Read Patamona Matthew 14 Bible Online

Matthew 14 - Patamona bible

Matthew 14

¹Màlà yattai Herod, pata yesak uya Jesus yekale yetappù.

²“John Enpataukanài kulu nen mùkkàlà iwe'wuluukasak, màlàpàk nen màlà apàikeppe tùwekkusan yek pen wekkupù yai,” teppù ya tapyoto ton pàk.

³Màlà wapiya Herod uselupappù màlà John yachitoppe molopai yaulonpàttoppe, molopai patikichi tak itùtoppe. Sàlà kupùppù ya màlà Herodias takon Philip noppù wenai.

⁴Masapùla John wechippù màlà Herod pàk, “Law maimu yawàlà pùla iwechi màlà mùkkàlà wechi apyau yau,” te pàk.

⁵Herod wechippù màlà John ànwàpai, tùse iichenalippappù màlà Jew yamùk pàk, masapùla Katù Maimu yenpoikanài pe tok uya ittu pàk.

⁶Herod uya tùwentuppù weyu lùppù kupù yattai Herodias yema'nomù mananùppù màlà tukkan kon kappon yamùk yemloto po. Herod utauchinpasak wechippù màlà.

⁷Màlàpàk ema'non pàk, “Yà'làlà yenna auya yau elepa uya màlà!” teppù ya Katù yesek tùkà'maik.

⁸Màlàyau tùsan nekamappù yennappù ya, “John ippaippù ke kùlepakà palapi po!” teppù ya.

⁹Kin usewankono'masak wechippù màlà, tùse ikupù uya tesak tùuya tùkakklamu yamùk yemloto po pàk, màlà ema'non wettok iche kasa ikuttoppe yekamappù ya.

¹⁰Màlàpàk nen uchi John ippai yattà woton yapyontàppù ya patikichi tau.

¹¹John ippaippù nepùppù nen uchi màlà palapi po molopai ema'non yemyak itùlùppù, molopai tùsan yemyak yalàppù ya.

¹²John ya'lonkonnùssan uyàpùppù màlà itàkàpù yense molopai tok uya iwu'nattàppù. Molopai nen uchi tok utàppù Jesus pàk yekamase.

¹³Màlà yekale lùppù yetasak tùuya yau, màlà pata nàmàppù Jesus uya kanau yau molopai iitàppù tùkkenan pata yak tewincha. Kappon yamùk uya yetappù màlà. Màlàyau tùpata kon nàmàppù tok uya, molopai tok utàppù ite'mappù pàk a'mun polo.

¹⁴Jesus wepalùkappù màlà kanau yapai, tukkan kon kappon yamùk yensak tùuya yau ichentuppappù tok pàk, molopai tok ye'netù ipittàppù ya.

¹⁵Màlà ko'manpe ya'lon kon uyàpùppù ipyak. Molopai, “Ko'manpe kulu iwenasak man, molopai sàlà pata màlà tùkkenan. Kappon yamùk yeunokkà, tàwà tok nùtài pata yamùk yak teipa kon woton ye'mase,” teppù tok uya.

¹⁶“Tok utà pen nen màlà. Amyamlo pe tok yewettàk kon,” tukaik Jesus uya tok maimu yeikuppù.

¹⁷“5 pan neken pùlomù pusak molopai asa'lon kon neken molok yamùk ina piyau man,” tukaik tok uya yeikuppù.

¹⁸“Inettàk kon uchi sà motak upyak,” teppù Jesus uya.

¹⁹Kappon yamùk weleutatoppe wanak pona Jesus uya yekamappù tok pàk. Màlàyau 5 pan pùlomù pusak molopai asa'lon kon molok yamùk tawon yanùmùppù ya. Tenu tùlùppù ya epùn winàkàik, molopai tenki teppù ya. Pùlomù pusak yamùk pilipàtùppù ya molopai itùlùppù ya ta'lon kon yemyak, molopai ya'lon kon uya itùpàtùppù kappon yamùk yemyak.

²⁰Tamù'nawàlà tok uta'lettàppù màlà iche tùwettok kon yawàlà. Màlàyau Jesus ya'lon kon uya iwànànsak lùppù yanukuppù 12 pe walicha.

²¹Kàyik yamùk iita'lettàsak kon wechippù màlà 5000 pe, tùse nossan yamùk molopai mule yamùk pokonpe pùla tok ittusak.

²²Màlàyau Jesus uya ta'lon kon wenuttoppe kanau yak yekamappù molopai tok utàtoppe tùwapiya palau latoi pona, kappon yamùk yeunokoi'ma.

²³Kappon yamùk yeunoko tùpo iitàppù màlà ikklù pona tewincha, àpùlemase. Ko'man pe iwenakasak tùse Jesus wechippù molo tewincha.

²⁴Sàlà yattai'ne kanau wechippù màlà mei tuna kau, chipachipa uya kanau chitochito'mappù màlà, masapùla assetun utasse'nùmùppù meluntà pe ipona.

²⁵Ko'làma wei wepakka wapiya Jesus uyàpùppù tok piyak tuna polo.

²⁶Tuna polo iyàpù yensak tùuya'nokon yau, ya'lon kon wettalipasak wechippù màlà. “Akkwalùppà mùkkàlà!” teppù tok uya, molopai tok wentaimepàtùppù tùusenalippa kon pàk.

²⁷Jesus uya tok yelupappù màlà asse'ne. “Meluntàk kon! Iulà mùkkàlà. Kettalipatàu!” tukaik.

²⁸Màlàyau Peter uselupappù, “Uyepulu, àmàlà pe kulu iwechi yau, tuna polo apyak uyàttoppe ikukkà,” tukaik.

²⁹“Àikkàichi!” tukaik Jesus uya yeikuppù. Peter uttàppù màlà kanau yapai tuna pona, molopai iitàppù tuna polo Jesus piyak.

³⁰Tùse assetun yensak tùuya yau Peter wettalipappù molopai tùuseulanka wepyattà yau. “Kùpùikattàkà, Uyepulu!” teppù ya.

³¹Asse'ne Jesus usenkappù iwinàkàik yachippù ya molopai ipàk, “Attu'mùla kulu ailon tetok auya man! Yà'là pe ken uchi iwechi pàk ailon te auya pùn?” teppù ya.

³²Asakklàma tok wenukuppù màlà kanau yak molopai assetun weleutappù.

³³Ya'lon kon kanau yawon kon uya Jesus yapulàppù. “Ailon pe Katù Mumu àmàlà!” teppù tok uya.

³⁴Tok uya tuna nukklàtùppù. Molopai tok uyàpùppù pata Gennesaret pona.

³⁵Màlà yattai kappon yamùk uya molo Jesus wechi ittuppù. Màlàpàk e'netton nettoppe kappon yamùk uya tok uya yekamappù. Tamù'nawolon pata woino kon pata yamùk yapai e'netton nepùppù tok uya Jesus piyak.

³⁶Ipawanattàppù tok uya e'netton uya neken nà ipon yepi yappàttoppe. Molopai tamù'nawolon kon ipon yepi yappà'nàinannùssan uchipittàppù.