Read Patamona Matthew 7 Bible Online

Matthew 7 - Patamona bible

Matthew 7

¹“Suwa messaik kùkai tùulon kon pàk, wa tawon pe ewechi yau àpàk nàlà wa te màlà.

²Masapùla suwa messaik tesak auya tùulon kon pàk yau, màlà kasa làma àpàk wa te màlà, molopai yà'làlà ànkupùppù kon tùulon kon winàkàik wekkupù màlà ewinàkài'nokon.

³Yà'là pe ken uchi iwechipàk àtonpa kon yenu yawon elekkwà yei ippunuppù yennàinan amyamlo, eke pùlanka eyenu kon yawon tense pùla?

⁴Atta ken uchi àtonpa kon pàk, ‘Masa yei ippunuppù eyenu yapai tùmokkaiche,’ te auya'nokon, eke pùlanka wechi eyenu kon yau tùse?

⁵Tùwetapansen àmàlà! Eke pùlanka imokkakà eyenu yapai wapiya, molopai nen uchi elekkwà yei punuppù àtonpa kon yenu yawon yene auya'nokon màlà wakù pe molopai imokka auya'nokon,” teppù Jesus uya.

⁶“Wakù pe esuken nai'nùk kùttùtàu a'a yamùk yemyak. Epekkek akassukuyi kon pearl yamùk kùsenu'matàu puluku yamùk yemloto pona. Masapùla tok uya neken màlà iwasappàtù, molopai tok welattà nen uchi màlà akalapàsse,” teppù ya nàlà.

⁷“Yennakà molopai yepolo auya màlà. Iwakà, molopai yepolo auya màlà. Manatta iwàkà, molopai ittakkoka màlà eyemyak.

⁸Masapùla ànù'là yennanài pe nai'nùk uya yepolo màlà, molopai iwanài uya yepolo, molopai manatta yakkoka màlà iwànài yemyak.

⁹I'nai, àkklottau'nokon nai'nùk uya ken, pùlomù pusak yenna tùmu uya pe iwechi yau, tàk ke ilepa?

¹⁰Wapùla, molok yenna ya yau àkài ke na' ilepa ya?

¹¹Àli pe là echii'ma'nokon wakù ton tùlù auya'nokon àmunkà kon yemyak ittunnan amyamlo. Màlà yentai nen uchi Àkàipùnù kon epùn pon uya màlà mùkyamlo, yennannan pe nai'nannùk lepa wakù ton ke!

¹²“Ewinàkàik ikupù iche ewettok kon mùkuttàik tùulon kon winàkàik. Sàlàichi màlà Law molopai Katù Maimu yenpoikannan uya enupantok,” teppù Jesus uya.

¹³“Ewontàk kon ettakkù manatta yai, masapùla awenek màlà manatta molopai eke màlà asanta mattantok yak anài, molopai tukkan kon mùkyamlo itawà tùutàsan.

¹⁴Tùse ettakkù manatta molopai elekkwà asanta màlà wema'nàtok yak anài, molopai tukkan kon pen uya yepolo màlà,” teppù Jesus uya.

¹⁵“Tùttuse ettàk kon, ailon pen itekale yenpoikannan pàk. Tok uyàpù màlà apyakù'nokon kalinilu kasa là tok usene màlà polopo, tùse àsà ton kamo yamùk kasa tok wechi màlà.

¹⁶Tok ittu auya'nokon màlà tok nùkupù winà. Àmà'nà yek màlà grape pe tùwepetasen pen, molopai kalalaik yek màlà fig ke tùwepetasen pen.

¹⁷Màlà kasa meluntà yei màlà wakù pe itepelu tùwepetasen, tùse italumayippù yei wepeta màlà àli pe itepelu.

¹⁸Meluntà yei wepeta àli pe itepelu pen màlà, molopai italumayippù yei wepeta wakù pe itepelu pen.

¹⁹Yei wakù pe tùwepetasen pen màlà tattàsen molopai apok yak tenu'masen.

²⁰Màlàpàk uchi iwalai pen itekale yekamannan ittu auya'nokon màlà tok nùkupù winà,” teppù ya nàlà.

²¹“Tamù'nawolon kon kulu kappon yamùk uyesa'nàinan, ‘Uyepulu, Uyepulu,’ tukaik, wewomù pen màlà Itepulu pe we'nàtok epùn po yak, tùse mùkyamlo neken Ukàipùnù epùn pon wettok ikupù iche ku'nàinan.

²²Iweyu uyàssak yau, tukkan kon uya upàk, ‘Uyepulu, Uyepulu! Katù Maimu yenpoikappù nen ina uya eyesek yau, tukke àli akkwalù yamùk yenpakkappù ina uya eyesek yau, molopai tukke tensan pen yamùk kupùppù ina uya!’ te màlà.

²³Màlàyau nen uchi tok pàk, ‘Eyittusak kon uya pùla man. Uwinàpai itàtàk kon àli ku'nàinan amyamlo!’ te uya màlà,” teppù Jesus uya.

²⁴“Màlàpàk uchi, ànù'là sàlà yamùk umaimu yetan nan molopai yawolon kon wechi màlà pukkek kàyik tàk po tùwùk yamùnàippù kasa.

²⁵Konok utappù pùlù pe, tuna u'mappù, molopai assetun utasse'nùmùppù meluntà pe tapùi pona. Tùse iwekkawai'mappù pen màlà, masapùla tàk po yamùsak pàk.

²⁶Tùse ànù'là sàlà yamùk umaimu yetan nan molopai yawolon kon pen wechi màlà pakko kàyik wàssàk po tùwùk yamùnàippù kasa.

²⁷Konok utappù pùlù pe, molopai tuna u'mappù molopai assetun utasse'nùmùppù meluntà pe tapùi pona, molopai tapùi wekkawai'mappù. Àsà pe kulu iwekkawai'mappù màlà!” teppù Jesus uya.

²⁸Jesus wenukapùppù màlà sàlà yamùk pàk tùuselupa pàk, molopai tukkan kon kappon yamùk usenumenkasak kulu wechippù màlà kappon yamùk yenupasak ya pàk.

²⁹Tok yenupan nan Law pàk kasa pùla iwechippù màlà. Tùse làkku kappon yamùk yenupappù ya apàikkek pe.