Read Patamona Mark 1 Bible Online

Mark 1 - Patamona bible

Mark 1

¹Sàlà màlà Wakù Itekale Jesus Christ yekale. Jesus mùkkàlà Katù Mumu.

²Iwepyattàsak màlà Isaiah, Katù Maimu yenpoikanài uya imenukappù kasa. “Katù uya, ‘Yenkà, Umaimu yekamanài teunossaik awapiya. Pùsàlàichi mùkkàlà eye'ma konekanài awapiya,’ teppù.

³Iwentaime màlà wontaik yau, ‘Itepulu ye'ma ikonekatàk, tossalà ite'ma ikonekatàk!’ ” tukaik.

⁴John usenpoikappù wontaik pe iwechi yak, kappon yamùk yenpatauka pe molopai wemakuimansak lùppù yekamatok usentuppan toppe yekale yekama pe. “Amakuyi kon winàpai elattàtàk kon. Katù usentupa màlà amakuyi kon pàk” tepù ya.

⁵Tamù'nawolon kon Judea molopai Jerusalem pon kon utàppù John yetase. Àli pe tùwettok kon yekamappù tok uya, molopai tok yenpataukappù ya Jordan itesek tuna kak.

⁶John pon wechippù màlà camel itesek pùpok lùppù konekasak pe. Ipokùlùyi nàlà kamo pippà lùppù. Itok wechippù kailau molopai iteipa wan.

⁷Itekale yekamappù ya, “Molo kàyik nùyàssan uye'mappù pàk ekeiwa uyentaino. Iulà là wepeima ittassa yewa yeukaik yentaino,” teppù ya.

⁸“Eyenpatauka kon uya nen tùwessen tuna ke, tùse eyenpatauka kon ya màlà Wakù Akkwalù ke,” teppù ya.

⁹Malalà tùpo Jesus uyàpùppù màlà Nazareth poi Galilee yapai, molopai John uya yenpataukappù Jordan itesek tuna kak.

¹⁰Tuna kapai tùwepalùka pe, epùn utakkokasak yeneppù ya, molopai Wakù Akkwalù uttàppù ipona wakokkwa kasa.

¹¹Màlàyau mayin usetappù epùn poi, “Àmàlà mùkkàlà u'nùn Umu. Wakù pe kulu Uyauchinpanài,” tukaik

¹²Màlà yattai là Wakù Akkwalù uya Jesus yeunokoppù wontaik pe iwechi yak.

¹³Molo iwechippù màlà 40 pe wei kaichalà molopai Settan wechippù ittuiche. Elannek ton nà kamo yamùk pokonpe iwechippù. Màlà tùpo inchelù yamùk uyàpùppù molopai tok uya ipùikattàppù.

¹⁴John yachi patikichi tak tùpo, Jesus utàppù màlà Galilee pona. Wakù Itekale yekamappù ya Katù winàpaino.

¹⁵“Iwalai pata weyu wesseposak man, Katù wettok itepulu pe mei pùla man. Amakuyi kon winàpai elattàtàk kon molopai ailon katàk kon, Wakù Itekale pàk, ” teppù ya.

¹⁶Galilee itesek palau usattàsak yena pàk tùusalà yau, Simon molopai ilui Andrew tawonnan yeneppù ya. Tùpunwe kon yenu'masak tok uya tuna kak. Molok yachipàk tùwessan pe tok wechippù màlà.

¹⁷“Àitàk kon uya'là kappon yamùk yachinài nan pe eyenupa kon uya màlà,” teppù Jesus uya tok pàk.

¹⁸Màlà yattai là tùpunwe kon yamùk nàmàppù tok uya molopai tok utàppù ya'là.

¹⁹Malalà mei tùutàsak yau, James molopai John tawonnan Zebedee munkà yeneppù ya kanau yau nen tùpunwe kon yamùk yale'natàpàtù pàk tùwessan.

²⁰Màlà yattai là Jesus uya tok kà'mappù. Tùkàipùnù kon Zebedee nàmàppù tok uya tùpoitolù ton pokonpe neken. Molopai tok utàppù Jesus ya'là.

²¹Jesus molopai ya'lon kon uyàpùppù Capernaum pona. Wàlàka'nà weyu yattai synagogue tak iwewomùppù, molo tok yenupappù ya.

²²Tok usenumenkappù kulu màlà i'napailà tenupa kon ya pàk. Masapùla tok yenupappù ya Law pàk enupan nan kasa pùla. Tùse tok yenupappù ya tapàikettù kenan kasa molopai ittunài pe.

²³Molo iwechippù kàyik àli akkwalù yen, synagogue tau. Iwentaimeppù suwa tukaik,

²⁴“Yà'là pe ina wechi iche messan, Jesus Nazareth pon? Ina mattanùsse na' àuyàssak màlà? Eyittuyan Iulà ànùk pe là ewechi. Àmàlà mùkkàlà wakù kulu Katù Maimu yenpoikanài!” tukaik.

²⁵Jesus uya ipàk meluntà pe, “Eppana ekkà, epakkakà mùkkàlà kàyik yapai!” teppù.

²⁶Àli akkwalù uya kàyik yalo'mappù ipla meluntà pe. Iwentaimeppù eke pe, molopai iwepakkappù mùkkàlà yapai.

²⁷Tukkan kon usenumenkappù kulu màlà ipàk. Tok usekamappopàtùppù tùyiwalà'nokon, “Yà'là ken uchi sàlà, tùulon nà emennak enupantok? Pùsàlà kàyik tapùikettù ke man àli akkwalù yamùk yapyontàtok yesappe molopai tok wechi imaimu yawàlà” teppù tok uya.

²⁸Màlà yattai là màlà tok uya Jesus pantomù yekamappù pata yamùk Galilee yawolon kon yawàlà.

²⁹Jesus molopai inenupaton uya Synagogue nàmàppù, tok utàppù tossalà Simon molopai, Andrew tawonnan yùwùk tak. James, John tawonnan pokonpe tok utàppù.

³⁰Simon yewoppù wàkàmi'masak wechippù màlà tekwek tau. “Iwàkkàmi'masak man,” teppù tok uya Jesus pàk.

³¹Màlàpàk Jesus utàppù ipyak. I'màssakappù ya itemyatù pàk. Màlà yattai là iwàkkàmi'makapùppù, màlà pelà tok yeipa woton konekappù ya.

³²Ko'man pe, wei patappù pe e'nek ton nepùppù kappon yamùk uya Jesus piyak molopai àli akkwalù yesak ton nà.

³³Molopai tamùnawàlà kappon yamùk màlà pata yawon kon wepilipùppù manatta pona.

³⁴Tukkan kon ipiitàppù ya tùpatalo'nan itepalan ton, molopai àli akkwalù yamùk là yenpakkappù ya. Tok uselupatok yattai ke Jesus uya tok lepappù pen, masapùla tok uya tùyittu pàk.

³⁵Ko'làma kulu, wei wepakka wapiya, Jesus we'wuluukappù molopai tapùi nàmàppù ya. Iitàppù tùkenan pata yak. Màlà motau iwàpùlemappù.

³⁶Tùse Simon molopai itonpa yamùk utàppù iwase.

³⁷Yeposak tùuya'nokon yau, “Tamù'nawolon kon eyiwayan,” teppù tok uya Jesus pàk.

³⁸Tùse Jesus uya tok maimu yeikuppù “Utànnokon sàlà tùulon pata pona, molo nàlà Wakù Itekale yekama uya màlà. Masapùla màlà kusse uyàssak nai'nùk,” teppù Jesus uya tok pàk.

³⁹Màlàyau Wakù Itekale yekama pàk iwechippù molo synagogues tau'ne Galilee yawàlà. Molopai àli akkwalù yamùk yempakkapàtùppù ya.

⁴⁰Welei pàk e'neppe tùwessen uyàpùppù Jesus piyak. Tese'mu yok iwenappù ipyau molopai ipawanattàppù ya. “Uyipittàpai ewechi yau, uyipittà auya màlà. Tùttuyaik ikuttok auya meluntàlù wechi molo,” teppù ya.

⁴¹Màlàyau Jesus usentupappù ipàk. Temyatà yenkappà ya molopai yappàtùppù ya. “Ewaik, eyipittà uya, echipittàk,” teppù ya.

⁴²Màlà yattai là welei pùla kàyik wenappù. Ichipittàppù nen uchi wakù pe.

⁴³Jesus uya àsà pe yelupappù molopai yeunokoppù ya, “Itàkàichi sàlà pe mailàlà tùusennakaik pùla,” tukaik. Yeunokoi'ma,

⁴⁴“Masa yetakà, yà'làlà kùkai ànù'là pàk. Tùse itàkà eye'ma tawàlà esekamata paatele pàk. Molopai yà'làlà àntùlù itùta Moses uya yekamappù kasa, euchipittàsak molopai ewekolùkasak ittutoppe tamù'nawolon kon uya,” teppù Jesus uya ipàk.

⁴⁵Tùse kàyik uselupappù ipàk tùutà pe eke pe kulu. Ichelupappù kulu màlà Jesus utà pata yak tene tùse yeselùkek pùla. Tùse tùkenan pata yawàlà neken nen uchi iichalàppù. Molopai kappon yamùk uyàpùppù ipyak tamù'nawà màlà yawolon pata yamùk yapai.