Read Patamona Matthew 27 Bible Online

Matthew 27 - Patamona bible

Matthew 27

¹Ko'làma kulu tamù'nawolon kon paatele yamùk molopai tùnamasan Jew yamùk uya yà'là pe là Jesus kuttok tùuya'nokon konekappù, iwàtoppe.

²Jesus yaulomùppù tok uya màlà. Tok uya yalàppù molopai Pilate, kopùna pe tùwessen, yemyak tok uya itùlùppù màlà.

³Jesus welikù pe iwechi yensak tùuya yau, yeimipponàippù Judas Iscariot, usewankono'masak wechippù màlà molopai 30 pan chilùpa pun pùlayatta mùnappoppù ya eke ton paatele yamùk molopai tùnamasan yemyak.

⁴“Wemakuimasak man àli pen kàyik teimippose, iwelittoppe!” teppù ya. “Yà'là peichi ina wettoppe? Eneneichi màlà!” tukaik tok uya yeikuppù.

⁵Judas Iscariot uya pùlayatta solokappù Katù yùwùk tak molopai tok nàmàppù ya. Molopai nen uchi iitàppù màlà molopai iwe'mùtùntàppù.

⁶Eke ton paatele yamùk yepulu ton uya pùlayatta yanukuppù molopai tok uya, “Sàlà màlà mùn yepek, molopai law yawàlà pùla iwechi màlà Katù yùwùk pùlayattayi yen yak itùlù yau,” teppù.

⁷Tùusenumenka kon ipàk tùpo tok uya pùlayatta yanùmùppù màlà àinà ka'nài tumà ye'matoppe, kaklan yamùk uluwachi patasseppe.

⁸Màlàpàk uchi màlà umà yesatù “Umà, mùn pata” tukaik sàlà wei tepose.

⁹Màlàyau, màlà Katù Maimu yenpoikanài Jeremiah uya màlà kasa iwechi màlà teppù lùppù wekkupùppù ailon pe. “Tok uya 30 pan chilùpa pun yamùk yanùmùppù màlà. Màlà kaichalà itepek wechi màlà teppù Israel pon kon uya lùppù.

¹⁰Molopai pùlayatta yapulàppù tok uya àinà ka'nài tumà ye'matoppe, Itepulu uya yekamappù upàk kasa,” tawon.

¹¹Jesus wechippù màlà satippe kopùna yemloto po, mùkkàlà uya yekamappoppù. “Jew yamùk kinù na' àmàlà?” tukaik. Jesus uya yeikuppù, “Wa mùkayaik làkku,” tukaik.

¹²Yà'là teppù ya pen màlà eke ton paatele yamùk molopai eke ton tùnamasan uselupatok àli pe tùwinàkàik pàk.

¹³Màlàpàk Pilate uya Jesus pàk, “Yetanpe' auya pùla nai sàlà yamùk àli pe uselupantok ewinàkàik?” teppù.

¹⁴Tùse Jesus uya yeikuppù pen màlà, tewin itekkwa là tùwinàkàik uselupantok yeikuppù ya pen. Màlàpàk kopùna usenumenkasak wechippù màlà eke pe.

¹⁵Usentaka'nàppà yattai Uta'lettàntok yattai màlà kopùna wechippù tewinnà patikichi tawon kappon yamùk nennappù nonkanài pe.

¹⁶Màlà yattai tùttusen yachisak wechippù patikichi tau Barabbas itesek.

¹⁷Màlàpàk ilinà pe kappon yamùk wepilichak yau, Pilate uya tok yekamappoppù, “I'nai nonka uya àponalok kon pe iche messatàu, Barabbas wapùla Jesus, Christ tukaik tesassen?” tukaik.

¹⁸Ittuppù ya kan màlà tà tok uya Jesus tùsak temyak masapùla tùtalumayi kon pe ikupù tùuya'nokon pàk.

¹⁹Pilate wechi chichiu pe ittutok patassek yau tùse, inoppù uya tùmaimu yeunossak wechippù màlà. “Yà'là là kukkupù pùsàlà àli pen kàyik winàkàik, masapùla we'neppà'nàtok yau wettalumattài kulu pùsàlà wenai sàlà pe,” tukaik.

²⁰Eke ton paatele yamùk molopai eke ton tùnamasan uya tukkan kon kappon yamùk yelupappù màlà Pilate pawanattàtoppe tok uya Barabbas nonkatoppe ya molopai Jesus tùtoppe ya iwelittoppe.

²¹Pilate, kopùna pe tùwessen uya tok yekamappoppù, “I'nai ken uchi nonka uya àponalok kon pe pùsamo asa'lon kon kùlottapai iche messatàu?” tukaik. “Barabbas,” tukaik tok uya yeikuppù.

²²“Yà'là pe ken uchi Jesus, Christ tukaik tesassen kupù uya?” tukaik Pilate uya tok yekamappoppù. “Ipukapàtù màlà pulusuk pona!” tukaik tamù'nawolon kon uya yeikuppù.

²³Tùse Pilate uya tok yekamappoppù, “Yà'la ken uchi àli kussak ya nai?” tukaik. Màlàyau nen uchi tok wessa'molùkappù eke pe tùwentaime kon pàk, “Ipukapàtù màlà pulusuk pona!” tukaik.

²⁴Yà'là woton pe pùla sàlà kupù pàk tùwechi yensak tùuya yau, tùse wepanta'mantok wessepolo pàk, tuna yepoloppù ya, molopai temyatù kukappù ya tukkan kon kappon yamùk yemloto po, molopai, “Pùsàlà kàyik tùlù uya weli'nàtok yak pùn. Sàlà nai'nùk ànkupù kon!” teppù ya.

²⁵Tamù'nawàlà kappon yamùk uya yeikuppù, “Tàwà talumattàntok iwelittok yepeppù nùyàpùi ina pona molopai ina munkà yamùk pona!” tukaik.

²⁶Màlàyau nen uchi Pilate uya Barabbas nonkappù tok ponaloppe, Jesus ippoppàttoppe ikupùppù ya màlà, molopai itùlùppù ya ipukapàttoppe pulusuk pona.

²⁷Màlàyau Pilate soichayi yamùk uya Jesus yalàppù Kopùna patassek yak, molopai tamù'nawà tùtonpa kon yamùk pokonpe tok wepilipùppù Jesus woi.

²⁸Tok uya iponkappù molopai ichuweyu yak tok uya ipontàppù.

²⁹Màlàyau tok uya alok konekappù àmà'nà panta yamùk yapai molopai ippai pona itùlùppù tok uya, molopai yei tùlùppù tok uya itemyak kamik pen yak, màlàyau tok wenappù tese'mu kon yok molopai tok wàkklàppù ipàk. “Tàwàichi Jew yamùk Kinù nemapùi tachin pe!” teppù tok uya.

³⁰Tok wetattapàtùppù màlà ipona, molopai yei yekkwatùppù tok uya itemyapai molopai ippai yai tok uya ipippàtùppù.

³¹Tùwàkklà kon wenukasak ipàk yau, tok uya ichuweyi pon yapai iponkappù molopai ipontàppù tok uya ipon yak, molopai tok uya yalàppù ipukapàsse pulusuk pona.

³²Tùutà kon yau, Cyrene pon kàyik Simon itesek yepoloppù tok uya, molopai soicha yamùk uya yeka'nonkappù màlà Jesus nalà pulusuk yatoppe ya.

³³Tok uyàpùppù Golgotha itesek pata motak, “Puppà yàppù Pata,” te ya pe iwechi.

³⁴Màlà motau tok uya tinchisen, yoi'masak maik ke, ke ilepappù. Tùse yonpa tùpo, Jesus uya inchi pùla iwechippù.

³⁵Ipukapàssak tùuya'nokon yau, tok uya ipon pantakappù tùklottau'nokon tàk walai tenu'mapàsse.

³⁶Màlà tùpo molo tok wechippù chichiu pe itenupàkà.

³⁷Ippai yepoi tok uya àli pe uselupantok iwinàkàik menukasak tùlùppù màlà, “Pùsàlà mùkkàlà Jesus, Jew yamùk Kinù,” tawon.

³⁸Màlàyau tok uya asa'lon kon kappon lapumannannùssan kaiwattàsak wechippù màlà pulusuk pona Jesus pokonpe, tewin ikamikù pen winà molopai tùulon ikamikù winà.

³⁹Kappon yamùk tùutàsan màlà yawàlà uya tùpai kon wùkùu'wùkùumappù molopai Jesus mottùpappù tok uya.

⁴⁰“Katù yùwùk yamokklopù lùkku auya tà molopai yamù auya àsolùwau wei yau neken! Epùikattàkàichi, Katù Mumu pe ewechi yau! Àwuttàkà pulusuk poi!” tukaik.

⁴¹Màlà kasa làma eke ton paatele yamùk yepulu ton molopai enupannan Law pàk molopai tùnamasan eke ton wàkklàppù Jesus pàk.

⁴²“Tùulon kon pùikattànài lùk mùkkàlà tùse tùyiwalà iwepùikattà pùla man! Israel pon kon Kinù lùk uchi mùkkàlà! Tàwà nuttài sàlà pe pulusuk poi, molopai ailon te'nokon màlà ipàk!

⁴³Katù pàk ailon tawon mùkkàlà, tàwà Katù nùpùikattài iche tùwechi yau, masapùla Katù Mumu pe tùusesassen mùkkàlà. Masaichi Katù wechi ànpùikattàpai yenpai'nokon!” teppù tok uya.

⁴⁴Kappon lapumannannussan, ikaiwattàsak kon ipokonpe uya nàlà imottùnpappù, màlà kasa làma.

⁴⁵Inakattapailà wei tùse tamù'nawàlà pata wenappù màlà ewalupà pe, wei wetteilettà ponalà.

⁴⁶Wei wetteilettàsak yau Jesus wentaimeppù eke pe, Eloi, Eloi, lama sabachthani? “Ukatùyi, Ukatùyi, yà'là peichi iwechi pàk unonkasak auya sàlà?” te ya.

⁴⁷Kappon yamùk molo satippe tùwessan tonpa yamùk uya yetappù màlà molopai tok uya, “Elijah kà'mayan!” teppù.

⁴⁸Tok tonpa utàppù ase'ne aitun pe molopai kàtàkkwak walai yanùmùppù ya, ikipùppù ya so'li yak. Màlàyau nen uchi itùlùppù ya yei pàk molopai Jesus mùta pàk iki'mappù ya.

⁴⁹Tùse tùulon kon uya, “Masa, Elijah uyàpù ipùikattàse yenpai'nokon!” teppù.

⁵⁰Jesus wentaimeppù tu'ma màlà eke pe molopai iwelikùppù.

⁵¹Màlàyau awenek solin pan Katù yùwùk tawon, iwàkkàttok wekalakappù màlà asa'là, kau winàpai non tepose. Non utatù'mappù màlà, tàk we'moppù.

⁵²Uluwaik yamùk utakkokappù, molopai tukkan kon Katù ponalok kon kappon yamùk iwelichak kon nùssan we'wuluukappù màlà wema'nàtok yak.

⁵³Tok wepakkappù màlà uluwaik yamùk yapai molopai Jesus we'wuluuka tùpo, tok utàppù Jerusalem pona, molo tukkan kon kappon yamùk uya tok yeneppù màlà.

⁵⁴Soicha yamùk yepulu, soicha yamùk pokonpe Jesus yelasu pe tùwessan uya tùlùpùnù molopai tamù'nawolon tùwekkussan yeneppù, tok wettalipasak wechippù màlà molopai, “Katù Mumu pe kulu iwechippù man!” teppù tok uya.

⁵⁵Molo tukke nossan yamùk wechippù màlà, Jesus yene pàk tùwessan mei echii'ma. Mùkyamlo wechippù màlà ya'là iitàsak kon Galilee poi molopai ipùikattànnannùssan pe.

⁵⁶Mùkyamlo kùlottau màlà Mary Magdalene, Mary, James molopai Joseph yan, molopai Zebedee munkà yan tawonnan wechippù.

⁵⁷Ko'man pe iwenask yau, mamin yesak Arimathea poino welepamùppù màlà, Joseph itesek, molopai nàlà Jesus nenupa pe iwechippù màlà.

⁵⁸Pilate yemloto pona iitàppù molopai Jesus yàkàpù yekamappoppù ya ipàk. Pilate uya Jesus yàkàpù tùtoppe Joseph yemyak yekamappù màlà.

⁵⁹Màlàyau Joseph uya yalàppù molopai iwontàppù ya ikopposak pen linen kuyalikku yak.

⁶⁰Molopai itùlùppù ya tùwuluwachi pe, tùnakappù tàk yai pena kulu pùla là yak. Màlàyau eke lùmà tàk pelenkappù ya uluwaik mùta pona molopai iitàppù.

⁶¹Mary Magadalene molopai tùulon Mary tawonnan wechippù molo chichiu pe, uluwaik winàkàik itenpata.

⁶²Iwemassappe, Jew yamùk wàlàkkattok yattai eke ton paatele yamùk molopai Pharisee yamùk wessepoloppù màlà Pilate pokonpe.

⁶³Molopai tok uya, “Ina yepulu, ina nùttuyan mùkkàlà kasei uya nulà lùppù tùwechi yau, ‘We'wuluuka tu'ma màlà àsolùwau wei tùpo,’ teppù ya.

⁶⁴Wakù pe tennài ke uluwaik wettoppe ikukkà icholùwano wei ponalà, ya'lonkonnùssan utà itàkàpù yonanse tukaik, molopai nen uchi kappon yamùk pàk, ‘Iwuluukasak man weli'nàtok yapai,’ te tukaik. Sàlà àkàmlà'no kasei wechi màlà àli peiwa wapiyalok yentai,” teppù.

⁶⁵“Uluwaik yelasu pe mettàik, itàtàk imoka tukaik yentàk kon ànùttu kon yawàlà,” teppù Pilate uya tok pàk.

⁶⁶Màlàpàk tok utàppù, molopai uluwaik yakkosak tàk ke ki'nàmappù tok uya molopai yennàinan nàmàppù tok uya yene pàk.