Read Patamona Matthew 18 Bible Online

Matthew 18 - Patamona bible

Matthew 18

¹Màlà yattai Jesus ya'lon kon uyàpùppù ipyak, molopai tok uya yekamappoppù, “Ànùk ken eke kulu, itepulu pe we'nàtok epùn po yau?” tukaik.

²Jesus uya mule kà'mappù màlà, molopai i'mùssakkappù ya tok yemloto po.

³Molopai, “Ailon kulu sàlà, ewemyakanmasak kon molopai mule yamùk kasa ewenasak kon pùla iwechi yau, ewewomù itepulu pe we'nàtok epùn po yak pen màlà.

⁴Màlàpàk àssàmùla nai'nùk pùsàlà mule kasa wechi màlà eke pe kulu itepulu pe we'nàtok epùn po yau.

⁵Molopai kappon pùsàlà yekkwa mule yanùnnài uyesek yau, uya uyanùmù màlà,” teppù Jesus uya.

⁶“Tùse Ànù'là uya pùsamlo echikili ton ailon tawonnan upàk tonpa welattàtoppe uwinàpai ikupù yau, wakù peiwa nen iwechi màlà eke tàk yaulonsak i'mù pàk molopai icheulanka palau kak yau.

⁷Àsà pe kulu sàlà wolù pon kon kappon yamùk pona iwechi màlà, masapùla molo màlà kappon yamùk welattàtoppe iku'nài wechi. Màlà yekkwa ton wekkupù màlà, tùse àsà pe kulu iwechi màlà mùkyamlo iwekkuttoppe iku'nàinan pona!” teppù ya.

⁸“Eyemyatù kon wapùla atta kon uya àkupù kon ewelattà kon pa Katù winàpai yau, yattàtàk molopai yenu'matàk! Wakù peiwa iwechi màlà itemyatù wapùla itta pùla wema'nàtok yak ewewomù yau, asakklàma eyemyatù kon molopai atta kon kupù auya'nokon molopai eyenu'ma kon tàwàlàlà tùuyasen apok yak yentai lùiwa.

⁹Molopai eyenu kon uya àkupù kon ewelattà tok kon pe Katù winàpai yau, imokkatàk kon molopai yenu'matàk! Wakù peiwa iwechi màlà tewin itenu wema'nàtok yak ewewomù yau, asakklàma eyenu kon kupù auya'nokon molopai apok yak eyenu'ma kon yentai lùiwa,” teppù Jesus uya.

¹⁰“Tùttuik mettàik pùsamlo echikili ton kupù auya'nokon eyewanmakonpe tukaik. Tekamayaik àpàkù'nokon, tùyinchelùyi kenan kon mùkyamlo epùn po, tok inchelùyi yamùk mùkyamlo tàwàlà Ukàipùnù yenpata yennàinan epùn po.

¹¹[Masapùla Kàyik Mumu uyàpùppù màlà iitassak kon pùikattàse.]

¹²“Yà'là tukaik ken mesenumenkayatàu? Yà'là kupù ken kàyik 100 pan kon kalinilu yamùk itùkùn uya, tewinnà tok tonpa utassak yau? 99 pan kon nàmà ya wùk po màlà, iitassak kalinilu iwase.

¹³Ailon kulu sàlà, yeposak tùuya yau, tùutauchinpasen eke peiwa pùsàlà pàk, 99 pan kon iitassak kon pen pàk tùutauchinpa yentai.

¹⁴Màlà kasa làma Àkàipùnù kon epùn pon wechi màlà pùsamlo echikili ton tonpa utatù iche pùla,” teppù ya.

¹⁵“Àtonpa kon uya àli kussak ewinàkài'nokon yau, ipyak mùtàtàik molopai ikasa pùla iwettok kon mekamatàik. Tùse ayupo pùla mùkuttàik ipokonpe neken. Eyeta kon ya yau, àtonpa mùnapposak auya'nokon màlà.

¹⁶Tùse yeta ya pùla iwechi yau, tewin wapùla asa'là là kappon yamùk matàik aya'là'nokon, ‘tamù'nawàlà uselupantok yetatoppe tok uya,’ Katù Maimu uya wate kasa.

¹⁷Tùse yeta ya pùla iwechi yau, mekamatàik sochi tawon kon pàk. Molopai sochi tawon kon yeta ya pùla iwechi yau, Katù ittunài pen kasa mùkuttàik wapùla pùlayatta pili'nài kasa,” teppù Jesus uya.

¹⁸“Màlàpàk uchi ailon kulu sàlà, yà'làlà ànnulunpakon non po nulunpa màlà epùn po. Màlà ananùmù kon non po yanùmù màlà epùn po.

¹⁹“Molopai tùulon yekama uya sàlà àpàkù'nokon. Yà'là yattai là amyamlo asa'lon kon uya eusenumenkatok kon konekasak àwàpùlematok kon ipona pe yau, iwekkupù màlà àponalok kon pe Ukàipùnù epùn pon winà.

²⁰Masapùla asa'lon kon wapùla àsolùwawon kon wepilichak uyesek yau yattai, molo wechi màlà tok piyau,” teppù Jesus uya.

²¹Màlàyau Peter uyàpùppù Jesus piyak molopai yekamappoppù ya, “Uyepulu, yà'là kaichalà itekkwa ken utonpa uya àli kussak uwinàkàik yau ipàk usentuppa màlà? 7 pe ka' itekkwa lù?” tukaik.

²²Jesus uya yeikuppù, “Kane, 7 pe itekkwa pùla, tùse 70 pe'ne 7 pe itekkwa.

²³Masapùla itepulu pe we'nàtok epùn po wechi màlà, tapyoto yamùk uya tùwe'womatok kon ye'makapù ichelok kin kasa.

²⁴Màlà yamùk kupù pàk iwepyattà yau, kàyik iwomanàippù tukke kulu pùlayatta pàk nepùppù màlà ipyak.

²⁵Tùse ye'matok ya ike pùla iwechi pàk, itepulu uya ichilanmatoppe ikupùppù, inoppù, imunkà yamùk tukaik, molopai tamù'nawàlà itesappe iwettok pokonpe, iwe'womatok ye'matoppe.

²⁶Apyoto wenappù tese'muyok tepulu yemloto po. ‘Masa tàwà kùmàmukkà, molopai eye'ma uya màlà tamù'nawàlà,’ tukaik ipawanattàppù ya.

²⁷Itepulu usentuppappù ipàk, màlàpàk tàwà iwe'womatok wettoppe ye'ma ya tukaik ikupùppù ya molopai iitàtoppe.

²⁸“Kàyik utàppù màlà molopai tùtonpa apyoto yepoloppù ya, tùwomanàippù tukke pùla là pùlayatta. Yachippù ya molopai i'mùtumlukuppù ya. ‘Uwomatok auya ye'makà!’ teppù ya ipàk.

²⁹Itonpa apyoto wekkawai'mappù màlà itemlotopo molopai, ‘Masa tàwà kùmàmukkà molopai eye'ma uya màlà,’ tukaik ipawanattàppù ya.

³⁰Tùse ichentuppappù pen màlà. Patikichi tak itùtoppe ikupùppù ya. Tùwoyi ye'ma ya ponalà.

³¹Màlà yensak tùuya'nokon yau, tùulon kon apyoto yamùk wekkussak wechippù wakù pe pùla. Molopai tok utàppù tepulu kon piyak molopai tamù'nawolon yekamappù tok uya ipàk.

³²Màlàyau mùkkàlà apyoto kà'mappù itepulu uya. ‘Àli kulu àmàlà apyoto! Àpàk usentuppappù tamùnawolon ewe'womatok pàk, masapùla usentuppatoppe àpàk upawanattàsak auya pàk.

³³Eusentuppappù sàlà eppaino àtonpa apyoto pàk, usentuppappù àpàk kasa,’ teppù itepulu uya ipàk.

³⁴Itepulu we'naikasak kulu wechippù màlà. Molopai apyoto yeunokoppù ya patikichi tak italumattàtoppe, tamù'nawàlà tùwoyi ye'ma ya ponalà” tukaik.

³⁵Molopai Jesus uya, “Màlà kasaichi Ukàipùnù epùn pon uya tamù'nawàlà àkupù kon màlà, eyewan kon yapai àtonpa kon pàk eusentuppa kon pùla iwechi yau.”