Read Patamona Mark 11 Bible Online

Mark 11 - Patamona bible

Mark 11

¹Jerusalem winàkàik tok uyàpù pata Bethphage molopai Bethany pona yau, Olive Wùpù pona tok uyàpùppù. Jesus uya asa'là tùnenupa ton yeunokoppù,

²Suwa teima “Itàtàk kon pata lùkwà eyemloto kon po nai'nùk yak. Ewelepansak kon yau, tonki mule yewattàsak yepolo auya'nokon màlà, ànù'là wechippù ipo lùppù pen. Meukatàik molopai mùnettàik upyak,” teppù Jesus uya.

³“Ànù'là uya àpàkù'nokon, ‘Yà'là pe iwechi pàk Donkey mule yeuka auya'nokon màlà?” te yau, ‘Ina yepulu wessak iche kulu pàk, molopai ina uya inappo màlà asse'ne, mùkatàik,’ ” teppù Jesus uya.

⁴Tok utàppù molopai tonki mule yepoloppù tok uya asantau, yewattàsak manatta pàk molopai tok uya yeukappù.

⁵Kappon yamùk satippe tùwesan uya Jesus nenupa ton yekamapoppù, “Yà'là pe iwechi pàk Donkey mule yeuka auya'nokon màlà?” tukaik.

⁶Màlàyau Jesus uselupappù lùppù yekamappù tok uya. Màlàpàk tàwà tok kupùppù kappon yamùk uya.

⁷Tok uya Donkey mule nepùppù Jesus piyak.Tùpon kon nonkappù tok uya ipona. Molopai Jesus wenukuppù ipona.

⁸Tukkan kon uya tùpon kon yakon yawenenkappù asantawàlà. Tùulon kon uya taleke'nan yei panta yattàsak tùuya'nokon yuk yawà yawenenkappù.

⁹Mùkyamlo wapiya iitàsak kon molopai ite'mappù pàk tùwessan wentaimeppù, “ Katù yapulàkà! Katù uya itepulu yesek yau nùyàsai'nàk pùlema màlà!

¹⁰Katù uya itepulu pe ina kàipùnù, Kin David wettok nùyàssai'nàk pùlema màlà! Katù yapulà sàlà, ” tukaik.

¹¹Jesus welepamùppù Jerusalem pona, molopai iitàppù Katù yùwùk tak. Tamù'nawolon yene pàk iichalàppù molo. Yenkassak tùuya yau pata uko'mankapù pàk tùnenupa ton 12 pan kon pokonpe iitàppù Bethany pona.

¹²Iwemassak pe Bethany poi tùwennappo kon yau, Jesus wapùkkassak wechippù.

¹³Mei kulu pùla là fig yek yeneppù ya tale ke.Iitàppù itepelu wechi molo yense. Iwelepansak ipyak tùse, yale pe neken iwechippù. Masapùla iwepetatok yattai pe pùla iwechi pàk.

¹⁴“Ànù'là uya eyepelu nattukka pen màlà,” teppù ya ipàk. Inenupa ton uya yetappù màlà.

¹⁵Tok welepansak Jerusalem pona yau, Jesus wewomùppù Katù yùwùk tak. Màlàyau kappon yamùk yà'làlà chilanmanài nan, molopai ye'manài nan yenpakkappù ya Katù yùwùk tapai. Molopai pùlayatta yapon lattàppù ya, molopai wakokkwa yamùk chilanmanài nan yapon nàlà.

¹⁶Ànù'là uya Katù yùwùk pùloloi polo yà'làlà yalà iche pùla iwechippù.

¹⁷Kappon yamùk yenupappù ya nen uchi, molopai tok pàk yekamappù ya “Katù Maimu we'menukasak man Katù uya, ‘Uyùwùk wechi màlà wàpùleman yùwùk pe tùpatalo'nan kon kappon yamùk ponaloppe,’ tesak, tùse amak ton uso'nantok itak pe ikussak auya'nokon man!” tukaik.

¹⁸Eke ton paatele yamùk molopai Law pàk enupannan uya yetappù. Màlàyau iwàtok tùuya'nokon iwinà woton ituiche tok wechippù. Tok usenalippappù ipàk masapùla tukkan kappon yamùk yenumenkasak wakù pe enupantok ya uya pàk.

¹⁹Ko'man pe iwenasak yau Jesus molopai inenupa ton utàppù, màlà pata yapai.

²⁰Iwemassak pe ko'làma, tùutàppù kon yawàlà lùppù tùutà kon yau, fig yek yeneppù tok uya iwaipùtasak tamù'nawàlà imik pokonpe.

²¹Màlàyau Peter uya ituppù molopai Jesus pàk, “Ticha, masa yenkà! Fig yek anpa'nùpùppù welichak man,” teppù.

²²Jesus uya tok maimu yeikuppù, “Ailon katàk kon Katù pàk,” tukaik.

²³“Ailon kulu sàlà, ànù'là sà wùk pàk, ‘Atamakà molopai tuna kak epukakà,’ tawon, kasei tetok tùuya pùla tewan yau tùwenaik, tùse ailon tukaik neken, wa te tùuya pàk ponaloppe iwekkupù màlà.

²⁴Màlàpàk yekama uya sàlà àpàkù'nokon. Yà'làlà yekamappo auya'nokon àwàpùlema kon pe yau. Ailon mùkatàik yepolo auya'nokon pàk. Molopai yepolo auya'nokon màlà.

²⁵Àwàpùlema yau ànù'là uya àli kussak ewinàkàik ittu auya yau ipàk esentuppakà. Katù, Àkàipùnù epùn pon usentuppatoppe nàlà amakuyi pàk.

²⁶Tùse eusentuppa pùla iwechi yau, Àkàipùnù epùn pon usentuppa amakuyi kon pàk pen màlà,” teppù Jesus uya.

²⁷Tok welepantukappù Jerusalem pona. Molopai Jesus usalà Katù yùwùk tawàlà tùse, eke ton paatele yamùk molopai Law pàk enupannan molopai tùulon kon eke ton nàlà uyàpùppù ipyak.

²⁸Tok uya yekamappo, “Ànùk yapàikketù winà ken uchi sàlà yamùk kupù auya màlà, wapùla ànùk apàikek ke elepatai sàlà yamùk kupù pa?” tukaik.

²⁹Jesus uya tok maimu yeikuppù, “Eyekamappo kon uya sàlà, yekamasak auya'nokon yau, yekama uya nàlà màlà àpàkù'nokon ànùk yapàikketù ke sàlà yamùk k upù uya.

³⁰Upàk yekamatàk kon! Ànùk uya ken màlà John yeunokoppù enpataukanse? Katù uya ka'lù, wapùla kappon yamùk uya,” tukaik.

³¹Tok uselupappù tùyiwalà'nokon, “ Yàlà te'nokon sàlà Katù winàpaino, tesak yau, ‘Yà'là pe ken uchi iwechi pàk ailon tukaik pùla mettantàu?’ te ya,

³²tùse ‘kappon yamùk winàpai,’ tesak yau.” (Tok usenalippappù màlà kappon yamùk pàk, masapùla tamù'nawolon kon uya John ittuppù ailon kulu Katù Maimu yenpoikanài pe pàk.)

³³Màlàyau tok uya Jesus maimu yeikuppù, “Ina uya ittu pùla man,” tukaik. Jesus uya tok pàk, “Yekama uya pen nàlà sàlà ànùk yapàikketù yau sàlà yamùk kupù uya,” teppù.