù woton.

¹⁵Yetatàk kon uchi, tùpana ke ewechi kon yau!” teppù Jesus uya.

¹⁶“Yà'là kasa ken sàlà pe nai'nannùk kappon yamùk wechi te uya? Mule yamùk wenkalu makitti tau kasa tok man. Tok wentaime tùtonpa kon yamùk pàk,

¹⁷‘Wemali'mansak yelemu tàulunpai ina àponalok kon pe, tùse amananù kon pùn! Uluwaik tùlù yelemu pàk ina nùselenpai, tùse akalawù kon pùn!’ tukaik,” teppù Jesus uya.

¹⁸“John uyàpùppù màlà, molopai iita'lettàppù molopai tinchisen inchippù ya pen, molopai tok uya, ‘Àli akkwalù wechi màlà yau,’ teppù.

¹⁹Kàyik Mumu uyàpùppù, molopai iita'lettàppù molopai tinchisen inchippù ya, màlàyau tamù'nawolon kon uya, ‘Eke pe tùuta'lettàsen mùkkàlà molopai tùwetùnsen, pùlayatta pili'nàinan molopai àli ku'nàinan wechi yakon,’ teppù. Pukkeppe we'nàtok màlà tùusensen ailon pe inkupù winà,” teppù Jesus uya.

²⁰Màlàyau Jesus wepyattàppù màlà kappon yamùk eke ton tensan yekkwa ton pen kupùppù tùuya ipyau lùssan yàulàma pàk, masapùla kappon yamùk molonkonnà welattàsak tùmakuyi kon winàpai pùla iwechi pàk.

²¹“Àsà pe iwechi màlà àpona, Korazin pon kon! Àsà pe nàlà iwechi màlà àpona, Bethsaida pon kon! Masapùla tensan pen kussak Tyre pon kon molopai Sidon pon kon ponaloppe ayau'nokon iwekussak lùppù wekkussak yau, pena nen sàlà àlichi wonpù yak tok wepontàppù eppaino, molopai ulumlàppà sululukkappù tok uya eppaino tùpona'nokon tùmakuyi kon winàpai tùwelattàsak kon yekama pe!

²²Tùse tekamayaik àpàkù'nokon Ittuntok Weyu yattai usentuppantok wechi màlà eke peiwa kappon yamùk Tyre molopai Sidon pon kon pàk, àpàkù'nokon usentuppantok yentai!

²³Amyamlo nen, Capernaum pon kon! Anama kon peichi mekamayatàu? Eyenu'ma kon màlà i'nawon aiko yak! Masapùla tensan yekkwa ton pen ikussak lùppù àkklottau'nokon kussak Sodom po yau, molo sàlà iwechippù eppaino sàlà tepose!

²⁴Tùse tekamayaik àpàkù'nokon Ittuntok Weyu yattai usentuppatok wechi màlà eke peiwa Sodom pàk, àpàkù'nokon usentuppatok yentai!” teppù Jesus uya.

²⁵Màlà yattai Jesus uya wateppù, “Ukàipùnù, epùn molopai non yepulu! Tenki ukayaik àpàk. Masapùla pukkek ton molopai ichenupasak kon winàpai ànonamùppù yenpoikasak auya, mule yamùk yemyak pàk.

²⁶Ewaik, Ukàipùnù, sàlà kasa ayauchinpanài pe iwekkupù iche ewechippù lùppù sàlà.

²⁷“Ukàipùnù uya ulepasak màlà tamù'nawolon yà'làlà ke. Ànù'là pùla iwechi màlà Imu ittunài tùse Ikàipùnù neken, molopai ànù'là pùla iwechi màlà Ikaipùnù ittunài tùse Imu neken, molopai mùkyamlo ipàk Imu wettok enenpoikapai,” teppù ya.

²⁸“Àittàk kon Upyak, tamù'nawàlà amyamlo eme'nek lotù yalà pàk iichetakkasak kon, molopai elepa kon uya màlà wàlàkka'nàtok ke.

²⁹Uyapyoto pe ettàk kon, molopai uwinàpai esenupatàk kon. Masapùla tùusentupasen Iulà molopai àssà'mùn Iulà uyeselu yau. Molopai ayakkwalù kon wàlàkkattok yepolo auya'nokon màlà.

³⁰Uyapyoto pe we'nà màlà sa'man pen, molopai ulotùyi màlà àpona'nokon untùlù a'wono,” teppù Jesus uya.