Read Patamona Matthew 16 Bible Online

Matthew 16 - Patamona bible

Matthew 16

¹Pharisee yamùk molopai Sadducee yamùk uyàpùppù màlà Jesus piyak. Tok wechippù màlà ittuiche, màlàpàk tok uya eke ton tùwekkussen yek pen kuttoppe ya yekamappoppù epùn poino pe tùwechi yekamanài pe.

²Tùse Jesus uya tok yeikuppù, “Wei wewomù yau, ‘Wakù pe pata wechi pe man masapùla kak ichuweyu pe man,’ tawonnan amyamlo.

³Molopai ko'làma, ‘Konok uta pe man, masapùla kak ichuweyu pe man molopai ewalupà pe,’ tawonnan. Pata weyu wechi atta là yekamannan amyamlo iwekkupù wapiya kak yau tense. Tùse sàlà yamùk pata weyu yekama auya'nokon pùla man yentok ipàkàlà pàk tense!” tukaik.

⁴“Àli ton molopai ailon ton pen mùkyamlo tùwekkussen yek pen kuttoppe yekamapponnan. Yentok ipàkàlà kupù pen màlà tùse Jonah pàk neken iwekkussak lùppù yekama,” teppù ya. Màlàyau tok nàmàppù ya molopai iitàppù.

⁵Tùwukklàssak kon tuna latoi pona yau, Jesus ya'lon kon uya pùlomù pusak yalà pùla tok uputtàkapùppù wechippù.

⁶Jesus uya tok pàk, “Tùttuik ettàk kon Pharisee yamùk molopai Sadducee yamùk uya pùlomù yapuluwetanùttok pàk,” teppù.

⁷Tok wessa'molùkappù màlà tùuselupa kon pàk tùyiwalà'nokon, “Pùlomù pusak nessak nokon pùla iwechi pàk wate ya màlà,” tukaik.

⁸Jesus uya màlà tok uselupatok ittuppù, màlàpàk tok yekamappoppù ya, “Yà'là peichi iwechi pàk euselupa kon màlà eyiwalà'nokon pùlomù pusak pùla iwechi pàk? Attu'mùla kulu ailon tetok auya'nokon man!

⁹Ittu ken na' uchi auya'nokon pùla lùppù nai, 5 pan pùlomù pusak pilipàtùppù uya 5000 pan kon kàyik yamùk ponaloppe? Yà'là kaichalà ken walicha yamùk yak yanùkkappù auya'nokon?” tukaik Jesus uya tok yekamappoppù.

¹⁰“Molopai màlà yamùk nàlà 7 pan pùlomù pusak yamùk pilipàtùppù uya 4000 pan kon kàyik yamùk ponaloppe? Yà'là kaichalà ken walicha yamùk yak yanùkkappù auya'nokon?

¹¹Yà'là kasa ken uchi pùlomù pusak pàk pùla eyelupa kon uya tùse ittu auya'nokon pùla nai? Tùttuik ettàk kon Pharisee yamùk molopai Sadducee yamùk uya pùlomù yapuluwetanùttok pàk!” teppù ya tok pàk.

¹²Màlàyau nen uchi Jesus ya'lon kon uya ittuppù màlà, elanneppe tùwechi kon pùlomù yapuluwetanùttok, yak tùtùsen pàk ichelupa pe pùla, tùse enupantok làkku Pharisee yamùk molopai Sadducee yamùk uya pàk.

¹³Jesus utàppù màlà pata Caesarea Philippi piyawon yak, molo ta'lon kon yekamappoppù ya, “Ànùk pe ken Kàyik Mumu wechi tawonnan kappon yamùk?” tukaik.

¹⁴“Tùulon kon John Enpataukanài tawonnan. Tùulon kon Elijah tawonnan, tùulon kon uya Jeremiah te tùse, wapùla tùulonnà Katù Maimu yenpoikanài, tawonnan tùulon kon,” tukaik tok uya yeikuppù.

¹⁵“Amyamlo nen? Ànùk tawonnan nen ken amyamlo?” tukaik tok yekamappoppù ya.

¹⁶Simon Peter uya yeikuppù, “Yeunossak àmàlà Christ, tàwàlàlà tùwemassen Katù Mumu,” tukaik.

¹⁷“Simon, Jonah mumu, ipùlemasak àmàlà! Masapùla sàlà usenpoikappù kappon winà là pen màlà tùse Ukàipùnù epùn pon winà.

¹⁸Màlàpàk eyesettà uya sàlà Peter pe, tàk pe. Molopai sàlà tàk po usochiyi yamù uya màlà. Weli'nàtok là uya yentaika pen màlà.

¹⁹Molopai itepulu pe we'nàtok epùn po yakkokatok kon ke elepa uya màlà. Yà'làlà ànnulunpa non po nulunpa màlà epùn po, molopai yà'làlà ananùmù non po yanùmù màlà epùn po” teppù Jesus uya.

²⁰Màlàyau Jesus uya ta'lon kon pàk, “Ànù'là pàk Christ, pe wechi kùsekamatàu,” teppù.

²¹Màlà motapai nen uchi Jesus uya ta'lon kon yelupappù màlà, “Utà pe man Jerusalem pona molopai eke ton uya utalumattà màlà ipla àsà pe, eke ton paatele yamùk yepulu yamùk, molopai Law pàk enupannan uya. Uwànà màlà molopai icholùwano wei yattai uwuluuka màlà,” tukaik.

²²Peter uya yalàppù màlà miya tewincha molopai Jesus yàulàmappù ya. “Katù kùkkuttak Uyepulu! Sàlà wekkupù ewinàkàik pen kulu màlà!” tukaik.

²³Jesus welattàppù màlà molopai Peter pàk, “Uwinàpai itàkà, Settan! Uye'ma wakkà'nài àmàlà, masapùla sàlà yamùk eusenumenkatok màlà kappon pe usenumenkantok, Katù winàpai iyàssak pen!” teppù ya.

²⁴Màlàyau Jesus uya ta'lon kon pàk, “Ànù'là wechi uya'là àippai yau, tàwà ne'nonkai, molopai pulusuk tùnalà pe nai'nùk pulusuk yanùmùi, molopai tàwà uya'là nùyàpùi.

²⁵Masapùla kappon takkwalù ku'nài tùponaloppe uya ilachima màlà. Tùse kappon takkwalù lachimanài upàkànsau uya yepolo màlà.

²⁶Yà'làlà ken na' yepolo kappon uya tamù'nawolon wolù yawon kon yà'làlà yanùmù tùuya tùponaloppe yau, tùse takkwalù lachima tùuya yau? Yà'làlà pùla iwechi màlà kappon nùtùlù takkwalù mùnappotoppe tùuya.

²⁷Masapùla Kàyik Mumu uyàpù màlà tùkàipùnù yakkwayi molopai yapulàtok yau tùyinchelùyi yamùk pokonpe, molopai nen uchi tamù'nawolon kon ye'ma ya màlà tok nùkupùppù yawàlà.

²⁸Ailon kulu sàlà, tùulon kon satippe man tùwelikù woton kon pen Kàyik Mumu uyàpù Kin pe yene tùuya'nokon ponalà,” teppù Jesus uya.